ສຳນັກຂ່າວຕ່າງປະເທດລາຍງານວ່າ ໃນວັນອາທິດທີ 9 ສິງຫາຜ່ານມານີ້ ສະຫະລັດອາເມຣິກາ ໄດ້ສົ່ງເຮືອບິນສູ້ຮົບ F-16 ຈຳນວນ 6 ລຳ ພ້ອມດ້ວຍທະຫານ 300​ ຄົນ ໄປປະຈຳການຢູ່ຖານທັບອາກາດອິນຊີລິກ ປະເທດຕວກກີ ຫລັງຈາກທີ່ລັດຖະບານຕວກກີເຫັນດີອະນຸຍາດໃຫ້ກອງທັບສະຫະລັດອາເມຣິກາ ໃຊ້ຖານທັບອາກາດດັ່ງກ່າວ ໃນການສົ່ງເຮືອບິນໄປປະຕິບັດການໂຈມຕີທາງອາກາດໃສ່ກຸ່ມລັດອິດສະລາມ ຫລື ໄອເອັສ ຢູ່ປະເທດຊີຣີ ແລະ ອີຣັກ.

ດ້ານກະຊວງປ້ອງກັນປະເທດຂອງສະຫະລັດອາເມຣິກາໄດ້ຖະແຫລງວ່າ ກອງທັບໄດ້ມີການແບ່ງກຳລັງຈຳນວນໜຶ່ງຈາກຝູງບິນທີ 31 ທີ່ປະຈຳການຢູ່ຖານທັບອາກາດອາເວຍໂນ ປະເທດອີຕາລີ ພ້ອມດ້ວຍຍຸດໂທປະກອນຕ່າງໆ ເພື່ອໄປປະຈຳການຢູ່ຕວກກີຄັ້ງນີ້.