ເຈົ້າຂອງໝາຄົນຝຣັ່ງ ຖືກຕັ້ງຂໍ້ຫາທໍລະມານສັດ ຫລັງຈາກຕົກເປັນຜູ້ຕ້ອງສົງໄສ ວ່າໄດ້ຈັບໝາຂອງຕົນເອງຝັງດິນທັງເປັນ ໂຊກດີທີ່ເຈົ້າຫນ້າທີ່ກູ້ໄພຊ່ວຍຊີວິດໄວ້ທັນ
ຕອນເຊົ້າຂອງ ວັນທີ່ 7 ສິງຫາ ສຳນັກຂ່າວຕ່າງປະເທດ ລາຍງານປະເດັນຮ້ອນໃນສື່ສັງຄົມອອນໄລນ໌ ທີ່ເຈົ້າຂອງໝາຄົນຝຣັ່ງ ອາຍຸ 21 ປີ ທີ່ບໍ່ຖືກເປີດເຜີຍຊື່ ຖືກຕັ້ງຂໍ້ຫາທໍລະມານສັດ ຫລັງຈາກຕົກເປັນຜູ້ຕ້ອງສົງໄສ ວ່າໄດ້ຈັບໝາເພດເມຍຂອງຕົນເອງຝັງດິນທັງ ເຊີ່ງໂຊກດີທີ່ໃນເວລາຕໍ່ມາ ເຈົ້າຫນ້າທີ່ສາມາດຊ່ວຍຊີວິດໄດ້ທັນ ແຕ່ຂະນະນັ້ນ ໝາໂຊກຮ້າຍ ຢູ່ໃນອາການຂັ້ນຮຸນແຮງຂ້ອນຂ້າງໜ້າເປັນຫ່ວງ
ນອກຈາກນີ້ລາຍງານ ລະບຸວ່າ ຫລັງຈາກຮູບພາບຂອງ ໝາໂຊກຮ້າຍຕົວນີ້ ໃນສະພາບໂຊມ ແສນທຸກທໍລະມານ ຈາກອາການຂາດນ້ຳ ຫລັງຈາກເຈົ້າຫນ້າທີ່ກູ້ໄພ ຊ່ວຍຊີວິດຂອງມັນໂດຍການຂຸດອອກມາຈາກຂຸມ ບໍລິເວນເມືອງ Carrieres-sur-Seine ຖິ່ນທຸຣະກັນດານທາງຕະເວັນຕົກຂອງກຸງປາຣີດ ຫລັ່ງໄຫລໄປໃນສື່ສັງຄົມອອນໄລນ໌ ‘ເຟສບຸກ’ ໄດ້ສ້າງຄວາມແຄ້ນເຄືອງໃຫ້ກັບຜູ້ຮັກສັດໃນສື່ສັງຄົມອອນໄລນ໌ໄປທົ່ວໂລກ ພ້ອມທັງຮຽກຮ້ອງໃຫ້ມີການນຳຕົວຜູ້ທຳຜິດ ມາດຳເນີນຄະດີຕາມກົດໝາຍ
ນອກຈາກນີ້ ໄດ້ມີນັກເຄື່ອນໄຫວຈຳນວນ 135, 000 ຄົນ ເຂົ້າຊື່ຮ້ອງຮຽນໃຫ້ມີການດຳເນີນຄະດີກັບຜູ້ກໍ່ເຫດ ໃນຂໍ້ຫາທໍລະມານສັດ ເຊໍີ່ງຫາກຫລັກຖານຊີ້ແຈ້ງວ່າເຈົ້າຂອງໝາມີຄວາມຜິດແທ້ ຈະຕ້ອງຖືກລົງໂທດໂດຍການຈຳຄຸກເປັນເວລາ 2 ປີ ແລະຈ່າຍຄ່າປັບເປັນເງີນ 20,000 ຍູໂລ ຫລືປະມານ 130.000.000 ລ້ານກີບ
ຢ່າງໃດກໍດີ ຈາກລາຍງານບໍ່ໄດ້ມີການລະບຸຊັດເຈັນວ່າ ເພາະສາເຫດໃດ ຈຶ່ງມີການກໍ່ເຫດທໍລະມານສັດ ຢ່າງຂາດໂຫດຮ້າຍໃນເທື່ອນີ້ຂຶ້ນ ແຕ່ເມື່ອເຮົາຕັດສິນໃຈທີ່ຈະເລືອກຊີວິດມາໄວ້ໃນຄອບຄອງ ເປັນເຈົ້າຂອງ ສິ່ງທີ່ສຳຄັນຢ່າງໜຶ່ງ ຄືການເບິ່ງແຍງເອົາໃຈໃສ່ ໃຫ້ຄວາມຮັກ ເພາະຊີວິດທຸກຊີວິດເປັນສິ່ງທີ່ມີຄ່າ ແມ່ນຈະເປັນສັດທີ່ບໍ່ສາມາດຕໍ່ສູ້ຂໍຊີວິດຈາກມະນຸດໄດ້ ສິ່ງສຳຄັນຄືຄວາມຮັກເພື່ອປ້ອງກັນບັນຫາໃນກໍລະນີດັ່ງກ່າວທີ່ເກິດຂື້ນ
