ສຳນັກຂ່າວຕ່າງປະເທດ ລາຍງານໃນວັນທີ 6 ສິງຫານີ້ວ່າ ນາຍົກລັດຖະມົນຕີ ນາຈິບ ຣາຊັກ ແຫ່ງປະເທດມາເລເຊຍ ອອກຖະແຫລງການໃນວັນພຸດທີ 5 ສິງຫາຜ່່ານມານີ້ວ່າ ຊ່ຽວຊານຈາກບັນດາປະເທດຕ່າງໆຢູ່ເມືອງຕູລູດ ປະເທດຝຣັ່ງ ທີ່ໄດ້ທຳການກວດສອບຊາກຊິ້ນສ່ວນປີກເຮືອບິນໂບອິ້ງ 777 ທີ່ພົບຢູ່ເກາະເຣອູນິຢົງ ໃນມະຫາສະໝຸດອິນເດຍໃນອາທິດທີ່ຜ່ານມາ ແມ່ນໄດ້ອອກມາຢືນຢັນແລ້ວ ວ່າຊິ້ນສ່ວນດັ່ງກ່າວມາຈາກເຮືອບິນຂອງມາເລເຊຍ ແອຣ໌ລາຍ ຖ້ຽວບິນ MH370 ທີ່ຫາຍສາບສູນໄປເມື່ອວັນທີ 8 ມີນາ 2014 ພ້ອມຜູ້ໂດຍສານ ແລະ ລູກເຮືອລວມ 239 ຄົນ.
ທັງນີ້ ຖ້ຽວບິນ MH370 ດັ່ງກ່າວ ແມ່ນສູນຫາຍໄປຈາກຈໍຣາດາໃນທະເລຈີນໃຕ້ ຂະນະເດີນທາງອອກຈາກນະຄອນຫລວງກົວລາລຳເປີ ປະເທດມາເລເຊຍ ເພື່ອເດີນທາງໄປນະຄອນຫລວງປັກກິ່ງ ປະເທດຈີນ ຊຶ່ງການພົບຫລັກຖານທີ່ສາມາດຢືນຢັນໄດ້ດັ່ງກ່າວນີ້ ໄດ້ເຮັດໃຫ້ສາມາດສະຫລຸບໄດ້ວ່າ ເຮືອບິນລຳດັ່ງກ່າວ ໄດ້ບິນກ້ຽວກັບຄືນມາບໍລິເວນຊ່ອງແຄບມະລະກາ ແລະ ບິນລົງໄປທາງມະຫາສະໝຸດອິນເດຍຕອນໃຕ້ຈົນນ້ຳມັນໝົດ ແລະ ຕົກລົງໃນທະເລ ທາງພາກຕາເວັນຕົກສຽງໃຕ້ຂອງປະເທດອົດສະຕາລີ.
