ບາຣັກ ໂອບາມ່າ ປະທານປະເທດຂອງສະຫາຣັດອະເມຣິກາບໍ່ຍອມນ້ອຍໜ້າຈີນ ປະກາດສ້າງຊູບເປີຄອມພິວເຕີທີ່ໄວທີ່ສຸດໃນໂລກໃຫ້ແລ້ວພາຍໃນປີ 2025
ປະຈຸບັນ ເຄື່ອງຄອມພິວເຕີທີ່ໄວທີ່ສຸດໃນໂລກຄືເຄື່ອງ”ທຽນເຫີ”ຂອງຈີນ ທີ່ກ້າວຂຶ້ນຄອງບັນລັງນີ້ຕັ້ງແຕ່ປີ 2013 ເອົາຊະນະເຄື່ອງ”ໄຕຕັນ”ຂອງສະຫາຣັດອາເມຣິກາໄປໄດ້ ແລະໂອບາມາກໍເຊື່ອວ່າເຖິງເວລາແລ້ວທີ່ອະເມຣິກາຈະທວງບັນລັງຄືນຈາກຈີນ
ວັນທີ່ 29 ກໍລະກົດທີ່ຜ່ານມາ ໂອບາມ່າໄດ້ເຊັນຄຳສັ່ງໃນແຜນງານຍຸດທະສາດດ້ານຄອມພິວເຕີແຫ່ງຊາດ ເພື່ອສ້າງຊູບເປີຄອມພິວເຕີທີ່ໄວທີ່ສຸດໃນໂລກແລ້ວ
ກະຊວງການຕ່າງປະເທດ ແລະ ພະລັງງານ ສະຫາຣັດອະເມຣິກາ ຮ່ວມກັບສຳນັກງານວິທະຍາສາດແຫ່ງຊາດ ຈະເປັນກຳລັງຫລັກໃນການພັດທະນາຄອມພິວເຕີຄວາມໄວສູງນີ້ ໂອບາມ່າລະບຸໄວ້ໃນຄຳປະກາດວ່າຄອມພິວເຕີເຄື່ອງນີ້ຈະຊ່ວຍເພີ່ມຄວາມສາມາດໃນການແຂ່ງຂັນແລະນຳໄປໃຊ້ໃນງານດ້ານວິທະຍາສາດຕໍ່ໄປ
ຊູບເປີຄອມພິວເຕີເປັນເຄື່ອງມືອະເໜກປະສົງທີ່ສາມາດນຳໄປໃຊ້ງານໄດ້ຫລາກຫລາຍ ມີຄວາມສຳຄັນຕໍ່ຄວາມຫມັ້ນຄົງຂອງປະເທດ ຕະຫລອດຈົນການພັດທະນາເສດຖະກິດຂອງຊາດດ້ວຍ ນັກວິທະຍາສາດສະຫາຣັດອາເມຣິກາຈະສາມາດເຂົ້າເຖິງຊູບເປີຄອມພິວເຕີເຄື່ອງໃໝ່ນີ້ໃນການວິໄຈໃນຫລາຍໆສາຂາຕັ້ງແຕ່ດ້ານພະລັງງານນິວເຄຍໄປຈົນເຖິງການຕິດຕາມການປ່ຽນແປງສະພາບອາກາດ
ນັບເປັນເທື່ອທຳອິດທີ່ຈະມີການພັດທະນາຄອມພິວເຕີລະດັບ “ເອກຊາກຽວ” ຂຶ້ນ ຊຶ່ງຈະໄວກວ່າຄອມພິວເຕີທີ່ໃຊ້ກັນຢູ່ໃນປະຈຸບັນເຖິງ 30 ເທົ່າ
ຄອມພິວເຕີເຄື່ອງໃໝ່ຈະສາມາດປະມວນຜົນໄດ້ 1 “ເອກຊາລອບ” ຫລືເກືອບ 1 ລ້ານລ້ານລ້ານ ຄຳສັ່ງຕໍ່ວິນາທີ ສ່ວນເຄື່ອງທຽນເຫີ 2 ທີ່ໄວສຸດໃນປະຈຸບັນນັ້ນສາມາດປະມວນຜົນໄດ້ລະດັບ 38,860 ລ້ານລ້ານຄຳສັ່ງຕໍ່ວິນາທີ
ສຳລັບເຄື່ອງໄຕຕັນທີ່ຕອນນີ້ຢູ່ອັນດັບ 2 ຂອງໂລກຢູ່ນັ້ນ ຕັ້ງຢູ່ທີ່ສູນວິໄຈແຫ່ງຊາດໂອກິດຈ໌ ທີ່ເທນເນດຊີ ກິນພະລັງງານໄຟຟ້າເກືອບ 10 ເມກາວັດ ຫລື ເກືອບ 2000 ເທົ່າຂອງຄອມພິວເຕີສ່ວນບຸກຄົນທີ່ເຮົາໃຊ້ກັນໃນປະຈຸບັນນີ້ ຄອມພິວເຕີທີ່ມີຮາດແວລ໌ ແລະ ຊອບແວລ໌ ຄວາມໄວສູງກວ່ານີ້ກໍຈະຍິ່ງກິນພະລັງງານໄຟຟ້າຫລາຍກວ່ານີ້
ໃນເບື້ອງຕົ້ນ ເທກໂນໂລຍີນີ້ຈະມີຜູ້ໃຊ້ 5 ລາຍໄດ້ແກ່ ນາຊ່າ ເອັບບີໄອ ກົມອຸຕຸນິຍົມວິທະຍາ (ໂນອາ) ສະຖາບັນສຸຂະພາບແຫ່ງຊາດ ແລະ ສະຖາບັນຄວາມຫມັ້ນຄົງແຫ່ງມາຕຸພູມ ຊຶ່ງຈະຮ່ວມອອກແບບແລະທົດສອບລະບົບໃນຂັ້ນຕອນທຳອິດ ເພື່ອໃຫ້ສອດຄ້ອງກັບຈຸດປະສົງໃນການໃຊ້ງານ
ໂຄງການນີ້ມີເວລາ 90 ມື້ນັບຕັ້ງແຕ່ອອກປະກາດເພື່ອການຮ່າງແຜນການດຳເນີນງານ ແມ່ນຈະຍັງບໍ່ຮູ້ມື້ກຳນົດສຳເລັດສິ້ນທີ່ຊັດເຈນແຕ່ນັກວິໄຈຈະຕ້ອງລາຍງານຄວາມຄືບໜ້າທຸກປີຕະຫລອດ 5 ປີຂ້າງໜ້າ