ພິທີ​ເປີດ​ໂຕ​ຢ່າງ​ເປັນ​ທາງ​ການ​ຂອງ​ທະນາຄານ​ອຸດສາຫະກຳ​ການ​ຄ້າ​ຫວຽດນາມ​ຈຳກັດ (Vietin Bank) ​ໄດ້​ມີ​ຂຶ້ນ​ໃນ​ວັນ​ທີ 8 ສິງຫານີ້ ທີ່​ນະ ຄອນຫລວງ​ວຽງ​ຈັນ ​ເພື່ອ​ເປັນ​ການ​ຍົກ​ລະດັບ​ຈາກ​ສາຂາ​ມາ​ເປັນ​ທະນາຄານ Vietin Bank ຢ່າງ​ເຕັມ​ຮູບ​ແບບ ​ໂດຍ​ການ​ເຂົ້າຮ່ວມ​ຂອງ​ທ່ານ ສົມ​ພາວ ​ໄພຈິດ ຜູ້​ວ່າການ​ທະນາຄານ​ແຫ່ງ ສປປ ລາວ, ທ່ານ​ນາງ ​ເຂັມ​ມະນີ ພົນ​ເສນາ ລັດຖະມົນຕີ​ວ່າການ​ກະຊວງ​ອຸດສາຫະກຳ-ການ​ຄ້າ, ທ່ານ ຫງວຽນ​ແມ໋​ງຮຸ່ງ ​ເອກ​ອັກຄະ​ລັດຖະທູດ ສສ ຫວຽດນາມປະຈຳ​ລາວ ​ແລະ ທ່ານ ຫງວຽນດຶກ​ຕ່ຽນ ຜູ້​ຊ່ວຍ​ວ່າການ​ທະນາຄານ​ແຫ່ງ​ລັດ ສສ ຫວຽດນາມ ​ແລະ ທ່ານ​ອຳນວຍ​ການ​ໃຫຍ່​ທະນາຄານ Vietin Bank ພ້ອມ​ພະນັກງານ​ຂັ້ນສູງ​ຂອງ​ລາວ ​ແລະ ທະ ນາຄານ​ດັ່ງກ່າວ​ເຂົ້າຮ່ວມ​ເປັນ​ຈຳນວນ​ຫລາຍ.

ອຳນວຍ​ການ​ໃຫຍ່​ທະນາຄານ​ດັ່ງກ່າວ ​ໃຫ້​ຮູ້​ວ່າ: ທະນາຄານ​ຫວຽດຕິນ ​ໄດ້​ມາ​ເປັນ​ສາຂາ​ຢູ່​ລາວ​ແຕ່​ເດືອນ​ກຸມພາ 2012 ຜ່ານ​ມາ ​ແລະ ດ້ວຍ​ການ​ອຸ້ມ​ຊູ​ຊ່ວຍ​ເຫລືອ​ຂອງ​ທະນາຄານ​ແຫ່ງ ສປປ ລາວ, ຂະ​ແໜງ​ການ​ຕ່າງໆ​ຂອງ​ລາວ ລວມທັງ​ບັນດາ​ຫົວໜ່ວຍ​ທຸລະ​ກິດ​ຫວຽດນາມ​ຢູ່​ລາວ ​ແລະ ຊາວ​ຫວຽດນາມ​ຕ່າງ​ດ້າວ ​ແລະ ບັນດາ​ນັກທຸລະກິດ​ລາວ, ​ໄດ້​ຊ່ວຍ​ໃຫ້ການ​ດຳ​ເນີນ​ງານ​ຂອງ​ທະນາຄານ​ມີ​ຜົນ​ຄືບ​ໜ້າ​ມາ​ແຕ່​ຫົວທີ່ ​ເຊິ່ງສະ​ແດງ​ອອກ​ໃຫ້​ເຫັນ​ຜ່ານ​ຜົນ​ຂອງ​ການ​ດຳ​ເນີນ​ທຸລະ​ກິດ​ມີ​ຄວາມ​ຄືບ​ໜ້າ​ໃນ​ແຕ່ລະ​ປີ, ຖ້າ​ໄລ່​ມາ​ຮອດ​ໄຕ​ມາດ​ສອງ​ຂອງ​ປີ 2015 ນີ້, ທະນາຄານ Vietin Bank ສາຂາ​ແຫ່ງ​ນີ້ມີ​ຍອດ​ຊັບ​ສິນ​ທັງ​ໝົດ 160 ລ້ານ​ໂດ​ລາ​ສະຫະລັດ, ມີ​ຍອດ​ໜີ້ສິນ​ເຊື່ອ​ຫລາຍ​ເຖິງ 95 ລ້ານ​ໂດ​ລາ ​ແລະ ປີ 2014 ຜ່ານ​ມາ, ທະນາຄານ​ດັ່ງກ່າວ​ມີ​ຜົນ​ກຳ​ໄລ​ບັນລຸ 2,4 ລ້ານ​ໂດ​ລາ.

ພາຍຫລັງ​ໄດ້​ຮັບ​ການ​ຍົກ​ລະດັບ​ຈາກ​ສາຂາ​ມາ​ເປັນ​ທະນາຄານ​ຫວຽດຕິນຢ່າງ​ເຕັມ​ຮູບ​ແບບ​ນີ້​ແລ້ວ, ທະນາ ຄານ​ຈະ​ເພີ່ມ​ຍອດ​ທຶນ​ໝູນວຽນ​ຂອງ​ຕົນ​ຂຶ້ນ​ເປັນ 50 ລ້ານ​ໂດ​ລາ​ສະຫະລັດ ​ເຊິ່ງມີ​ສຳນັກງານ​ໃຫຍ່​ຕັ້ງຢູ່​ເຮືອນ​ເລກທີ 29 ຖະໜົນ​ຂຸນ​ບູລົມ ນະຄອນຫລວງ​ວຽງ​ຈັນ ​ແລະ ມີ​ສາຂາ​ຢູ່​ເມືອງ​ປາກ​ເຊ ​ແຂວງ​ຈຳປາ​ສັກ​ນຳ​ອີກ.

ອຳນວຍ​ການ​ໃຫຍ່ ​ໃຫ້​ຮູ້​ວ່າ: ການ​ຍົກ​ລະດັບ​ດັ່ງກ່າວ​ຈະ​ຊ່ວຍ​ໃຫ້​ທະນາຄານ​ດັ່ງກ່າວ​ເປັນ​ເຈົ້າການ​ເຄື່ອນ​ໄຫວ​ທຸລະ​ກິດ​ຂອງ​ຕົນ​ຢູ່​ລາວ​ຢ່າງ​ເປັນ​ເອກະລາດ, ສາມາດ​ເປີດ​ສາຂາ​ຕ່າງໆ​ຢູ່​ບັນດາ​ທ້ອງ​ຖິ່ນ​ຂອງ​ລາວ​ໄດ້​ດ້ວຍ​ຕົນ​ເອງ ​ເພື່ອ​ສາມາດ​ສະໜອງ​ຜະລິດ​ຕະພັນ​ຂອງ​ຕົນ​ໃຫ້​ລູກ​ຄ້າ​ໄດ້​ຢ່າງ​ຫລາກ​ຫລາຍ ​ແລະ ນີ້ກໍ​ແມ່ນ​ຍຸດ​ທະ​ສາດ ​ເພື່ອ​ກ້າວ​ໄປ​ເຊື່ອມ​ໂຍງ​ເສດຖະກິດ​ຂອງ​ພາກພື້ນ ​ແລະ ຂອງ​ໂລກ​ໃນ​ອະນາຄົດ.

ໃນ​ພິທີດັ່ງກ່າວ, ທ່ານ​ຜູ້​ວ່າການ​ທະນາຄານ​ແຫ່ງ ສປປ ລາວ ສົມ​ພາວ ​ໄພຈິດ ກໍ​ໄດ້​ມີ​ຄຳ​ເຫັນ​ສະ​ແດງ​ຄວາມ​ຍ້ອງຍໍ​ຊົມ​ເຊີຍ​ຕໍ່​ຜົນສຳ​ເລັດ​ຂອງ​ທະນາຄານ​ຫວຽດຕິນ​ໃນ​ການ​ຕັດສິນ​ໃຈ​ຍົກ​ລະດັບ​ການ​ເຄື່ອນ​ໄຫວ​ຂອງ​ຕົນ​ຂຶ້ນອີກ​ກ້າວ​ໜຶ່ງ ​ແລະ ສິ່ງ​ນີ້ຈະ​ຊ່ວຍ​ໃຫ້​ທະນາຄານ​ດັ່ງກ່າວ​ມີ​ເງື່ອນ​ໄຂ​ເຄື່ອນ​ໄຫວ​ທຸລະ​ກິດ​ຂອງ​ຕົນ​ໄດ້​ກວ້າງຂວາງ​ເລິກ​ເຊິ່ງ ​ແລະ ມີ​ຫລາກ​ຫລາຍ​ຜະລິດ​ຕະພັນ ​ເພື່ອ​ສະໜອງ​ໃຫ້​ສັງຄົມ​ໄດ້​ຢ່າງ​ທົ່ວ​ເຖິງ, ປະກອບສ່ວນ​ສຳຄັນ​ເຂົ້າ​ໃນ​ການ​ພັດ ທະນາ​ເສດຖະກິດ-ສັງຄົມ​ຂອງ​ລາວ ກໍ​ຄື​ຫວຽດນາມ​ນັບ​ມື້​ເຕີບ​ໃຫຍ່​​ເຂັ້ມ​ແຂງ.

ຂອບໃຈຂ່າວຈາກ: