ຂປລ. ທ້າຍອາທິດຜ່ານມານີ້ ຄະນະອຳນວຍການສື່ສິ່ງພິມ, ສື່ເອເລັກໂຕຣນິກ ໄດ້ລົງຢ້ຽມຢາມການ ກໍ່ສ້າງເຂດເສດຖະກິດ ສະເພາະບຶງທາດຫລວງ ຫລື ທີ່ເອີ້ນວ່າ “ເມືອງສະຫວັນເທິງດິນ” ເຊິ່ງເປັນໂຄງການ ອະສັງຫາລິມະຊັບ ເພື່ອຮອງຮັບການຂະຫຍາຍຕົວ ຂອງພົນລະເມືອງລາວ ກໍຄື ບັນດານັກທຸລະກິດ ທັງພາຍໃນ ແລະ ຕ່າງປະເທດ, ໂຄງການນີ້ ຈະສະໜອງທີ່ພັກອາໃສ ທີ່ສະດວກ, ທັນສະໄໝ ແລະ ສວຍງາມແກ່ຜູ້ທີ່ຕ້ອງການ ອາໃສຢູ່ໃນເຂດດັ່ງກ່າວ ໂດຍເປັນກຽດໄປຢ້ຽມຊົມໂດຍ ທ່ານ ສູນທອນ ຄັນທະວົງ ຮອງປະທານ ສະມາຄົມນັກຂ່າວ ແຫ່ງ ສປປ ລາວ, ອຳນວຍການ ສຳນັກຂ່າວສານປະເທດລາວ, ທ່ານ ສີພາ ນົງລາດ ຮອງປະທານ ສະມາຄົມນັກຂ່າວ ແຫ່ງ ສປປ ລາວ, ຜູ້ອຳນວຍການວິທະຍຸ ກະຈາຍສຽງແຫ່ງຊາດລາວ, ທ່ານ ດວງພະຈັນ ຫົວໜ້າວິທະຍຸ ສາກົນແຫ່ງປະເທດຈີນ ປະຈຳລາວ ພ້ອມດ້ວຍຄະນະນັກຂ່າວ ແລະ ໃຫ້ກຽດ ນຳພາຢ້ຽມຊົມໂດຍ ທ່ານ ຫລິວຈຸນ ຜູ້ອຳນວຍການດ້ານການ ຈຳໜ່າຍກຸ່ມບໍລິສັດ ຫວ່ານເຟິງ ຊຽງໄຮ ຈຳກັດ.
ໂອກາດນີ້ ທ່ານ ຫລິວຈຸນ ໄດ້ລາຍງານວ່າ: ການນຳພັກ-ລັດຖະບານ ສປປ ລາວ ໄດ້ໃຫ້ຄວາມສຳຄັນ ຕໍ່ການປະຕິບັດນະໂຍບາຍ ການເປີດກວ້າງການລົງທຶນ ເພື່ອເຊື່ອມໂຍງ ເສດຖະກິດກັບສາກົນ, ແນໃສ່ດຶງດູດການລົງທຶນຕ່າງປະເທດ ເຂົ້າມາລົງທຶນໃນລາວ ເພື່ອເປັນການພັດທະນາ ເສດຖະກິດ-ສັງຄົມ ໃຫ້ນັບມື້ເຕີບໃຫຍ່ຂຶ້ນ ເຮັດໃຫ້ປະຊາຊົນລາວ ມີຊີວິດການ ເປັນຢູ່ທີ່ອຸດົມສົມບູນ. ໃນທ້າຍປີ 2011, ລັດຖະບານລາວ ໄດ້ໃຫ້ສຳປະທານ ເນື້ອທີ່ດິນທີ່ຢູ່ໃຈກາງ ນະຄອນຫລວງວຽງຈັນ ແລະ ມີທີ່ຕັ້ງພູມສັນຖານທີ່ດີແກ່ກຸ່ມ ບໍລິສັດ ຫວ່ານເຟິງ ຊຽງໄຮ ສປ ຈີນ ເພື່ອພັດທະນາເປັນ “ເຂດເສດຖະກິດສະເພາະ ບຶງທາດຫລວງ” ໂດຍມີຂອບເຂດເນື້ອທີ່ ທັງໝົດກວ່າ 360 ເຮັກຕາ, ມູນຄ່າການລົງທຶນ 5 ຕື້ໂດລາສະຫະລັດ. ຕະຫລອດ ໄລຍະເວລາ 3 ປີກວ່າ ການກໍ່ສ້າງ ແລະ ພັດທະນາ ດ້ວຍຄວາມເອົາໃຈໃສ່ບວກ ໃສ່ການສະໜັບສະໜູນ ຂອງລັດຖະບານລາວ, ກຸ່ມບໍລິສັດ ຫວ່ານເຟິງ ຊຽງໄຮ ສປ ຈີນໄດ້ ນຳເອົາປະສົບການ 20 ປີ ໃນດ້ານວຽກງານການພັດທະນາ ອະສັງຫາລິມະຊັບ ແລະ ນຳເອົາຜົນສຳເລັດ ຂອງການປະຕິຮູບ ເປີດກວ້າງການ ລົງທຶນຂອງ ສປ ຈີນ ໃນໄລຍະ ເວລາ 30 ປີ ມານຳໃຊ້ຢູ່ ສປປ ລາວ ດ້ວຍການສ້າງເມືອງລາວໃຫ້ເປັນ ເມືອງທີ່ທັນສະໄໝ, ນຳເອົາຄວາມອຸດົມຮັ່ງມີ ມາສູ່ປະຊາຊົນລາວ, ປະກອບສ່ວນແກ່ ການພັດທະນາ ເສດຖະກິດຂອງ ສປປ ລາວ ໃຫ້ຈະເລີນ ສີວິໄລຍິ່ງໆຂຶ້ນ.
ທ່ານ ຫລິວຈຸນ ຍັງໃຫ້ຮູ້ເຖິງ ສິ່ງອຳນວຍຄວາມສະດວກ ທີ່ຈະສ້າງສຳເລັດກ່ອນທ້າຍປີນີ້ຄື: ຈະໃຫ້ສຳເລັດການກໍ່ສ້າງເສັ້ນທາງ, ເຂດສີຂຽວ ແລະ ທິວທັດຂອງ ພາຍໃນເຂດ ຕຶກອາຄານ, ພ້ອມທັງຮູບ ຊົງພາຍນອກອາຄານ; ສຳເລັດການຕິດຕັ້ງ ແລະ ຕົບແຕ່ງລິບ; ສຳເລັດການກໍ່ສ້າງບ່ອນຈອດລົດ; ສຳເລັດການກໍ່ສ້າງ ສະຖານີລົດເມ ເພື່ອ ຮອງຮັບລົດເມ 20 ຄັນທີ່ ແລ່ນຜ່ານທົ່ວຕົວເມືອງ ນະຄອນຫລວງວຽງຈັນ ແລະ ຈຸດທ່ອງທ່ຽວສຳຄັນຂອງລາວ; ສຳເລັດການກໍ່ສ້າງຕະຫລາດສົດທີ່ມີເນື້ອ ທີ່ 2 ພັນຕາແມັດ; ສຳເລັດການ ກໍ່ສາງຊຸບເປີມາເກັດ ທີ່ມີເນື້ອທີ່ 5 ພັນຕາແມັດ; ສຳເລັດການກໍ່ສ້າງ ແລະ ເປີດບໍລິການສະຖານທີ່ບັນ ເທິງລຽບຕາມແຄມໜອງນ້ຳໃຫຍ່ ເຊິ່ງມີຮ້ານອາຫານ, ສະຖານທີ່ ສະແດງສິລະປະ, ສະລອຍນ້ຳ ແລະ ບ່ອນຫລິ້ນເກມທາງນ້ຳ; ສຳເລັດ ການກໍ່ສ້າງ ແລະ ເປີດບໍລິການ ເດີ່ນກະຕໍ້ ແລະ ເດີ່ນເທັນນິດສ໌, ເດີ່ນບານບ້ວງ, ເດີ່ນເຕະບານ ແລະ ເດີ່ນໄດຣກ໊ອຟ ແລະ ອື່ນໆ. ຂະນະ ທີ່ເດືອນທັນວາປີນີ້ ຈະເລີ່ມກໍ່ສ້າງ ຮ້ານຊັບພະສິນຄ້າ ຄົບວົງຈອນທີ່ປະກອບດ້ວຍ: ຮ້ານປອດພາສີ, ຮ້ານຄ້າ, ຮ້ານອາຫານ, ສະບາຣ໌, ຮ້ານກາເຟ, ໂຮງໜັງ, KTV, ສວນສະໜຸກເດັກນ້ອຍ, ຮ້ານອາຫານພື້ນ ເມືອງຂອງຫລາຍປະເທດ, ສູນສຸຂະພາບສາກົນ, ໂຮງໜັງ 4D, ບ່ອນຈອດລົດ, ຮ້ານນວດSPA ແລະ ອື່ນໆ.
ຂອບໃຈຂ່າວຈາກ:
