ສຳນັກຂ່າວຕ່າງປະເທດ ລາຍງານໃນວັນທີ 10 ສິງຫາຜ່ານມານີ້ວ່າ ຈາກເຫດການນ້ຳຖ້ວມໜັກໜ່ວງຢູ່ມຽນມາຕະຫລອດຫລາຍອາທິດທີ່ຜ່ານມາ ໄດ້ເຮັດໃຫ້ມີຜູ້ເສຍຊີວິດແລ້ວຫລາຍກ່ວາ 100 ຄົນ ແລະ ມີຜູ້ໄດ້ຮັບຜົນກະທົບທົ່ວປະເທດເກືອບ 1 ລ້ານຄົນ ພື້ນທີ່ປູກເຂົ້າຖືກທຳລາຍເສຍຫາຍຈາກນ້ຳຖ້ວມຢ່າງກວ້າງຂວາງ ຈົນເຮັດໃຫ້ລັດຖະບານມຽນມາ ຈຳເປັນໄດ້ປະກາດໃຫ້ລັດຍະໄຂ່, ລັດສິ່ນ, ເຂດມາເກວ ແລະ ເຂດສະກາຍ ເປັນພື້ນທີ່ປະສົບໄພພິບັດ ຊຶ່ງໃນປັດຈຸບັນສະພາບການຍັງຄົງໜ້າເປັນຫ່ວງ ເຖິງລະດັບນ້ຳໃນແມ່ນ້ຳອີຣະວະດີໃນເຂດຕອນລຸ່ມ ເນື່ອງຈາກສຳນັກງານສະພາບອາກາດຂອງມຽນມາເຕືອນວ່າ ເຖິງແມ່ນລະດັບນ້ຳຈະຫລຸດລົງແລ້ວ ແຕ່ກໍຍັງຄົງຢູ່ໃນລະດັບອັນຕະລາຍຢູ່.