ເປີດເຜີຍຜົນກະທົບຈາກສະພາບນໍ້າຖ້ວມຢູ່ 6 ແຂວງ
ຂປລ. ພາຍຫລັງຝົນຕົກຕິດຕໍ່ກັນຫລາຍເຖິງປັດຈຸບັນນີ້, ສໍານັກຂ່າວສານປະເທດພວກເຮົາໄດ້ຂໍ້ມູນ ພ້ອມສັງລວມເຫດການນໍ້າຖ້ວມ ແລະ ເສັ້ນທາງເປ່ເຟໄດ້ 6 ແຂວງດັ່ງນີ້: 1. ແຂວງບໍລິຄໍາໄຊມີນໍ້າຖ້ວມ 3 ເມືອງເຊັ່ນ: ບໍລິຄັນ, ທ່າພະບາດ ແລະ ປາກກະດິງ ໃນນັ້ນຖ້ວມໝັກກວ່າແມ່ນເມືອງບໍລິຄັນ ມີຈໍານວນ 20 ບ້ານ, 1.873 ຫລັງເຮືອນກັບ 11.000 ກວ່າຄົນໄດ້ຮັບກະທົບ ນອກຈາກນີ້ຍັງເນື້ອທີ່ນາປີ ແລະ ປູກພືດລະດູຝົນຖືກຖ້ວມ 4.000 ກວ່າເຮັກຕາ ປັດຈຸບັນໜ່ວຍພາກລັດ- ເອກະຊົນໄດ້ເຂົ້າໄປຊ່ວຍເຫລື້ອງເບື້ອງຕົ້ນແລ້ວ; 2. ແຂວງຄໍາມ່ວນເຫັນວ່າຢູ່ເມືອງໜອງບົກ ລະດັບນ້ຳເຊບັ້ງໄພແທກໄດ້ສູງສຸດ 17,90 ແມັດ ແລະ ຂຶ້ນກາຍເຂດເຕືອນໄພແລ້ວ ( ເຂດເຕື່ອນໄພ 17,50 ແມັດ ) ເຊິ່ງໄດ້ຖ້ວມເນື້ອທີ່ນາຂອງປະຊາຊົນຈໍານວນ 38 ບ້ານ ກວມເອົາ 1.863 ຄອບຄົວ ແລະ ຖ້ວມເນື້ອທີ່ນາ 1.811 ກວ່າເຮັກຕາ ເຊິ່ງທົ່ວເມືອງມີເນື້ອທີ່ຖືກຖ້ວມຫລາຍກວ່າໝູ່ ແມ່ນບ້ານປົ້ງກິ່ວ , ບ້ານຊຽງດີ , ບ້ານບຶງສານເທິງ , ບ້ານໂພນແພງ , ບ້ານຫາດຊາຍຟອງ ແລະ ບ້ານໜອງບົກ ປັດຈຸບັນນີ້ໄດ້ແຕ່ງຕັ້ງຄະນະກໍາມະການລົງຕິດຕາມ ເຝົ້າລະວັງຕະຫລອດ 24 ຊົ່ວໂມງຢູ່ແຕ່ລະກຸ່ມບ້ານ ;3.ແຂວງນໍ້າທາຖ້ວມຢູ່ 5 ເມືອງ: ພູຄາ, ນໍ້າທາ, ນາແລ,ລອງ ແລະ ສິງ ແຕ່ຖ້ວມຮຸນແຮງກວ່າໝູ່ແມ່ນເມືອງວຽງພູຄາ ເສຍຫາຍເບື້ອງຕົ້ນ 400 ກວ່າລ້ານກີບ ແລະ ເມືອງລອງເສຍຫາຍເບື້ອງ 183 ລ້ານ ສ່ວນຈໍານວນຄອບຄົວ ແລະ ເນື້ອທີ່ເສຍຫາຍຈະມີການເປີດເຜີຍຕາມຫລັງ ເພາະຍັງເກັບກໍາຂໍ້ມູນ; 4.ແຂວງບໍ່ແກ້ວມີພຽງເມືອງຜາອຸດົມຖືກນໍ້າຖ້ວມ ໃນປັດຈຸບັນ ເຊິ່ງມີ 30 ຫລັງຄາເຮືອນເທົ່ານັ້ນ ຂະນະທີ່ລະດັບນໍ້າຂອງຢູ່ແຂວງບໍ່ແກ້ວຍັງສືບຕໍ່ເພີ່ມຂຶ້ນ; 5.ແຂວງຜົນສາລີເກີດມີດິນເຈື່ອນຖົມທາງແຕ່ເມືອງບຸນໃຕ້ຫາບ້ານສະໂນ, ອາດຢາ ແລະ ປາກນໍ້ານ້ອຍ ພ້ອມນີ້ກໍມີນໍ້າຖ້ວມເສັ້ນທາງ ແລະ ເນື້ອທີ່ນາຢູ່ເຂດດັ່ງກ່າວ ແລະ 6.ແຂວງວຽງຈັນເກີດມີນໍ້າຖ້ວມຢູ່ຈຸດຖໍ້າຈັງ, ຖໍ້າລົມ ພ້ອມ ຖ້ວມບ້ານ, ເຮືອນ ແລະ ສະຖານທີ່ທ່ອງທ່ຽວຈໍານວນໜຶ່ງ.
ຫລ້າສຸດ ກົມອຸຕຸນິຍົມ ແລະ ອຸທົກກະສາດໄດ້ແຈ້ງໃນວັນທີ 6 ສິງຫາ 2015 ນີ້ວ່າ: ຝົນຍັງສືບຕໍ່ຕົກຕື່ມອີກ 4 ວັນນັບແຕ່7-10 ສິງຫາ 2015 ສະນັ້ນຮຽກຮ້ອງໃຫ້ພໍ່ແມ່ປະຊາຊົນ, ທະຫານ, ຕໍາຫລວດ ແລະ ນັກທ່ອງທ່ຽວເພີ່ມຄວາມລະມັດລະວັງຕື່ມອີກ ໂດຍສະເພາະຜູ້ທີ່ອາໃສໃກ້ແຄມແມ່ນໍ້ານ້ອຍ-ໃຫຍ່, ຮ່ອມພູ ແລະ ບ່ອນມີຄວາມສ່ຽງ ນອກຈາກນັ້ນກໍຕ້ອງຕິດຕາມສະພາບອາກາດ ຢ່າງໃກ້ຊິດກ່ອນຈະເດີນທາງ.
ຂອບໃຈຂ່າວຈາກ:
