ສຳນັກຂ່າວຕ່າງປະເທດ ລາຍງານໃນວັນທີ 4 ສິງຫາຜ່ານມານີ້ວ່າ ຫວຽດນາມ ແລະ ສະຫະພາບເອີຣົບ ໄດ້ປະກາດບັນລຸຂໍ້ຕົກລົງເຂດການຄ້າເສລີ (FTA) ຮ່ວມກັນແລ້ວ ຫລັງຈາກມີການເຈລະຈາຮ່ວມກັນດົນເຖິງ 2 ປີເຄິ່ງ ຊຶ່ງມີຂຶ້ນຫລັງຈາກທີ່ການຄ້າຂອງສອງຝ່າຍ ໄດ້ຂະຫຍາຍຕົວມີມູນຄ່າສູງຂຶ້ນເຖິງ 3 ເທົ່າໃນໄລຍະ 10 ປີຜ່ານມາ ໂດຍຂໍ້ຕົກລົງດັ່ງກ່າວນີ້ ຈະເຮັດໃຫ້ມີການຍົກເລີກອັດຕາພາສີຂອງສິນຄ້າເກືອບທັງໝົດ ອັນຈະເຮັດໃຫ້ນຳປະໂຫຍດມາສູ່ເສດຖະກິດຂອງຫວຽດນາມ ແລະ ສະຫະພາບເອີຣົບ.

ທັງນີ້ ຫວຽດນາມ ແມ່ນເປັນປະເທດທີ່ສົ່ງອອກໂທລະສັບມືຖື ແລະ ອຸປະກອນເອເລັກໂຕນິກ ຕະຫລອດຮອດເກີບ, ເສື້ອຜ້າ ແລະ ຜະລິດຕະພັນທາງກະສິກຳເຊັ່ນ ກາເຟ, ເຂົ້າ ແລະ ອາຫານທະເລ ໄປຍັງສະຫະພາບເອີຣົບ ໃນຂະນະທີ່ເອີຣົບເອງ ກໍສົ່ງອອກຜະລິດຕະພັນເຕັກໂນໂລຊີສູງ ເປັນຕົ້ນແມ່ນເຄື່ອງຈັກ ແລະ ອຸປະກອນໄຟຟ້າ, ເຮືອບິນ ແລະ ຢາປົວພະຍາດ ມາຍັງຫວຽດນາມເປັນສ່ວນໃຫຍ່.