ທຸກມື້ນີ້ບັດປະຈຳຕົວພະນັກງານມັກຈະມີຊິບ RFID ຢູ່ພາຍໃນ ຊຶ່ງຊ່ວຍເພີ່ມຄວາມສະດວກໃນການຢືນຢັນສິດ ຫລື ຢືນຢັນຕົວຕົນຂອງພະນັກງານດ້ວຍການໃຊ້ບັດດັ່ງກ່າວກັບເຄື່ອງກວດຈັບເພື່ອຜ່ານເຂົ້າອອກສະຖານທີ່ບາງແຫ່ງ ຫລື ປົດລັອກອຸປະກອນບາງຢ່າງເພື່ອໃຊ້ງານ ຊຶ່ງມັນກໍເຮັດໃຫ້ຊີວິດປະຈຳວັນຂອງເຮົາສະດວກຫລາຍຂຶ້ນ ແຕ່ຖ້າຫາກລືມບັດເດ ຈະເຮັດຈັ່ງໃດ?
ບັນຫານີ້ຈະບໍ່ເກີດຂຶ້ນກັບພະນັກງານຂອງບໍລິສັດ Epicenter ຊຶ່ງເປັນບໍລິສັດແຫ່ງໜຶ່ງໃນປະເທດສະວີເດນ ຊຶ່ງພວກເຂົາໃຫ້ພະນັກງານຝັງຊິບ RFID ໄວ້ໃຕ້ຜິວໜັງເພື່ອໃຊ້ສະແກນສຳລັບການຜ່ານເຂົ້າອອກປະຕູ ແລະປົດລັອກເຄື່ອງຖ່າຍເອກະສານເມື່ອຕ້ອງການຈະໃຊ້ງານ ໂດຍໃນອະນາຄົດຈະມີການເພີ່ມບໍລິການໃຫ້ໃຊ້ງານຊິບດັ່ງກ່າວເພື່ອຈ່າຍເງິນຊື້ອາຫານໃນຮ້ານຄ້າພາຍໃນເຂດຂອງບໍລິສັດໄດ້ນຳອີກ
.jpg)
ຊິບ RFID ນີ້ມີຂະໜາດໃຫຍ່ກວ່າເມັດເຂົ້າ ມັນຈະຖືກຝັງໄວ້ໃຕ້ຜິວໜັງບໍລິເວນງ່າມນິ້ວລະຫວ່າງນິ້ວໂປ້ມື ແລະ ນິ້ວຊີ້ຂອງນັກງານ ເມື່ອຕ້ອງການຜ່ານເຂົ້າອອກພື້ນທີ່ຊຶ່ງມີການກວດຊິບ ຫລື ຈະໃຊ້ເຄື່ອງຖ່າຍເອກະສານ ພວກເຂົາກໍພຽງແຕ່ເອົາມືວາງໄວ້ບໍລິເວນເຊັນເຊີກວດຊິບກໍເປັນອັນຮຽບຮ້ອຍ (ແຕ່ບາງທີກໍອາດຕ້ອງບິດມືທ່າທາງແປກໆກ່ອນເພື່ອໃຫ້ຊິບຢູ່ຕຳແໜ່ງເພື່ອໃຫ້ຊິບເຮັດວຽກ) ນອກເໜືອຈາກໃຊ້ເພື່ອຢືນຢັນຕົວຕົນແລ້ວ ພະນັກງານອາດເລືອກໃສ່ຂໍ້ມູນເພິ່ມເຕີມລົງໃນຊິບໄດ້ ບາງລາຍອາດໃສ່ຂໍ້ມູນນາມບັດຂອງຕົນເອງໄວ້ໃນຊິບຕົວດຽວກັນອີກ
ໂຄງການຝັງຊິບຂອງບໍລິສັດ Epicenter ນີ້ເປັນໂຄງການຕາມຄວາມສະໝັກໃຈ ບໍ່ໄດ້ບັງຄັບ ພະນັກງານບາງສ່ວນກໍບໍ່ຢາກຈະໃຫ້ມີຫຍັງແປກປອມຢູ່ໃນຮ່າງກາຍ ໃນຂະນະທີ່ອີກສ່ວນກັບກະຕືລືລົ້ນແລະເຝົ້າລໍຄອຍຖ້າໂອກາດທີ່ຈະໄດ້ຝັງຊິບຢ່າງໃຈຈົດໃຈຈໍ່