ລະວັງ ! ອີເມວຕົວະໃຫ້ດາວໂຫລດໄຟລ໌ອັບເກດເປັນ Windows 10 ຟຣີ ທີ່ແທ້ເປັນໄຟລ໌ປອມ ລັອກຂໍ້ມູນສຳຄັນໃນເຄື່ອງເປັນຕົວປະກັນ ຖ້າຢາກໄດ້ຄືນຕ້ອງຍອມຈ່າຍເງີນ
ວັນທີ່ 31 ກໍລະກົດ ທີ່ຜ່ານມາ Cisco ໄດ້ເປີດເຜີຍວ່າ ໃນຂະນະນີ້ມີຜູ້ບໍ່ປະສົງດີໃຊ້ແຄມເປນອັບເກດ Windows 10 ຂອງໄມໂຄຊອບເປັນໂອກາດໃນການຕົວະໃຫ້ເຫຍື່ອຖືກລັກໄຟລ໌ສຳຄັນເປັນຕົວປະກັນ ໂດຍຈະມາໃນຮູບແບບຂອງອີເມວທີ່ແອບອ້າງເປັນໄມໂຄຊອບ ເຊີ່ງໃຊ້ຊື່ອີເມວທີ່ລົງທ້າຍວ່າ @microsoft.com ຕົວະໃຫ້ຜູ້ອ່ານຫລົງເຊື່ອວ່າເປັນອີເມວທີ່ສົ່ງມາຈາກໄມໂຄຊອບແທ້ ແລະຕົວະໃຫ້ດາວໂຫລດໄຟລ໌ເພື່ອຕິດຕັ້ງ Windows 10 ຟຣີ ແຕ່ແທ້ຈິງແລ້ວເປັນໄຟລ໌ປອມ
ຫາກສັງເກດໃຫ້ດີຈະພົບວ່າເນື້ອຫາໃນອີເມວນັ້ນຈະມີຕົວອັກສອນແປກໆ ປະປົນຢູ່ ແລະໂປຣແກຣມສະແກນໄວຣັດຂອງຜູ້ໃຫ້ບໍລິການອີເມນວອາດແຈ້ງເຕືອນວ່າເປັນອີເມວທີ່ບໍ່ປອດໄພອີກດ້ວຍ ເຊີ່ງຖ້າຫາກເຫຍື່ອຫລົງເຊື່ອແລະດາວໂຫລດໄຟລ໌ທີ່ແນບມາກັບອີເມວແລ້ວເປີດໄຟລ໌ຂຶ້ນມາ ຈະສະແດງຂໍ້ຄວາມແຈ້ງວ່າຂໍ້ມູນສຳຄັນທີ່ຢູ່ໃນເຄື່ອງໄດ້ຖືກເຂົ້າລະຫັດໄວ້ແລ້ວ ເຮັດໃຫ້ບໍ່ສາມາດໃຊ້ງານໄດ້ຈົນກວ່າຈະຍອມຈ່າຍເງີນເພື່ອແລກກັບລະຫັດສຳລັບປົດລັອກຂໍ້ມູນ
ສຳລັບວິທີປ້ອງກັນເບື້ອງຕົ້ນກໍຄື ເກັບຂໍ້ມູນສຳຄັນສຳຮອງເອົາໄວ້ໃນທີ່ປອດໄພ ແລະກວດສອບອີເມວໃຫ້ແນ່ໃຈກ່ອນວ່າປອດໄພເຊື່ອຖືໄດ້ຫລືບໍ່ກ່ອນຫລົງເຊື່ອ ແລະສຳລັບໃນກໍລະນີການອັບເກດ Windows 10 ນັ້ນທາງໄມໂຄຊອບຈະບໍ່ມີການສົ່ງໄຟລ໌ຕິດຕັ້ງແນບມາທາງອີເມວແຕ່ຢ່າງໃດ