ເນື່ອງຈາກພາຍຫລັງມີຂ່າວກ່ຽວກັບ ເຫດລະເບີດຢູ່ໃຈກາງນະຄອນຫລວງບາງກອກ (ກຸງເທບ) ປະເທດໄທ ໃນມື້ວັນທີ 17 ສິງຫາ 2015 ຜ່ານມານີ້ ແລ້ວໄດ້ມີການແຊຣ໌ຂໍ້ມູນຂ່າວທີ່ມີເນື້ອໃນລະບຸວ່າ ” ນີ້ແມ່ນໜຶ່ງໃນຄົນລາວທີ່ເສຍຊີວິດ ກັບເຫດການວາງລະເບີດທີ່ແຍກຣາຊະປະສົງ ບາງກອກ ປະເທດໄທ ໃນເວລາ 19 ໂມງປາຍຂອງວັນທີ 17 ສິງຫາ 2015 ແມ່ນ ນາງ ໝວຍ ລິດທິໄຊ ອາຍຸ 17 ປີ ທ່ານໃດຮູ້ຈັກຜູ້ກ່ຽວ ຫລື ຄອບຄົວຜູ້ກ່ຽວ ຊ່ວຍສົ່ງຂ່າວຫາຜູ້ປົກຄອງຂອງລາວແດ່ ” ພ້ອມທັງລະບຸເບີໂທລະສັບຕິດຕໍ່ເຈົ້າໜ້າທີ່ຢູ່ໄທໃສ່ພ້ອມ ໂດຍອ້າງແຫລ່ງຂ່າວຈາກເພຈຊື່ດັງແຫ່ງໜຶ່ງ.
ຜ່ານການກວດສອບຂອງທີມຂ່າວລາວໂພສຕ໌ ແມ່ນພົບວ່າ ຂ່າວດັ່ງກ່າວນີ້ແມ່ນມີແຫລ່ງທີ່ມາຈາກເພຈ ດັ່ງກ່າວ ແທ້ຈິງ ແຕ່ຫາກເປັນຂ່າວເກົ່າ ທີ່ເກີດຂຶ້ນຜ່ານມາແຕ່ປີກາຍນີ້ ໂດຍທີມງານຂ່າວຂອງ ເພຈດັ່ງກ່າວ ໄດ້ໂພສຕ໌ລົງທາງເພຈຂອງຕົນ ຕັ້ງແຕ່ມື້ວັນທີ 1 ພະຈິກ 2014 ຜ່ານມາ ຊຶ່ງເຫັນວ່າ ບໍ່ມີສ່ວນກ່ຽວຂ້ອງກັນກັບເຫດລະເບີດຢູ່ 4 ແຍກຣາຊະປະສົງ ບາງກອກ ປະເທດໄທ ໃນມື້ວານນີ້ແຕ່ປະການໃດ. ພ້ອມກັນນັ້ນ, ຜ່ານການກວດສອບແຫລ່ງຂ່າວຈາກປະເທດໄທຫລາຍແຫລ່ງ ກໍຍັງບໍ່ພົບມີການລະບຸເຖິງຄົນລາວ ທີ່ເສຍຊີວິດຈາກເຫດການດັ່ງກ່າວນີ້ເທື່ອ ແຕ່ຫາກມີບຸກຄົນຈຳນວນໜຶ່ງທີ່ອາດເຂົ້າໃຈຜິດ ຄິດວ່າແມ່ນເຫດການດຽວກັນ ແລ້ວແຊຣ໌ຂ່າວເກົ່າດັ່ງກ່າວຕໍ່ແບບມົ້ວໆ ໂດຍການແຊຣ໌ຕໍ່ຂໍ້ມູນທີ່ບໍ່ຖືກຕ້ອງຄືດັ່ງກ່າວນີ້ ອາດສ້າງຄວາມເຂົ້າໃຈຜິດໃຫ້ແກ່ສັງຄົມໄດ້.
ສະນັ້ນ, ການເສບຂໍ້ມູນຂ່າວສານຜ່ານສື່ສັງຄົມອອນລາຍຕ່າງໆ ແມ່ນຈະຕ້ອງໄດ້ມີສະຕິ ແລະ ໃຊ້ວິຈາລະນະຍານໃນການວິເຄາະຂໍ້ມູນຂ່າວສານໃຫ້ຈະແຈ້ງເສຍກ່ອນ ເພາະຖ້າຫາກມີການແຊຣ໌ຕໍ່ຂໍ້ມູນທີ່ບໍ່ມີມູນຄວາມຈິງ ແມ່ນອາດເຂົ້າຂ່າຍມີຄວາມຜິດຕໍ່ລະບຽບກົດໝາຍ ຂອງ ສປປ ລາວ ໄດ້.
