ຂປລ. ວັນທີ 1 ສິງຫາ2015 ທີ່ ແຂວງໄຊຍະບູລີ ໄດ້ມີພິທີເຊັນສັນຍາ ການຄຸ້ມຄອງເຂື່ອນໄຟຟ້ານ້ຳຕົກ ຂະໜາດນ້ອຍ ນ້ຳຮຸ່ງ 1 ລະຫວ່າງ ແຂວງໄຊຍະບູລີ ຕາງໜ້າໂດຍ ພະແນກແຜນການ ແລະ ການລົງທຶນ ຂອງແຂວງ ແລະ ບໍລິສັດສີເມືອງກຣຸບ ຕາງໜ້າໂດຍ ບໍລິສັດເຂື່ອນໄຟຟ້ານ້ຳຮຸ່ງ 1 ຈຳກັດຜູ້ດຽວ. ໃຫ້ກຽດໃນພິທີ ມີທ່ານ ສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີ, ຜູ້ຊີ້ນຳວຽກງານເສດຖະກິດ ການຜະລິດ ແລະ ຈໍລະຈອນ; ທ່ານ ພົງສະຫວັດ ສິດທະວົງ ເຈົ້າແຂວງໆໄຊຍະບູລີ; ທ່ານ ດຣ. ຄຳມະນີ ອິນທິລາດ ລັດຖະມົນຕີວ່າການ ກະຊວງພະລັງງານ ແລະ ບໍ່ແຮ່; ທ່ານ ສອນໄຊ ສິດພະໄຊ ຮອງຜູ້ວ່າການທະນາຄານ ແຫ່ງ ສປປ ລາວ; ທ່ານ ເອກະພັນ ພະພິທັກ ປະທານບໍລິສັດສີເມືອງກຣຸບ, ພ້ອມດ້ວຍຄະນະນຳຂອງສອງຝ່າຍ ແລະ ແຂກທີ່ຖືກເຊີນເຂົ້າຮ່ວມ.
ໂຄງການດັ່ງກ່າວ, ຕັ້ງຢູ່ຫ່າງຈາກເທສະບານ ແຂວງໄຊຍະບູລີ ໄປທາງທິດຕາເວັນອອກສ່ຽງໄຕ້ ປະມານ 15 ກິໂລແມັດ; ເຊິ່ງໄດ້ມີການສຳຫລວດ ຄວາມເປັນໄປໄດ້ ທາງດ້ານເສດຖະກິດ, ເຕັກນິກ, ຜົນກະທົບທາງດ້ານ ສັງຄົມ–ສິ່ງແວດລ້ອມ ແລະ ອື່ນໆ ມາແຕ່ປີ 2010 ແລະ ສຳເລັດ ໃນປີ 2014; ມີເນື້ອທີ່ອ່າງໂຕ່ງ 2.915 ກິໂລຕາແມັດ; ເນື້ອ ທີ່ອ່າງເກັບນ້ຳ 1,52 ກິໂລຕາແມັດ; ອັດຕາການໄຫລຂອງນ້ຳ 34 ກວ່າແມັດກ້ອນ/ວິນາທີ. ເຊິ່ງໄດ້ອອກແບບການ ກໍ່ສ້າງມີຄວາມຍາວຂອງສັນເຂື່ອນ 235 ແມັດ, ຄວາມສູງຂອງເຂື່ອນ 34 ກວ່າແມັດ, ມີກຳລັງຕິດຕັ້ງເຄື່ອງປັ່ນໄຟຟ້າ 5 ເມກາວັດ ຈຳນວນ 3 ເຄື່ອງ ລວມ 15 ເມກາວັດ, ມີມູນຄ່າການກໍ່ສ້າງ 34 ລ້ານກວ່າໂດລາສະຫະລັດ, ໂດຍແມ່ນ ບໍລິສັດ ສີເມືອງກຣຸບ ເປັນຜູ້ລົງທຶນ 100 ສ່ວນຮ້ອຍ ແລະ ບໍລິສັດ ໂດອູ ອີຊີ ເປັນຜູ້ຮັບເໝົາກໍ່ສ້າງ. ເຊິ່ງຈະເລີ່ມລົງມືກໍ່ສ້າງ ໃນທ້າຍປີ 2015 ແລະ ຈະໃຫ້ສຳເລັດ ໃນທ້າຍປີ 2017. ພາຍຫລັງການກໍ່ສ້າງໂຄງການນີ້ສຳເລັດ ຕາມແຜນການທີ່ວາງໄວ້ ຄາດວ່າຈະມີລາຍຮັບປະມານ 3,55 ລ້ານໂດ ລາສະຫະລັດຕໍ່ປີ. ໂຄງການກໍ່ສ້າງເຂື່ອນໄຟຟ້າ ຂະ ໜາດນ້ອຍນ້ຳຮຸ່ງ 1 ຖືວ່າເປັນການລົງທຶນ ຂອງນັກທຸລະກິດລາວ 100 ສ່ວນຮ້ອຍ ແລະ ເປັນຄົນທຳອິດ ໃນຂະແໜງພະລັງງານໄຟຟ້າ ຢູ່ ສປປ ລາວ.
ຫລັງ ຈາກນັ້ນ, ໃນຕອນເຊົ້າຂອງວັນທີ 2 ສິງຫາ 2015 ກໍໄດ້ມີພິທີວາງສີລາເລີກ ການກໍ່ສ້າງໂຄງການດັ່ງກ່າວ ແລະ ໄດ້ຮັບກຽດລັ່ນຄ້ອງ 9 ບາດ ຈາກທ່ານ ສົມສະຫວາດ ເລັ່ງສະຫວັດ ເພື່ອເປັນສີລິມຸງຄຸນ ແກ່ການກໍ່ສ້າງເຂື່ອນໄຟຟ້າດັ່ງກ່າວ ໃຫ້ມີຜົນສຳເລັດຢ່າງຈົບງາມ.
ຂອບໃຈຂ່າວຈາກ:
