ຂປລ. ກອງປະຊຸມໃຫຍ່ ຄັ້ງທີ VII ອົງຄະນະພັກ ແຂວງຫລວງພະບາງ ໄດ້ໄຂຂຶ້ນຢ່າງເປັນທາງການ ໃນວັນທີ 4 ເດືອນສິງຫາ ປີ 2015  ຢູ່ສະໂມສອນ ແຂວງ ດັ່ງກ່າວ ໂດຍສະຫາຍ ສົມສະຫວາດ ເລັ່ງສະຫວັດ ກຳມະການກົມການເມືອງ ສູນກາງພັກ, ຮອງນາຍົກລັດຖະມົນຕີ ພ້ອມດ້ວຍຜູ້ແທນສົມບູນ 253 ສະຫາຍ ທີ່ຕາງໜ້າສະມາຊິກ ທົ່ວແຂວງກວ່າ18.460 ສະຫາຍ,ຍິງກວ່າ 3.400 ສະຫາຍ ແລະ ຕາງໜ້າຄະນະ ບໍລິຫານງານ ພັກແຂວງ ວຽງຈັນ, ອຸດົມໄຊ, ບໍ່ແກ້ວ, ຫລວງນ້ຳທາ, ຜົ້ງສາລີ, ຊຽງຂວາງ, ໄຊຍະບູລີ ແລະ ແຂວງຫົວພັນ ເຂົົ້າຮ່ວມໂດຍ ກອງປະຊຸມໃຫຍ່ດ່ັງກ່າວ, ຜູ້ແທນໄດ້ເປັນເຈົ້າ ຄົ້ນຄວ້າພິຈາລະນາຄືນ ການຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ VI ຂອງອົງຄະນະພັກແຂວງ 5 ປີຜ່ານມາພ້ອມທັງ ຈະຮັບຮອງເອົາ ຄາດໝາຍສູ້ຊົນ ແລະ ໜ້າທີ່ວຽກງານ ໃນຊຸມປີຕໍ່ໜ້າ ໂດຍເນັ້ນສ້າງແຂວງຂອງຕົນ ໃຫ້ກາຍເປັນໃຈກາງ ການທ່ອງທ່ຽວ ທີ່ມີສະເໜ່ ສີຂຽວ ແລະ ເຊື່ອງໂຍງກັບ ອະນຸພາກພື້ນ ລວມທັງສ້າງປະຖົມປັດໄຈ ແລະ ພື້ນຖານເຕັກນິກກໍຄຶເງື່ອນໄຂຕ່າງໆ ທີ່ຈຳເປັນເພື່ອກ້າວສູ່ ການປະຕິບັດ ວິໄສທັດ ແລະ ຍຸດທະສາດຮອດປີ 2030 ແລະ 2025 .

ສະຫາຍ ດຣ. ຄຳແພງ ໄຊສົມແພງ ກຳມະການສູນກາງພັກ, ເລຂາພັກແຂວງຫລວງພະບາງ ຕາງໜ້າຄະນະ ບໍລິຫານງານພັກ ແຂວງສະໄໝທີ VI ລາຍງານ ຕໍ່ກອງປະຊຸມໃຫຍ່ ຄັ້ງທີ VII ອົງຄະນະພັກແຂວງ ຂອງຕົນວ່າ: 5 ປີ ຜ່ານມາ, ທົ່ວພັກ, ທົ່ວລັດ, ທົ່ວກຳລັງປະກອບອາວຸດ ແລະ ທົ່ວປວງຊົນບັນດາເຜົ່າ ໄດ້ເປັນເຈົ້າ ຜັນຂະຫຍາຍມະຕິ ກອງປະຊຸມໃຫຍ່ຄັ້ງທີ VI ອົງຄະນະພັກແຂວງ ແລະ ກອງປະຊຸມໃຫຍ່ຄັ້ງທີ IX ຂອງພັກທີ່ວາງອອກ ທັງປະຕິບັດ ບາດກ້າວບຸກທະລຸ 4 ດ້ານ ເຂົ້າສູ່ຊີວິດຕົວຈິງ ອັນສາມາດຜ່ານຜ່າ ອຸປະສັກຄວາມຫຍຸ້ງຍາກຕ່າງໆ ແລະ ບັນລຸຜົນສຳເລັດຫລາຍດ້ານ ເປັນຕົ້ນສາມາດ ປົກປັກຮັກສາ ຄວາມສະຫງົບຄວາມໝັັ້ນຄົງ ທາງການເມືອງ ແລະ ຄວາມເປັນລະບຽບ ຮຽບຮ້ອຍ ໃນສັງຄົມໄດ້ຢ່າງໜັກແໜ້ນ ເຮັດໃຫ້ຈັງ ຫວະ ການເຕີບໃຫຍ່ ທາງເສດຖະກິດ ໝັ້ນທ່ຽງ, ຕໍ່ເນື່ອງ ສະເລ່ຍ 8,8% ຕໍ່ປີ ແລະ ບັນລຸລວມຍອດຜະລິດ ຕະພັນພາຍໃນກວ່າ 23.740 ຕື້ກີບ, ຂະນະທີ່ ປະຊາຊົນ ມີລາຍຮັບສະເລ່ຍກວ່າ 15 ລ້ານກີບຕໍ່ຄົນຕໍ່ປີ ຫລື 1.530 ໂດລາ.ຂະ ນະດຽວກັນ ໂຄງປະກອບເສດຖະກິດ ໄດ້ຫັນປ່ຽນໄປຕາມ ທິດຫັນເປັນອຸດສາຫະກຳ ແລະ ທັນສະໄໝ ໂດຍເຫັນໄດ້ຂະແໜງການ ບໍລິການ-ທ່ອງທ່ຽວ ເພີ່ມຈາກ 37%ເປັນເກືອບ 44%, ຂະແໜງກະສິກຳປ່າໄມ້ ຈາກ  43% ຫລຸດລົງເປັນກວ່າ 33% ແລະ ຂະແໜງອຸດສາຫະກຳເພີ່ມຈາກ 20% ເປັນ 23%. ຜົນສຳເລັດດັ່ງ ກ່າວມາຈາກ ການດຳເນີນນະໂຍບາຍ ສົ່ງເສີມກຳລັງແຮງ ຂອງພາກສ່ວນເສດຖະກິດ ຢ່າງແຂງແຮງລວມທັງສົ່ງເສີມ ການປູກການລ້ຽງເປັນສິນຄ້າ ຢ່າງກວ້າງຂວາງ ອັນເຮັດໃຫ້ປະຊາຊົນ ມີລາຍຮັບແກ້ໄຂ ຄວາມທຸກຍາກ ເປັນຈຳນວນຫລາຍ ໂດຍປັດຈຸບັນຄອບຄົວທຸກຍາກ ຍັງເຫລືອ ກວ່າ 5% ຫລື ກວ່າ 4.130 ຄອບ ຄົວ, 169 ບ້ານ ກວມກວ່າ 22% ແລະ 4 ເມືອງທຸກຍາກ, ຂະນະທີ່ບ້ານພັດທະນາ ເພີ່ມຂຶ້ນເປັນ 217 ບ້ານກວມ 29% ແລະ ຄອບຄົວພັດທະນາກໍມີກວ່າ 49.200 ຄອບຄົວ ກວມເຖິງ 63%. ນອກນີ້ຍັງໄດ້ສົ່ງເສີມ ທຸລະກິດຂະໜາດນ້ອຍ ແລະ ກາງ ໂດຍໄດ້ມອບໂຄງການ ແລະ ນະໂຍບາຍ ສະໜອງສິນເຊື່ອ ຈາກທະນາຄານ ແລະ ໂຄງການຕ່າງປະເທດ ທີ່ເຂົ້າມາຊ່ວຍເຫລືອ. ທີ່ສຳຄັນ ໄດ້ນຳພາການພັດທະນາ ກໍ່ສ້າງພື້ນຖານໂຄງລ່າງ ລວມທັງຂົງເຂດ ວັດທະນະທຳສັງຄົມ ຕາມແນວທາງນະໂຍບາຍ ຂອງພັກເປັນຕົ້ນ ຂະຫຍາຍຕາໜ່າງການສຶກສາ ໄປສູ່ຊົນນະບົດຫ່າງໄກສອກຫລີກ ຢ່າງທົ່ວເຖິງ, ປະຊາຊົນ ບັນດາເຜົ່າ ໄດ້ເຂົົ້າເຖິງການບໍລິການ ສາທາລະນະສຸກ, ຫລາຍບ້ານຫລາຍຄອບຄົວ ເປັນບ້ານເປັນຄອບຄົວ ວັດທະນະທຳ ແລະ ຂະແໜງ ການອື່ນໆ ກໍພົ້ນເດັ່ນກ້າວໜ້າ. ແນວໃດກໍດີ 5 ປີຕໍ່ໜ້າຄືຮອດປີ 2020 ສູ້ຊົນລຶບລ້າງຄອບຄົວ ທຸກຍາກໃຫ້ເຫລືອບໍ່ເກີນ 2%, ບ້ານທຸກຍາກ ໃຫ້ເຫລືອບໍ່ເຖິງ 9% ແລະ ເມືອງທຸກຍາກໃຫ້ເຫລືອ 2 ເມືອງຄືເມືອງໂພນທອງ ແລະ ເມືອງໂພນໄຊ. ຂະນະດຽວ ກັນຈະສ້າງຄອບຄົວ ພັດທະນາໃຫ້ໄດ້ 87%, ບ້ານພັດທະນາກວ່າ 73% ແລະ ສ້າງບ້ານໃຫຍ່ກາຍເປັນຕົວເມືອງນ້ອຍ 20 ບ້ານຢູ່ແຕ່ລະເມືອງ. ເພື່ອບັນລຸເປົ້າໝາຍດ່ັງກ່າວ ຕ້ອງໄດ້ສຸມໃສ່ ກໍ່ສ້າງພື້ນຖານໂຄງລ່າງຕ່າງໆ, ການພັດທະນາ ແລະ ຍົກລະດັບການຜະລິດກະສິກຳ, ອຸດສາຫະກຳປຸງແຕ່ງ ໃຫ້ຂະຫຍາຍຕົວໄວ ຕໍ່ເນື່ອງທັງເຮັດໃຫ້ລວມ ຍອດຜະລິດຕະພັນ ພາຍໃນໃຫ້ເພີ່ມ ຂຶ້ນບໍ່ຫລຸດ 8,8% ຕໍ່ປີທັງເຮັດໃຫ້ປະຊາຊົນ ມີລາຍຮັບສະເລ່ຍກວ່າ 17 ລ້ານກີບ ຫລື 2.210 ໂດລາສະຫະລັດ ຕໍ່ຄົນຕໍ່ປີ. ຂະນະດຽວກັນ ກໍຕ້ອງເພີ່ມທະວີ ການພັດທະນາສັງຄົມ ແລະ ວັດທະນະທຳ ໂດຍການຮັກສາ ເສີມຂະຫຍາຍວັດທະນະທຳ ທີ່ເປັນເອກະລັກ ຂອງຊາດ ຂອງບັນດາເຜົ່າ, ຍົກລະດັບຊັບພະຍາກອນ ມະນຸດຕິດພັນກບການສຶກສາ ໃຫ້ພົນລະເມືອງທັງຮັບປະກັນສະຫວັດດີການ ແລະ ສຸຂະພາບ ຂອງ ປະຊາຊົນ ເພື່ອໃຫ້ມີອາຍຸຍືນ. ທີ່ສຳຄັນ ເຮັດໃຫ້ແຂວງຂອງຕົນ ກາຍເປັນໃຈກາງການທ່ອງທ່ຽວ ທີ່ມີສະເໜ່ສີຂຽວເຊື່ອມໂຍງ ກັບອະນຸພາກ ພື້ນືງປົກປັກ ຮັກສາເມືອງມໍລະດົກໂລກໃຫ້ຄົງຄຸນຄ່າ ແລະ ຍືນຍົງ, ຜະລິດສະບຽງອາຫານ ໃຫ້ໝັ້ນຄົງ ທັງເສີມຂະຫຍາຍມູນເຊື້ອ ຄວາມສາມັກຄີ ເປັນປຶກແຜ່ນ ແໜ້ນໜາ ຂອງປະຊາຊົນ ບັນດາເຜົ່າ ພາຍໃຕ້ການນຳພາຂອງພັກ ແລະ ທຸກຄົນທຸກຄອບຄົວ ເປັນເຈົ້າການພັດທະນາ ໃຫ້ຮັ່ງມີເຂັ້ມແຂງ ສັງຄົມມີ ຄວາມສະຫງົບ, ຍຸຕິທຳ ແລະ ສີວິໄລ.

ເລຂາພັກແຂວງຫລວງພະບາງ ຍັງກ່າວຢືນຢັນຜົນສຳເລັດ 5 ປີຜ່ານມານັ້ນ ໄດ້ຢັ້ງຢືນໃຫ້ເຫັນວ່າ: ແນວທາງ, ແຜນນະໂຍບາຍ ຂອງພັກຖືກຕ້ອງ ສອດຄ່ອງທີ່ສຸດ ໂດຍສະເພາະມະຕິ ກອງປະຊຸມໃຫຍ່ຄັ້ງທີ IX ຂອງພັກ, ມະຕິກອງປະຊຸມໃຫຍ່ຄັ້ງທີ VI ຂອງອົງຄະນະພັກແຂວງວາງອອກ ທັງເປັນການ ຢັ້ງຢືນ ເຖິງຄວາມສາມາດ, ຄວາມຮັບຜິດຊອບ ຈັດຕັ້ງປະຕິບັດຕົວຈິງ ຂອງຄະນະພັກ, ອົງການປົກຄອງແຕ່ລະຂັ້ນ ລວມທັງພະນັກງານ ສະມາຊິກພັກ, ກຳລັງປະກອບອາວຸດ ແລະ ປະຊາຊົນບັນດາເຜົ່າ ທີ່ໄດ້ເພີ່ມທະວີ ຄວາມສາມັກຄີປອງດອງ ຕັດສິນໃຈຜ່ານຜ່າ ຄວາມຫຍຸ້ງຍາກຕ່າງໆ ກໍຄືບັນດາປະເທດ ເພື່ອນມິດຍຸດທະສາດ, ອົງການຈັດຕັ້ງຕ່າງປະເທດ ທີ່ໄດ້ສະໜັບສະໜູນ ແລະ ຊ່ວຍເຫລືອຕະຫລອດມາ.

ຂອບໃຈຂ່າວຈາກ:

ພ