ກອງປະຊຸມຄະນະປະຈໍາສະພາແຫ່ງຊາດປະຈໍາເດືອນກໍລະກົດ, ໄດ້ມີຂຶ້ນໃນລະ ຫວ່າງວັນທີ 3-4 ສິງຫານີ້, ທີ່ສະພາແຫ່ງຊາດ, ໂດຍການເປັນປະທານຂອງທ່ານ ນາງ ປານີ ຢ່າທໍ່ ຕູ້ປະທານສະພາແຫ່ງຊາດ, ເຊິ່ງໄດ້ຄົ້ນຄ້ວາພິຈາລະນາ ແລະ ຮັບຮອງເອົາບັນຫາສໍາຄັນຕ່າງໆຄື ຜ່ານບົດສະຫລຸບຕີລາຄາຜົນສໍາເລັດຂອງກອງປະຊຸມສະໄໝສາມັນເທື່ອທີ 9 ຂອງສະພາແຫ່ງຊາດຊຸດທີ VII ພິຈາລະນາ ແລະ ຮັບຮອງເອົາສັດຕະຍາບັນຕໍ່ການຫລຸດຜ່ອນອັດຕາພາສີຂອບຕົກລົງວ່າດ້ວຍການຄ້າຜະລິດຕະພັນອາຊຽນປະຈໍາສົກປີ 2016-2018 ແລະ ສະເໜີຫົວຂໍ້ກອງປະຊຸມໄອປາຄັ້ງທີ 36, ຮັບຟັງຂໍ້ສະເໜີກ່ຽວກັບສະຫະພັນລັດຖະສະພາສາກົນ, ການຮຽກຮ້ອງໃຫ້ສະມາຊິກລັດຖະສະພາລົງນາມເພື່ອເປັນການສະໜັບສະໜູນການສ້າງຄວາມເຂັ້ມແຂງໃຫ້ແກ່ແມ່ຍິງ ແລະ ບໍາລຸງຄວາມສະເໝີພາບຍິງ-ຊາຍ, ຂໍການພິຈາລະນາການເປັນເຈົ້າພາບຈັດກອງປະຊຸມຮ່ວມລະຫວ່າງສາມກໍາມາທິການຕ່າງປະເທດລາວ,ຫວຽດນາມ ແລະ ກໍາປູເຈຍທີ່ແຂວງຈໍາປາສັກໃນລະຫວ່າງວັນທີ 15-20 ກັນຍາ 2015 ທີ່ຈະເຖິງນີ້, ພິຈາລະນາຂໍການຍົກຍ້າຍບ່ອນປະຈໍາການຂອງປະທານສານປະຊາຊົນແຂວງຫລວງພະບາງໄປຮັບໜ້າທີ່ໃໝ່ ແລະ ລາຍງານການຄົ້ນຄ້ວາສະເໜີແຕ່ງຕັ້ງປະທານສານ ແລະ ຮອງປະທານສານປະຊາຊົນທ້ອງຖິ່ນ, ພິຈາລະນາຄໍາຮ້ອງຂໍຄວາມເປັນທໍາກ່ຽວກັບການຍົກເລີກສັນຍາເຊົ່າໂຮງແຮມເອກະລາດ, ພິຈາລະນາຄືນວຽກງານສັນຊາດ, ພິຈາລະນາ ແລະ ຄົ້ົນຄ້ວາສ້າງຕັ້ງຄະນະເຮັດວຽກດ້ານວິຊາການຂອງໄອໂຟຄອມຂອງ ສປປ ລາວ, ລາຍງານກ່ຽວກັບການສ້າງຕັ້ງກົມກວດກາຂອງອົງການກວດສອບແຫ່ງລັດ, ສະເໜີແຜນດໍາເນີນກອງປະຊຸມຂອງ 3 ກໍາມາທິການ ປກຊ-ປກສສະພາແຫ່ງຊາດລາວ, ຫວຽດນາມ ແລະ ກໍາປູເຈຍ, ລາຍງານກ່ຽວກັບການຈັດຕັ້ງປະຕິບັດວຽກງານຂອງຄະນະຮັບຜິດຊອບຄຸ້ມຄອງການຮ່ວມມືສາກົນສະພາແຫ່ງຊາດ ແລະ ໄປແລກປ່ຽນບົດຮຽນວຽກງານຄຸ້ມຄອງໂຄງການ ແລະ ນໍາໃຊ້ການຊ່ວຍເຫລືອຫ້ອງວ່າການສະພາແຫ່ງຊາດລາວກັບຫ້ອງວ່າການສະພາແຫ່ງຊາດ ສສ ຫວຽດນາມ, ຮັບຟັງການລາຍງານກ່ຽວກັບການສ້າງລາຍການໂທລະພາບຂອງສະພາແຫ່ງຊາດ ແລະ ວຽກງານທີ່ສໍາຄັນຈໍານວນໜຶ່ງອີກ.
ຂອບໃຈຂ່າວຈາກ:
