ສຳນັກຂ່າວຕ່າງປະເທດ ລາຍງານໃນວັນທີ 4 ສິງຫານີ້ວ່າ ທາງການມຽນມາ ມີຄວາມເປັນຫ່ວງຕໍ່ສະພາບທີ່ມີຝົນສືບຕໍ່ຕົກໜັກລົງມາອີກ ອັນເປັນການຊ້ຳຕື່ມສະຖານະການນ້ຳຖ້ວມໜັກໜ່ວງໃນປັດຈຸບັນ ໂດຍລັດຖະບານມຽນມາ ໄດ້ຮ່ວມມືກັບອົງການສະຫະປະຊາຊາດ ແລະ ອົງການອື່ນໆ ເລັ່ງກະຈາຍການຊ່ວຍເຫລືອໄປຍັງຜູ້ປະສົບໄພ ຊຶ່ງຮອດປັດຈຸບັນມີລາຍງານຕົວເລກຜູ້ເສຍຊີວິດແລ້ວທັງໝົດ 46 ຄົນ ໂດຍອົງການສະຫະປະຊາຊາດເຊື່ອວ່າ ຜູ້ເສຍຊີວິດ ແລະ ຜູ້ທີ່ໄດ້ຮັບຜົນກະທົບຈະເພີ່ມຂຶ້ນອີກ ເນື່ອງຈາກເຈົ້າໜ້າທີ່ມີຄວາມຫຍຸ້ງຍາກ ໃນການເຂົ້າໃຫ້ຄວາມຊ່ວຍເຫລືອແກ່ປະຊາຊົນ ທີ່ອາໄສໃນເຂດຫ່າງໄກສອກຫລີກ.