ຂປລ. ກອງປະຊຸມໃຫຍ່ ຄັ້ງທີ X ຂອງອົງຄະນະພັກແຂວງ ຜົ້ງສາລີໄດ້ອັດລົງດ້ວຍຜົນສໍາເລັດຢ່າງຈົບງາມ ໃນຕອນເຊົ້າວັນທີ 12 ສິງຫາ 2015 ນີ້ ຢູ່ຫໍວັດທະນະທໍາແຂວງຜົ້ງສາລີ ພາຍຫລັງກອງປະຊຸມໄດ້ດໍາເນີນເປັນເວລາ 3 ວັນເລີ່ມແຕ່ວັນ ທີ 10-12 ສິງຫາ 2015 ໂດຍເປັນກຽດເຂົ້າຮ່ວມຂອງສະຫາຍ ສົມສະຫວາດ ເລັ່ງສະຫວັດ ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ ແລະ ເປັນປະທານຂອງສະຫາຍ ຄໍາເຈນ ວົງໂພສີ ກໍາມະການສູນກາງພັກ, ເລຂາພັກແຂວງ ຜົ້ງສາລີ, ມີຜູ້ແທນສົມບູນເຂົ້າຮ່ວມ 268 ສະຫາຍ ຍິງ 37 ສະຫາຍ, ເປັນຕົວແທນໃຫ້ແກ່ສະມາຊິກພັກໃນທົ່ວແຂວງ ທັງໝົດ 9.044 ສະຫາຍ ແລະ ແຂກຖືເຊີນເຂົ້າຮ່ວມຢ່າງພ້ອມພຽງ.
ກອງປະຊຸມໃຫຍ່ຄັ້ງນີ້ ໄດ້ປະກອບຄໍາຄິດຄໍາເຫັນ ແລະ ຮັບຮອງ ເອົາບົດລາຍງານການເມືອງຂອງຜູ້ແທນ ແລະ ແຜນພັດທະນາເສດຖະກິດ-ສັງຄົມ 5 ປີຄັ້ງທີ VIII ແຕ່ປີ 2016-2020 ຂະນະທີ່ ສະຫາຍ ຄໍາເຈນ ວົງໂພສີ ກໍາມະການສູນກາງພັກ ເລຂາພັກແຂວງ ເຈົ້າແຂວງຜົ້ງສາລີ ໄດ້ຜ່ານບົດລາຍງານວ່າ: ຕະຫລອດໄລຍະ 5 ປີແຫ່ງການຈັດຕັ້ງປະຕີບັດ ມະຕິ IX ຂອງ ພັກ ກໍຄືມະຕິກອງປະຊຸມ ໃຫຍ່ຂອງຄະນະພັກແຂວງ ໄດ້ມີຜົນສໍາເລັດ ໃນຫລາຍດ້ານ ໂດຍສະເພາະໃນຂອບເຂດທົ່ວແຂວງ ສືບຕໍ່ມີຄວາມສະຖຽນລະພາບທາງດ້ານການເມືອງ, ສັງຄົມມີຄວາມເປັນລະບຽບຮຽບຮ້ອຍໂດຍພື້ນຖານເສດຖະກິດ ໄດ້ຮັບການພັດທະນາ, ຂະຫຍາຍຢ່າງ ຕໍ່ເນືອງ ແລະ ຖືກທິດ, ຈັງຫວະການເຕີບໂຕຂອງເສດຖະກິດສະເລ່ຍປະມານ 9% ຕໍ່ປີ ໃນນັ້ນຂະແໜງກະສີກໍາ- ປ່າໄມ້ ເພີມຂຶ້ນນປະມານ 7% ອຸດສາຫະກໍາປະມານ 10% ລວມຍອດຜະລິດຕະພັນພາຍໃນສະເລ່ຍໃສ່ຫົວຄົນໃນປີ 2015 ໄດ້ 978 ໂດລາສະຫະລັດ, ຖັນ ແຖວຂອງພະນັກງານສະມາຊິກພັກ ໄດ້ຮັບການບຳລຸງ ແລະ ກໍ່ສ້າງເຕີບໃຫຍ່ເຂັ້ມແຂງຂຶ້ນ, ປະຊາຊົນບັນດາເຜົ່າມີຄວາມສາມັກຄີເປັນປຶກແຜ່ນ ແລະ ເຊື່ອໝັ້ນຕໍ່ການນຳພາຂອງພັກ, ຊີວິດການເປັນຢູ່ຂອງປະຊາຊົນບັນດາເຜົ່ານັບມື້ໄດ້ຮັບການແກ້ໄຂດີ ຂຶ້ນ, ໂດຍນຳໃຊ້ 4 ຂະແໜງການຫລັກ ຕິດພັນກັບ 4 ທາງອອກຂອງແຂວງ ເຂົ້າໃນການພັດທະນາ ແລະ ແກ້ໄຂຄວາມທຸກຍາກຂອງປະຊາຊົນບັນດາເຜົ່າ ມາ ຮອດປັດຈຸບັນຄອບຄົວທຸກຍາກໄດ້ຫລຸຸດລົງຍັງເຫລືອ 27%, ບ້ານທຸຸກຍາກຍັງເຫລືອ 63% ຫລຸດລົງເກືອບ 24% ມີບ້ານພັດທະນາແລ້ວ 71 ບ້ານ, ກວມ 14% ທຽບໃສ່ປີ 2011 ເພີ່ມຂຶ້ນ 52 ບ້ານ ແລະ ເມືອງພົ້ນທຸກ 1 ເມືອງ.
ພ້ອມນີ້ ກອງປະຊຸມໄດ້ປ່ອນບັດຄັດເລືອກເອົາຄະນະບໍລິຫານງານພັກແຂວງຊຸດໃໝ່ ເພື່ອສືບຕໍ່ຊີ້ນຳໆພາໃນຂັ້ນຕໍ່ໄປ ເຊິ່ງຜົນຂອງການເລືອກຕັ້ງຄະນະບໍລິຫານງານພັກແຂວງຜົ້ງສາລີ ສະໄໝທີ X ໄດ້31 ສະຫາຍ, ຍິງ 3 ສະ ຫາຍແລະ ຄັດເລືອກເອົາຄະນະປະຈຳພັກແຂວງ 9 ສະຫາຍ ໃນນັ້ນ ໄດ້ເປັນເອກະພາບຢ່າງຮັບຮອງເອົາເລຂາ ແລະ ຮອງເລຂາ ຄະນະບໍລິຫານພັກແຂວງ ສະໄໝ X ໂດຍມີ ສະຫາຍ ຄຳເຈນ ວົງໂພສີ ເປັນເລຂາຄະນະບໍລິຫານງານພັກແຂວງ, ສະຫາຍ ແພງ ລີລາວົງ , ສະຫາຍ ພົຈວ ທອງເສັດ ແສນວົງ ແລະ ສະຫາຍ ບົວທອງ ອູ່ແສງຄຳ ເປັນຮອງເລຂາພັກແຂວງ; ເລືອກປະທານກວດກາພັກຈຳນວນ 4 ສະຫາຍ ໃນນັ້ນໄດ້ເລືອກເອົາສະຫາຍ ຄຳຈັນ ຄຳວົງໃຈ ເປັນປະທານກວດກາພັກ, ສະຫາຍ ບຸນສຸກ ສໍມະເອີ, ສະຫາຍ ສົມຕຸ້ຍ ໄຊພະຈັນ ແລະ ສະຫາຍ ນາງ ພອນນະລີ ບຸຸດທະຈິດ ເປັນຮອງປະທານຄະນະກວດກາພັກ.
ຂອບໃຈຂ່າວຈາກ:
