ພິທີມອບ-ຮັບໜ້າທີ່ເລຂາພັກແຂວງ, ເຈົ້າແຂວງໆສາລະວັນ ລະຫວ່າງ ທ່ານ ຄໍາບຸ່ນ ດ້ວງປັນຍາ ກຳມະການສູນກາງພັກ, ເລຂາພັກແຂວງ, ເຈົ້າແຂວງໆ ສາລະວັນຜູ້ເກົ່າ ແລະ ທ່ານ ສີສຸວັນ ວົງຈອມສີ ເລຂາພັກແຂວງ, ເຈົ້າຜູ້ໃໝ່ ໄດ້ຈັດຂຶ້ນຢ່າງເປັນທາງການ ໃນຕອນເຊົ້າ ຂອງວັນທີ 10ສິງຫານີ້ ຢູ່ຫ້ອງວ່າ ການປົກຄອງແຂວງດັ່ງກ່າວ ໂດຍການເຂົ້າຮ່ວມເປັນສັກຂີພິຍານຂອງ ທ່ານ ດຣ. ບຸນປອນ ບຸດຕະນະວົງ ກຳມະການກົມການເມືອງສູນກາງພັກ, ຮອງນາຍົກລັດຖະ ມົນຕີ ຜູ້ຊີ້ນໍາວຽກງານເສດຖະກິດມະຫາພາກ ແລະ ບໍລິການ.
ໂອກາດນີ້, ທ່ານ ນາງ ວິໄລວັນ ເພັງສະຫວັດ ຕາງໜ້າຄະນະຈັດຕັ້ງສູນກາງໄດ້ຂຶ້ນຜ່ານລັດຖະດໍາລັດ ຂອງປະທານປະເທດແຫ່ງ ສປປ ລາວ ສະບັບເລກທີ 053/ປປທ, ລົງວັນທີ 29 ເມສາ2015 ວ່າດ້ວຍການອະນຸມັດໃຫ້ ທ່ານ ຄໍາບຸ່ນ ດວງປັນຍາ ອອກພັກການຮັບເບ້ຍບໍານານ ແລະ ລັດຖະດຳລັດຂອງປະທານປະເທດ ແຫ່ງ ສປປ ລາວ ສະບັບເລກທີ 108/ປປທ ລົງວັນທີ 31ກໍລະກົດ2015 ວ່າດ້ວຍການແຕ່ງຕັ້ງທ່ານ ສີສຸວັນ ວົງຈອມສີເປັນເຈົ້າແຂວງໆສາລະວັນ.
ທ່ານ ຄໍາບຸ່ນ ດ້ວງປັນຍາ ໄດ້ລາຍງານວ່າ: ຕະຫຼອດໄລຍະ 12 ປີຜ່ານມາ ໄດ້ຄຽງບ່າຄຽງໄຫຼ່ກັບ ບັນດາຄະນະນຳຂອງແຂວງ, ເມືອງ ແລະ ອຳນາດການປົກຄອງທຸກຂັ້ນ ເປັນຢ່າງດີໃນການສ້າງຄວາມສາມັກຄີພາຍ ໃນການນຳ, ພາຍໃນພັກ, ພະນັກງານ ແລະ ປະຊາຊົນທົ່ວອັນເປັນສ່ວນປະກອບອັນສໍາຄັນ ເຂົ້າໃນການປົກປັກຮັກສາ ແລະພັດທະນາເສດຖະກິດ-ສັງຄົມຂອງແຂວງ ກ້າວຂຶ້ນຢ່າງໜັກແໜ້ນ, ເຮັດໃຫ້ລວມຍອດຜະລິດຕະພັນພາຍໃນ ສະເລ່ຍໃນລະດັບ 11,48 %ຕໍ່ປີ. ສະເລ່ຍບັນລຸໄດ້ 9 ລ້ານກວ່າກີບ ຫຼື ເທົ່າກັບ 1.170ໂດລາຕໍ່ຄົນຕໍ່ປີ.
ໃນໂອກາດດັ່ງກ່າວ ທ່ານຮອງນາຍົກລັດຖະມົນຕີ ດຣ. ບຸນປອນ ບຸດຕະນະວົງ ໄດ້ໃຫ້ກຽດໂອ້ລົມຊີ້ນຳວ່າ : ເພື່ອເຮັດໃຫ້ການພັດທະນາເສດຖະກິດ-ສັງຄົມ ຢູ່ແຂວງສາລະວັນ ສືບຕໍ່ຂະຫຍາຍຕົວຢ່າງບໍ່ຢຸດຢັ້ງນັ້ນ ຈະຕ້ອງໄດ້ສືບຕໍ່ເອົາໃຈໃສ່ບາງບັນຫາເປັນຕົ້ນ ຕ້ອງເພີ່ມທະວີຄວາມສາມັກຄີພາຍໃນພັກ, ກໍາລັງປະກອບອາວຸດ ແລະ ປະຊາຊົນບັນດາເຜົ່າ ໃຫ້ມີຄວາມໜັກ ແໜ້ນເຂັ້ມແຂງ, ຕັ້ງໜ້າຜັນຂະຫຍາຍແນວທາງປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານ; ເອົາໃຈໃສ່ວຽກງານພັດທະນາຊົນນະບົດຮອບດ້ານ ຕິດພັນກັບການແກ້ໄຂຄວາມທຸກຍາກຂອງປະຊາຊົນ, ສືບຕໍ່ປັບປຸງ ແລະ ຂະຫຍາຍການສຶກສາ, ສາທາລະນະສຸກ ແລະ ວຽກງານວັດທະນະທໍາສັງຄົມ ແນໃສ່ ສ້າງຄົນໃຫ້ມີຄວາມຮູ້, ຄວາມສາມາດ, ມີຄຸນສົມບັດສິນທໍາປະຕິວັດ, ມີສຸຂະພາບທີ່ແຂງແຮງ ກາຍເປັນກໍາລັງແຮງສໍາຄັນຂອງການພັດທະນາ. ຕ້ອງຊຸກຍູ້ສົ່ງເສີມການຜະລິດເປັນສິນຄ້າຂອງປະຊາຊົນ ຢ່າງມີຈຸດສຸມ ໂດຍການໝູນໃຊ້ທ່າແຮງຂອງແຕ່ລະທ້ອງຖິ່ນ. ສໍາຄັນ ຕ້ອງເອົາໃຈໃສ່ດຶງດູດ ແລະ ສ້າງເງື່ອນໄຂໃນການລົງທຶນໃຫ້ສູງຂຶ້ນ ທັງພາຍໃນ ແລະ ຕ່າງປະເທດ ໃຫ້ສອດຄ່ອງກັບແຜນພັດທະນາເສດຖະກິດ-ສັງຄົມຂອງແຂວງ ແລະ ການພັດທະນາທີ່ຍືນຍົງ.
ຂອບໃຈຂ່າວຈາກ:
