ເຈົ້າໜ້າທີ່ໄທຊ່ວຍເຫລືອແຮງງານລາວ ສິບກວ່າຄົນຖືກກົດຂີ່ແຮງງານຢ່າງທາລຸນ ໃນຟາມລ້ຽງໄກ່ ແລະ ໝູ ຢູ່ນະຄອນປະຖົມ
ຕາມເວັບໄຊໜັງສືພິມມະຕິຊົນຂອງໄທ ໃຫ້ຮູ້ວ່າ:ໃນວັນທີ 22 ສິງຫານີ້, ເຈົ້າໜ້າທີ່ຕຳຫລວດຈັງຫວັດນະຄອນປະຖົມ, ໄດ້ນຳກຳລັງເຂົ້າກວດຄົ້ນຟາມລ້ຽງໄກ່ ແລະ ໝູຊື່ວ່າ:“ຍຸພາຟາມ” ຢູ່ໃນເທດສະບານເມືອງ, ຈັງຫວັດນະຄອນປະຖົມ, ພາຍຫລັງໄດ້ຮັບການຮ້ອງຂໍຄວາມຊ່ວຍເຫລືອ ຈາກທ້າວ ຊານົນ ແສງແກ້ວ ອາຍຸ 25 ປີ ເຊິ່ງເປັນແຮງງານລາວທີ່ຫລົບໜີອອກມາ ຈາກຟາມດັ່ງກ່າວ ພ້ອມໝູ່ອີກ 1 ຄົນວ່າມີການກັກຂັງຂູດຮີດ ບັງຄັບໃຊ້ແຮງງານຢ່າງຜິດກົດໝາຍ ໂດຍມີການກັກຂັງແຮງງານຄົນລາວອີກ ຫລາຍກວ່າ 10 ຄົນຢູ່ໃນຟາມດັ່ງກ່າວ.
ເມື່ອເຈົ້າໜ້າທີ່ນຳກຳລັງເຂົ້າໄປຟາມລ້ຽງໄກ່ ແລະ ໝູຂະໜາດໃຫຍ່ ພົບແຮງງານລາວ 14 ຄົນ ອາຍຸລະຫວ່າງ 14-25 ປີ ຖືກກັກຂັງບັງຄັບໃຊ້ແຮງງານ ຈຶ່ງໄດ້ໃຫ້ຄວາມຊ່ວຍເຫລືອ. ແຮງງານລາວທັງໝົດໄດ້ພາເຈົ້າໜ້າທີ່ໄປເບິ່ງ ບໍລິເວນກັກຂັງ ເຊິ່ງເປັນຄອກເຫລັກ ມີລັກສະນະຄືຄຸກ ແບ່ງອອກເປັນຫ້ອງນ້ອຍໆ 10 ຫ້ອງ. ຟາມດັ່ງກ່າວເປັນຂອງຜູ້ຈັດການ ທະນາຄານແຫ່ງໜຶ່ງໃນຈັງຫວັດນະຄອນປະຖົມ ເຈົ້າໜ້າທີ່ຕຳຫລວດຈຶ່ງໄດ້ຄວບຄຸມຕົວ ພ້ອມແຈ້ງຂໍ້ຫາວ່າ: ໃຊ້ແຮງງານທາດ, ກັກຂັງຂູດຮີດ, ທຳຮ້າຍຮ່າງກາຍ, ທາລຸນເດັກ ແລະ ຄ້າມະນຸດ ກ່ອນສືບສວນ-ສອບສວນໄປຍັງເຄືອຂ່າຍຄ້າມະນຸດ ເພື່ອດຳເນີນຄະດີຕາມກົດໝາຍຕໍ່ໄປ.
ທ້າວ ຊານົນ ແສງແກ້ວ ແຮງງານຄົນລາວ ກ່າວວ່າ: ຕົນເອງກັບໝູ່ຖືກຕົວະມາຈາກປະເທດລາວ ໂດຍນາຍໜ້າໄດ້ບອກວ່າຈະພາມາເຮັດວຽກລາຍໄດ້ດີ ກ່ອນຈະຖືກສົ່ງມາເຮັດວຽກຢູ່ຟາມແຫ່ງນີ້ ແລະ ຖືກນາຍຈ້າງບັງຄັບໃຊ້ແຮງງານລ້ຽງໄກ່-ລ້ຽງໝູແຕ່ເຊົ້າຮອດຄ່ຳແບບທາລຸນ, ບາງເທື່ອກໍຖືກທຳຮ້າຍຮ່າງກາຍຈົນໄດ້ຮັບບາດເຈັບ ແລະ ບໍ່ຍອມພາໄປຫາໝໍ. ພໍຄ່ຳມາເລີກວຽກນາຍຈ້າງຈະບັງຄັບໃຫ້ເຂົ້າໄປຢູ່ໃນຄອກເຫລັກ ໂດຍປິດປະຕູລ໋ອກກຸນແຈຢ່າງແໜ້ນໜາ ແລະ ຖ້າບໍ່ເຮັດວຽກຕາມຄຳສັ່ງຈະຖືກນາຍຈ້າງໃຊ້ດ້າມປືນທຸບຫົວ ຫລືຕີດ້ວຍທ່ອນເຫລັກ ແລະ ບໍ່ມີການຈ່າຍເງິນຄ່າແຮງງານແຕ່ຢ່າງໃດ.
ເຈົ້າໜ້າທີ່ຕຳຫລວດຈັງຫວັດນະຄອນປະຖົມ ກ່າວວ່າ: ພາຍຫລັງຊ່ວຍເຫລືອແຮງງານຕ່າງດ້າວທັງໝົດ ອອກມາຈາກຟາມແລ້ວ ໄດ້ນຳໄປສອບສວນ ປະຫວັດການເຂົ້າມາປະເທດໄທໃນລັກສະນະໃດ?, ວິທີການໃດ? ແລະ ສອບສວນແຕ່ລະຄົນວ່າໃຜ ໄດ້ຮັບການທາລຸນແບບໃດ?, ກ່ອນຈະສົ່ງຜູ້ເຄາະຮ້າຍທັງໝົດ ພ້ອມກັບຜູ້ຕ້ອງຫາມາດຳເນີນຄະດີ ຕາມກົດໝາຍ.
ນອກຈາກນີ້ ຈະໄດ້ວາງມາດຕະການໃຫ້ເຈົ້າໜ້າທີ່ ອອກກວດກາສຳຫລວດຟາມຕ່າງໆວ່າຍັງມີຟາມໃດ ທີ່ໃຊ້ແຮງງານຜິດກົດໝາຍແບບນີ້ອີກ ເຊິ່ງຈະຕ້ອງຂໍຄວາມຮ່ວມມື ຈາກໜ່ວຍງານທະຫານ ແລະ ໜ່ວຍງານທີ່ກ່ຽວຂ້ອງ ເພື່ອບໍ່ໃຫ້ເກີດເຫດການລັກສະນະນີ້ອີກຕໍ່ໄປ.
ຂ່າວຈາກ:
