ຂປລ. ໃນຕອນເຊົ້າຂອງວັນທີ 3 ສິງຫາ 2015 ເກີດເຫດນໍ້າຖ້ວມ ກະທັນຫັນໃນ 3 ເມືອງຄື: ບໍລິຄັນ, ປາກກະດິງ ແລະ ທ່າພະບາດ, ແຕ່ໃນນັ້ນ ມີພຽງເມືອງບໍລິຄັນເທົ່ານັ້ນ ທີ່ຖືກນໍ້າຖ້ວມຮຸນແຮງທີ່ສຸດ ໂດຍສະເພາະຢູ່ບ້ານປາກເຫືອງ ຖືກນໍ້າຖ້ວມທັງໝົດ 73 ຫລັງຄາເຮືອນ ສົ່ງຜົນເຮັດໃຫ້ປະຊາຊົນຕ້ອງຍົກຍ້າຍ ໜີຈາກເຫດນໍ້າຖ້ວມສຸກເສີນ.
ທ່ານ ດຣ. ກອງແກ້ວ ໄຊສົມຄາມ ເຈົ້າແຂວງໆບໍລິຄໍາໄຊ ໄດ້ໃຫ້ສໍາພາດຕໍ່ນັກຂ່າວ ສໍານັກຂ່າວສານປະເທດລາວ ໃນຕອນເຊົ້າວັນທີ 3 ສິງຫາ 2015 ນີ້ວ່າ: ພາຍຫລັງຝົນຕົກເປັນເວລາຫລາຍວັນ ສົ່ງຜົນເຮັດໃຫ້ນໍ້າຂອງ ແລະ ສາຂານໍ້າ ເພີ່ມປະລິມານຂຶ້ນກະທັນຫັນ ແລະ ໄຫລເຂົ້າຖ້ວມ 3 ເມືອງ: ບໍລິຄັນ, ປາກກະດິງ ແລະ ທ່າພະບາດ ເຮັດໃຫ້ບ້ານເຮືອນ ແລະ ເນື້ອທີ່ປູກເຂົ້ານາປີປະມານ 20 ພັນກວ່າເຮັກຕາ ຈົມໃຕ້ນໍ້າ ປັດຈຸບັນນີ້ ພວກເຮົາພ້ອມເຈົ້າໜ້າທີ່ສະເພາະກິດ ລົງພື້ນທີ່ກວດກາຕິດຕາມສະພາບການທີ່ເກີດຂຶ້ນ ໄປຄວບຄູ່ກັບການຊ່ວຍເຫລືອປະຊາຊົນເບື້ອງຕົ້ນ ໂດຍສະເພາະ ໄດ້ແຈກຈ່າຍເຂົ້າສານອາຫານແຫ້ງ, ຢາປິ່ນປົວພະຍາດ ແລະ ສິ່ງຈໍາເປັນໃຫ້ເຂົາເຈົ້າ. ນອກຈາກນີ້ ກໍໄດ້ແນະນໍາໃຫ້ປະຊາຊົນຍົກຍ້າຍ ແລະ ນໍາເອົາສິ່ງຂອງທີ່ຈໍາໄປຂຶ້ນໄວ້ບ່ອນສູງເຊັ່ນ: ສັດລ້ຽງ ແລະ ຊັບສິນທີ່ມີຄ່າ.
ທ່ານ ບຸນກອງ ນາຍບ້ານປາກເຫືອງ ເມືອງບໍລິຄັນ ໄດ້ເປີດຕໍ່ນັກຂ່າວສານປະເທດລາວ ຜ່ານໂທລະສັບວ່າ: ປັດຈຸບັນນີ້ ປະລິມານນໍ້າສູງເຖິງ 2 ແມັດກວ່າ ແລະ ໄດ້ໄຫລເຂົ້າຖ້ວມ ບ້ານປາກເຫືອງທັງໝົດ 73 ຫລັງ ຄາເຮືອນ ປະຊາຊົນສ່ວນໃຫຍ່ ບໍ່ມີນໍ້າກິນນໍ້າໃຊ້ ແຕ່ວັນທີ 2 ສິງຫາ ແລະ ພວກເຮົາພ້ອມອໍານາດປົກຄອງແຂວງ ພວມຊ່ວຍເຫລືອປະຊາຊົນຍົກຍ້າຍໄປຢູ່ເຂດປອດໄພແລ້ວ. ເມືອງບໍລິຄັນມີທັງໝົດ 600 ຫລັງຄາເຮືອນ ແລະ ນໍ້າຖ້ວມຮຸນແຮງທີ່ສຸດແມ່ນບ້ານປາກເຫືອງ.
ແນວໃດກໍດີ ກົມອຸຕຸນິຍົມ ແລະ ອຸທົກກະສາດ ຍັງແຈ້ງໃຫ້ຊາບວ່າ: ຝົນຍັງຈະສືບຕໍ່ຕົກຕື່ມອີກເປັນເວລາ 5 ວັນ, ສະນັ້ນ ຮຽກຮ້ອງໃຫ້ພໍ່ແມ່ປະຊາຊົນ, ພະນັກງານ, ທະຫານ, ຕໍາຫລວດ ແລະ ແຂກພາຍໃນ-ຕ່າງປະເທດ ຕ້ອງເພີ່ມຄວາມລະມັດລະວັງ ແລະ ມີສະຕິກ່ອນເດີນທາງ ຄວນກວດກາຕິດຕາມ ສະພາບອາກາດຢ່າງໃກ້ຊິດ ພ້ອມນີ້ຜູ້ຢູ່ໃກ້ຮ່ອມພູ, ແມ່ນໍ້າສາຂານ້ອຍ ແລະ ໃຫຍ່ ຕ້ອງຕິດຕາມເບິ່ງສະພາບນໍ້າຂຶ້ນຢ່າງໃກ້ຊິດ.
ຂອບໃຈຂ່າວຈາກ:
