ສຳນັກຂ່າວຕ່າງປະເທດ ລາຍງານໃນວັນທີ 6 ສິງຫາຜ່ານມານີ້ວ່າ ຊາວຍີ່ປຸ່ນຫລາຍໝື່ນຄົນຢູ່ເມືອງຮິໂຣຊິມາ ໄດ້ຈັດພິທີລະນຶກຄົບຮອບ 70 ປີ ທີ່ກອງທັບສະຫະລັດອາເມຣິກາ ຖິ້ມລະເບີດປະລະມະນູຖະຫລົ່ມເມືອງຮິໂຣຊິມາ ເມື່ອວັນທີ 6 ສິງຫາ 1945 ໃນສະໄໝສົງຄາມໂລກຄັ້ງທີ 2 ອັນເປັນເຫດເຮັດໃຫ້ມີຜູ້ເສຍຊີວິດໃນທັນທີກ່ວາ 70,000 ຄົນ ແລະ ຕ້ອງທົນທຸກທໍລະມານຈາກອາການບາດເຈັບ ເນື່ອງຈາກສານກຳມັນຕະພາບລັງສີ ອີກຫລາຍກ່ວາ 70,000 ຄົນ.
ພາຍໃນພິທີດັ່ງກ່າວ ແມ່ນໄດ້ມີທ່ານນາຍົກລັດຖະມົນຕີ ຊິນໂຊະ ອາເບະ ແຫ່ງປະເທດຍີ່ປຸ່ນເຂົ້າຮ່ວມ ໂດຍໄດ້ພ້ອມໃຈກັນຢືນສະຫງົບນິ້ງ ເພື່ອລະນຶກ ແລະ ໄວ້ອາໄລເຖິງດວງວິນຍານຂອງຜູ້ທີ່ຈາກໄປຈາກເຫດການດັ່ງກ່າວ.
