ຂປລ. ໃນວັນທີ 17 ສິງຫາ 2015 ນີ້, ຄະນະພັກກະຊວງການເງິນ ໄດ້ຈັດກອງປະຊຸມທາບທາມ ເພື່ອຄັດເລືອກເອົາບຸກຄະລາກອນ ເຂົ້າສະໝັກເລືອກຕັ້ງ ເປັນຄະນະພັກຊຸດໃໝ່ ເຊິ່ງລາຍຊື່ ຜູ້ສະໝັກທັງໝົດ 23 ສະຫາຍ ໃນນັ້ນ ເລືອກເອົາ 19 ສະຫາຍ ທີ່ມີເງື່ອນໄຂຄົບຖ້ວນສົມບູນ ໂດຍມີທ່ານ ດຣ. ລຽນ ທິແກ້ວ ກຳມະການສູນກາງພັກ ເລຂາຄະນະພັກ ລັດຖະມົນຕີວ່າການ ກະຊວງການເງິນ ເຂົ້າຮ່ວມ.
ໂອກາດດັ່ງກ່າວ, ທ່ານ ດຣ. ລຽນ ທິແກ້ວ ໄດ້ຂຶ້ນຜ່ານມາດຖານ ແລະ ເງື່ອນໄຂ ຜູ້ທີ່ມີສິດສະໝັກເຂົ້າເປັນ ຄະນະພັກກະຊວງການເງິນຊຸດໃໝ່ ເຊິ່ງມີເງື່ອນໄຂຕ່າງໆ ເປັນຕົ້ນ ດ້ານຄຸນທາດການເມືອງ ຕ້ອງມີທັດສະນະ ການເມືອງໜັກແໜ້ນ, ເຊື່ອໝັ້ນຕໍ່ອຸດົມການຂອງພັກ, ມີຄວາມບໍລິສຸດຕໍ່ປະເທດຊາດ, ຕໍ່ປະຊາຊົນ, ຕໍ່ໜ້າທີ່, ມີນ້ຳໃຈເສຍສະຫລະເພື່ອປະເທດຊາດ, ເພື່ອປະຊາຊົນ ດ້ວຍຄວາມບໍລິສຸດຜຸດຜ່ອງ; ດ້ານຄຸນສົມບັດສິນທຳປະຕິວັດ ຕ້ອງມີຄວາມສາມັກຄີຮັກແພງ, ຊື່ສັດບໍລິສຸດຕໍ່ການຈັດຕັ້ງ, ຕໍ່ສະມາຊິກ ແລະ ມີຄວາມຜູກພັນ ຢ່າງສະໜິດແໜ້ນ ກັບມະຫາຊົນ ແລະ ປະຊາຊົນ, ມີແບບແຜນການດຳລົງຊີວິດ ທີປອດໃສຂາວສະອາດ, ບໍ່ຟຸມເຟືອຍ, ສະແຫວງຫາຄວາມກ້າວໜ້າ ໃສ່ຕົນເອງ, ກ້າເຮັດ, ກ້າຮັບຜິດຊອບ ແລະ ຕັດສິນໃຈປ່ຽນແປງແກ້ໄຂ, ດ້ານຄວາມຮູູ້ຄວາມສາມາດ, ຕ້ອງມີຄວາມຮູ້ທາງດ້ານ ທິດສະດີການເມືອງ, ຮູ້ເຮັດວຽກ ກໍ່ສ້າງພັກ-ກໍ່ສ້າງ ພະນັກງານ, ຮູ້ຈັດຕັ້ງນຳພາສະມາຊິກ, ພະນັກງານ ແລະ ປະຊາຊົນບັນດາເຜົ່າ, ປະຕິບັດແນວທາງ ນະໂຍບາຍຂອງພັກ ແລະ ແຜນພັດທະນາ ເສດຖະກິດ-ສັງຄົມ ທີ່ວາງອອກແຕ່ລະໄລຍະ, ກຳແໜ້ນແນວທາງ ນະໂຍບາຍຂອງພັກ ແລະ ກົດໝາຍຂອງລັດ ແລະ ດ້ານແບບແຜນວິທີເຮັດວຽກ ຕ້ອງມີແບບແຜນວິທີເຮັດວຽກທີ່ຖືກຕ້ອງ, ມີແບບແຜນລວມສູນ ປະຊາທິປະໄຕ, ແບບຄວາມຮັບຜິດຊອບ, ມີການກວດກາສ່ອງແສງລາຍງານ ໃຫ້ໄດ້ຮັບຄວາມເຊື່ອຖື ແລະ ອື່ນໆ.
ໃນວັນດຽວກັນ, ທ່ານ ສີລາ ວຽງແກ້ວ ລັດຖະມົນຕີຊ່ວຍວ່າການ ກະຊວງການເງິນ ກໍໄດ້ໃຫ້ກຽດຂຶ້ນເຜີຍແຜ່ ວັນຍຶດອຳນາດ 23 ສິງຫາ ໃຫ້ກັບບັນດາ ຄະນະພັກ-ຄະນະນຳ, ຫົວໜ້າກົມ-ຮອງກົມ ຕະຫລອດຮອດ ພະນັກງານວິຊາການ ພາຍໃນກະຊວງການເງິນ ໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງ ກ່ຽວກັບວັນດັ່ງກ່າວ.
ຂອບໃຈຂ່າວຈາກ:
