ຂປລ. ພາຍຫລັງ ທ່ານ ດຣ. ບຸນປອນ ບຸດຕະນະວົງ ຮອງນາຍົກລັດຖະມົນຕີ, ຜູ້ຊີ້ນຳວຽກງານ ເສດຖະກິດມະຫາພາກ ແລະ ບໍລິການ ພ້ອມດ້ວຍຄະນະ ສຳເລັດການ ເຄື່ອນໄຫວຢ້ຽມຢາມ ແລະ ເຮັດວຽກຢູ່ ແຂວງອັດຕະປື ຕໍ່ມາໃນວັນທີ 14 ສິງຫາ 2015 ທ່ານຮອງນາຍົກລັດຖະມົນຕີ ກໍ່ໄດ້ສືບຕໍ່ເຄື່ອນໄຫວເຮັດວຽກ ແລະ ພົບປະພະນັກງານຫລັກແຫລ່ງ ພ້ອມບັນດາປະຊາຊົນ ຢູ່ແຂວງເຊກອງ ເຊິ່ງມີ ທ່ານ ຄໍາເຜີຍ ບຸດດາວຽງ ເຈົ້າແຂວງໆເຊກອງ ພ້ອມຄະນະນຳແຂວງ ແລະ ເຈົ້າເມືອງ ໃຫ້ການຕ້ອນຮັບຢ່າງອົບອຸ່ນ.
ການ ເຄື່ອນໄຫວຢ້ຽມຢາມ ແຂວງເຊກອງຄັ້ງນີ້, ທ່ານ ຄໍາເຜີຍ ບຸດດາວຽງ ໄດ້ລາຍງານໃຫ້ຊາບ ກ່ຽວກັບຜົນສໍາເລັດ ກອງປະຊຸມໃຫຍ່ ອົງຄະນະພັກແຂວງເຊກອງ ຄັ້ງທີ IX ໃຫ້ທ່ານຮອງນາຍົກ ລັດຖະມົນຕີຊາບວ່າ ປັດຈຸບັນ ໄດ້ມີການແບ່ງໜ້າທີ່ ຄວາມຮັບຜິດຊອບ ພາຍໃນຄະນະພັກແຂວງ ຢ່າງຈະແຈ້ງ ພ້ອມທັງ ລາຍງານສະພາບການ ພັດທະນາ ເສດຖະກິດ ສັງຄົມຂອງແຂວງ ໃນໄລຍະຜ່ານມາ. ໃນໂອກາດດັ່ງກ່າວ ທ່ານ ຮອງນາຍົກລັດຖະມົນຕີ ໄດ້ມີຄໍາເຫັນ ແລະ ໃຫ້ທິດຊີ້ນໍາ ຕໍ່ແຂວງເຊກອງ ເປັນຕົ້ນ ຕ້ອງນໍາເອົາມະຕິຂອງກອງປະຊຸມໃຫຍ່ອົງຄະນະພັກແຂວງໃນຄັ້ງນີ້ ໄປເຜີຍແຜ່ເຊື່ອມຊຶມ ຢູ່ແຕ່ລະເມືອງ, ແຕ່ລະຂະແໜງການຕ່າງໆໂດຍໄວ ເພື່ອໃຫ້ເຂົາເຈົ້າມີຄວາມເຂົ້າໃຈ ແລະ ພ້ອມກັນຈັດຕັ້ງ ຜັນຂະຫຍາຍໃຫ້ເປັນແຜນການ, ແຜນງານ ແລະ ໂຄງການອັນລະອຽດ ທີ່ຢູ່ໃນຂົງເຂດ ຄວາມຮັບຜິດຊອບຂອງຕົນ; ສໍາລັບດ້ານການພັດທະນາ: ໃຫ້ເອົາໃຈໃສ່ ຂຸດຄົ້ນທ່າແຮງບົ່ມຊ້ອນຂອງແຂວງ ໃຫ້ເກີດຜົນປະໂຫຍດສູງສຸດ ເປັນຕົ້ນການເປັນແຂວງທາງຜ່ານ ຕ້ອງຮູ້ນໍາໃຊ້ ຊັບພະຍາກອນທໍາມະຊາດ ໃຫ້ມີປະສິດທິຜົນ ແລະ ມີການຄຸ້ມຄອງທີ່ດີ, ກ້າຫັນປ່ຽນຈິນຕະນາການ ໄປສູ່ການປ່ຽນແປງອັນໃໝ່ ຕາມແນວທາງທີ່ພັກ ແລະ ລັດຖະບານວາງອອກ, ຊຸກຍູ້ສົ່ງເສີມການຜະລິດ ຂອງປະຊາຊົນ ຕິດພັນກັບ ອຸດສາຫະກໍາປຸງແຕ່ງ ຫລື ກາຍເປັນອຸດສາຫະກໍາ ທີ່ຕິດພັນກັບເຕັກນິກວິທະຍາສາດ. ພ້ອມດຽວກັນນັ້ນ, ກໍ່ໃຫ້ເອົາໃຈໃສ່ດຶງດູດ ການລົງທຶນພາຍໃນແຂວງ ໃຫ້ສູງຂຶ້ນ ໂດຍການສ້າງເງື່ອນໄຂ ແລະ ອໍານວຍຄວາມສະດວກ ໃຫ້ແກ່ນັກລົງທຶນ ເປັນຕົ້ນ ການຜະລິດອຸດສາຫະກໍາປຸງແຕ່ງ ໂດຍໃຫ້ປະຊາຊົນໄດ້ມີສ່ວນຮ່ວມ ເພື່ອສ້າງອາຊີບ ແລະ ສ້າງວຽກເຮັດງານທໍາ ໃຫ້ປະຊາຊົນແຂວງເຊກອງ ມີຊີວິດການເປັນຢູ່ທີ່ດີຂຶ້ນ, ຈັດສັນທີ່ຢູ່ອາໃສ ແລະ ອາຊີບທີ່ໝັ້ນຄົງໃຫ້ປະຊາຊົນ ໄປພ້ອມໆກັບການ ເອົາໃຈໃສ່ຄຸ້ມຄອງ ແລະ ຕິດຕາມກວດກາບັນດາ ໂຄງການລົງທຶນຕ່າງໆ ພາຍໃນແຂວງ ໃຫ້ມີປະສິດທິຜົນ.
ໃນມື້ດຽວກັນນີ້ ທ່ານຮອງນາຍົກ ລັດຖະມົນຕີ ຍັງໄດ້ຢ້ຽມຢາມໂຄງການ ຜະລິດເປັນສິນຄ້າພາຍໃນ ແຂວງເຊກອງຕື່ມອີກ ເປັນຕົ້ນ ໂຄງການປູກໜໍ່ໄມ້ຝຣັ່ງ ທີ່ຕັ້ງຢູ່ບ້ານຄໍາກອກ, ເມືອງທ່າແຕງ ຂອງບໍລິສັດກ້າວໜ້າການກະເສດ ຈໍາກັດ ເຊິ່ງການໂຄງການດັ່ງກ່າວ ໄດ້ເລີ່ມຈັດຕັ້ງປະຕິບັດມາແຕ່ປີ 2007 ມີໄລຍະສໍາປະທານ 20 ປີໃນເນື້ອທີ່ 62 ເຮັກຕ້າ. ສໍາລັບການປູກໜໍ່ໄມ້ຝຣັ່ງນີ້ ສ່ວນໃຫຍ່ຈະສົ່ງອອກຂາຍ ໄປປະເທດຢີ່ປຸນ ປະຈຸບັນແມ່ນມີຄວາມຕ້ອງການສູງ ແຕ່ເຫັນວ່າຍັງບໍ່ສາມາດ ຕອບສະໜອງກັບຄວາມຕ້ອງການໄດ້ພຽງພໍ, ໂດຍສະເລ່ຍສາມາດເກັບໄດ້ 600 ກິໂລກຣາມຕໍ່ມື້ ສໍາລັບລາຄາສົ່ງອອກຂາຍຕ່າງປະເທດ 50.000 ກີບ/ກິໂລ, ຂາຍພາຍໃນ 15.000-20.000 ກີບ/ກິ ໂລ, ແນວພັນແມ່ນນໍາມາຈາກ ປະເທດອາເມລິກາ, ປະຈຸບັນມີຈໍານວນພະນັກງານທັງໝົດ 220 ຄົນ ມີລາຍໄດ້ສະເລ່ຍ 800.000-1.000.000 ກວ່າກີບຕໍ່ເດືອນ ແລະ ຍັງສືບ ຕໍ່ຢ້ຽມຢາມໂຄງການ ສົ່ງເສີມການຜະລິດ ກຸ່ມລ້ຽງໝູ, ເປັດ, ໄກ່ ແລະ ປາ ເປັນສິນຄ້າ ທີ່ຕິດພັນກັບການສົ່ງເສີມ ການຕະຫລາດ ແລະ ເປັນຜູ້ບໍລິການ ເມືອງລະມາມ ແລະ ເມືອງທ່າແຕງ ທີ່ຕັ້ງຢູ່ບ້ານ ໜອງຫວ້າ, ເມືອງລະມາມ ແຂວງເຊກອງ.
ຂອບໃຈຂ່າວຈາກ:
