ໃຜເປັນນັກບິນອາວະກາດທີ່ຝັນຈະອອກໄປສຳຫລວດນອກໂລກ ຕ້ອງທຳໃຈໄວ້ກ່ອນ ບ່ອນທີ່ວ່າຢູ່ໃນຢານອາວະກາດຄືຊິບໍ່ມີອາຫານສົດໆ ໃໝ່ໆ ໄວ້ກິນຄືຢູ່ໂລກ ແຕ່ຫລ້າສຸດນາຊ່າກໍໄດ້ເປີດປະຫວັດສາດໜ້າໃໝ່ໃນການໃຊ້ຊີວິດຢູ່ອາວະກາດ ເມື່ອນັກບິນສາມາດປູກຜັກສົດໆ ໄວ້ກິນເອງໃນອາວະກາດໄດ້ແລ້ວ
ເວັບໄຊຕ໌ມິເລີລ໌ ເຜີຍໃນວັນທີ່ 10 ສິງຫາ 2015 ວ່າ ນັກບິນອາວະກາດເທິງສະຖານີອາວະກາດນານາຊາດ (ISS) ສາມາດປູກຜັກກາດເລດໂລເມນໄດ້ສຳເລັດ ແລະກາຍເປັນນັກບິນອາວະກາດຊຸດທຳອິດທີ່ໄດ້ລອງລົດຊາດຜັກອາວະກາດ ຢ່າງໃດກໍດີບັນດານັກບິນຕ້ອງໃຊ້ຜ້າຊຸບກົດຊິຕິກເຊັດໃບຜັກກ່ອນກິນ
ສຳລັບຜັກອາວະກາດນີ້ ຖືກປູກອຸປະກອນທີ່ເອີ້ນວ່າ “Veggie” ມີລັກສະນະເປັນກ່ອງສີ່ຫລ່ຽມ ຂະໜາດກວ້າງ 11.5 ນິ້ວ ຍາວ 14.5 ນິ້ວ ມີຖາດສຳລັບວາງຖົງເພາະພັນ ແລະດ້ານເທິງຕິດຫລອດໄຟ LED ທີ່ໃຫ້ແສງສີແດງ ນ້ຳເງີນ ແລະຂຽວ ຊຸດປູກຜັກຍັງພັບເກັບໄດ້ ເຮັດໃຫ້ບໍ່ເປືອງພື້ນທີ່ໃນຢານອາວະກາດເວລາທີ່ບໍ່ໄດ້ໃຊ້ງານ
ນາຊ່າຄາດຫວັງວ່າ ການປູກຜັກອາວະກາດໄດ້ຈະເປັນປະໂຫຍດຕໍ່ການທີ່ນັກບິນຕ້ອງໄປປະຕິບັດພາລະກິດກາງອາວະກາດເປັນເວລາດົນ ນອກຈາກຈະຊ່ວຍໃຫ້ນັກບິນມີຜັກສົດໆ ກິນແລ້ວ ກໍຍັງເປັນກິດຈະກຳຜ່ອນຄາຍໃນຮູບແບບຂອງການຈັດສວນໃຫ້ກັບນັກບິນໄດ້ອີກດ້ວຍ
