ສຳນັກຂ່າວຕ່າງປະເທດ ລາຍງານວ່າ ໃນເວລາ 10:00 ໂມງຂອງມື້ນີ້ (26 ສິງຫາ) ເຈົ້າໜ້າທີ່ກົມສີລະປາກອນ ກະຊວງວັດທະນະທຳຂອງໄທ ໄດ້ນຳທີມລົງປະຕິສັງຂອນ ບູລະນະສານທ້າວມະຫາພົມ ຢູ່ສີ່ແຍກຣາຊະປະສົງ ບາງກອກ ປະເທດໄທ ຫລັງຈາກທີ່ຖືກເສຍຫາຍຈາກເຫດລະເບີດຮຸນແຮງ ໃນມື້ວັນທີ 17 ສິງຫາຜ່ານມານີ້ ໂດຍໃຊ້ງົບປະມານບູລະນະທັງໝົດ 70,000 ບາດ ແລະ ມີກຳນົດໃຫ້ສຳເລັດພາຍໃນວັນທີ 3 ກັນຍານີ້ ໂດຍໃນວັນທີ 4 ກັນຍາ ແມ່ນຈະມີການທຳພິທີບວງສວງຕາມຮີດຄອງປະເພນີຂອງໄທ.
ທັງນີ້ ໃນລະຫວ່າງການປະຕິສັງຂອນ ແມ່ນເຈົ້າໜ້າທີ່ຍັງອະນຸຍາດໃຫ້ປະຊາຊົນ ແລະ ນັກທ່ອງທ່ຽວ ເຂົ້າໄປສັກກາລະບູຊາຢູ່ສານທ້າວມະຫາພົມໄດ້ເປັນປົກກະຕິ ເນື່ອງຈາກສານແຫ່ງດັ່ງກ່າວ ແມ່ນເປັນສະຖານທີ່ສັກສິດ ຊຶ່ງຊາວໄທ ໂດຍສະເພາະແມ່ນຊາວກຸງເທບ ໃຫ້ຄວາມສັກກາລະບູຊາເຊື່ອຖືມາດົນນານ.
