ທ່າມ​ກາງ​ກະ​ແສ​ຮື​ຮາ​ກັບ​ຂ່າວ​ການ​ສຳຫ​ລວດ​ດາວ​ພູ​ໂຕຂອງ​ຍານ New Horizons ທີ່​ຫາກໍ່​ມີ​ລາຍ​ການ​ຖ່າຍ​ທອດ​ສົດ​ໄລຍະເວລາ​ທີ່​ຍານ​ເດິນທາງ​ເຂົ້າ​ໃກ້​ດາວ​ພູ​ໂຕ​ຫລາຍ​ທີ່ສຸດ​ພ້ອມ​ສົ່ງ​ຮູບ​ຖ່າຍ​ດາວ​ພູ​ໂຕ​ກັບ​ມາ​ໃຫ້​ຊາວ​ໂລກ​ໄດ້​ຊົມ ມີ​ຄວາມ​ຈິງ​ທີ່​ໜ້າ​ສົນ​ໃຈທີ່​ວ່າ​ການເຮັດວຽກ​ຂອງ New Horizons ນີ້​ອາໄສ​ການ​ຄວບ​ຄຸມ​ໂດຍ​ຊີ​ພີ​ຍູ MIPS R3000 ລຸ້ນ​ດຽວ​ກັນ​ກັບ​ທີ່​ໃຊ້​ໃນ​ເຄື່ອງ​ຫລິ້ນ​ເກມ PS1 ຂອງ Sony

           ຊີ​ພີ​ຍູ MIPS R3000 ນີ້​ຖືກ​ພັດທະນາ​ຂຶ້ນ​ມາ​ເພື່ອ​ໃຊ້​ງານ​ກັບ​ເຄື່ອງ​ຫລິ້ນ​ເກມ​ຄອນ​ໂຊນ​ລຸ້ນ​ທຳອິດຂອງ Sony ໃນ​ປີ 1994 ຕໍ່​ມາ NASA ໄດ້​ຕັດ​ສິນ​ໃຈ​ຊື້​ລິຂະສິດ​ໃນ​ການ​ໃຊ້​ງານ​ຊີ​ພີ​ຍູ​ລຸ້ນ​ທີ່​ວ່າ​ນີ້​ໃນ​ປີ 2006 (ເຮັດວຽກ​ສົ່ງ​ຍານ New Horizons ອອກເດິນທາງ) ຊຶ່ງ​ເຫດຜົນ​ທີ່ NASA ຕັດ​ສິນໃຈ​ເລືອກ​ໃຊ້​ຊີ​ພີ​ຍູ​ລຸ້ນ​ນີ້ ເຖິງວ່າ​ເທກ​ໂນ​ໂລ​ຍີ​ຂອງ​ມັນ​ຈະ​ມີ​ອາ​ຍຸ​ມາ​ດົນ​ກວ່າ 10 ປີ ເປັນ​ເພາະ NASA ເນັ້ນ​ເລືອກ​ໃຊ້​ງານ​ອຸປະກອນ​ຕ່າງໆ ທີ່​ໄດ້ຮັບ​ການ​ພິສູດ​ຈາກ​ການ​ໃຊ້​ງານ​ຈິງ​ຢ່າງ​ແພ່​ຫລາຍ​ມາ​ເປັນ​ໄລ​ຍະ​ເວລາ​ດົນ​ວ່າ​ມັນ​ສາມາດ​ເຮັດວຽກ​ໄດ້​ດີ​ແລະ​ມີ​ຄວາມສະຖຽນ ແລະ​ມີ​ອາ​ຍຸ​ການ​ໃຊ້​ງານ​ທີ່​​ທົນ​ພຽງ​ພໍ ຊຶ່ງ​ເຄື່ອງ PS1 ກໍ​ເປັນ​ຫລັກ​ຖານ​ຢ່າງ​ດີ​ທີ່​ພິສູດ​ເຖິງ​ປະ​ສິດ​ທິ​ພາບ​ໃນ​ການ​ໃຊ້​ງານ​ແລະ​ຄວາມ​ເຊື່ອ​ຖື​ໄດ້​ຂອງ​ຊີ​ພີ​ຍູ MIP R3000 ນີ້

           ຫລັງ​ຈາກການເດິນທາງ​ອັນ​ຍາວນານ​ເຖິງ 9 ປີ ດ້ວຍ​ຄວາມ​ໄວ​ສູງ​ກວ່າ 58,500 ກິ​ໂລ​ແມັດ​ຕໍ່​ຊົ່ວ​ໂມງ ຍານ New Horizons ກໍ​ເດິນທາງ​ເຂົ້າ​ໃກ້​ດາວ​ພູ​ໂຕ​ເພື່ອ​ເຮັດວຽກ​ສຳ​ຫລວດ​ໄດ້​ຕາມ​ແຜນ ແລະ​ຊີ​ພີ​ຍູ MIP R3000 ກໍ​ໄດ້​ພິສູດ​ຕົວ​ເອງ​ໃຫ້​ເຫັນ​ແລ້ວ​ວ່າ NASA ຕັດ​ສິນ​ໃຈ​ບໍ່​ຜິດ​ທີ່​ເລືອກ​ໃຊ້​ງານ​ມັນ