ວັນທີ່ 2 ສິງຫາທີ່ຜ່ານມາ ສຳນັກຂ່າວ ‘ຊ່ຽງໄຮ້ອິດ’ ສື່ທ້ອງຖິ່ນໃນປະເທດຈີນ ລາຍງານເຫດການສຸດສະເທືອນໃຈ ທີ່ເກິດຂື້ນ (ອີກເທື່ອ) ໃນກໍລະນີ ຂັ້ນໄດເລື່ອນມໍລະນະ ທີ່ກ່ອນໜ້ານີ້ເປັນເຫດສະເທືອນໃຈ ທີ່ເກິດຂື້ນທັງໃນແລະຕ່າງປະເທດ ໂດຍລ່າສຸດ ປະຫວັດສາດຊ້ຳຮອຍອີກເທື່ອ ເມື່ອພະນັກງານເຮັດຄວາມສະອາດອາຍຸ 35 ປີ ຕ້ອງຕັດຂາຂ້າງໜຶ່ງຖິ້ມ ຫລັງຈາກປະສົບອຸປະຕິເຫດ ຂະນະເຮັດຄວາມສະອາດບໍລິເວນຂັ້ນໄດເລື່ອນໃນຫ້າງສິນຄ້າທີ່ຈົ່ງຊານ ພານ ໃນນະຄອນຊ່ຽງໄຮ້ຂອງຈີນ ແລະກາຍເປັນຜູ້ພິການເນື່ອງຈາກຂາຂ້າງໜຶ່ງໄດ້ຮັບບາດເຈັບສາຫັດ ແລະແພດໄດ້ລົງຄວາມເຫັນໃຫ້ຕັດຂາຂ້າງດັ່ງກ່າວຖິ້ມໄປເພື່ອຮັກສາຊີວິດຜູ້ເຄາະຮ້າຍໄວ້
ຢ່າງໃດກໍຕາມ ຫລັງຈາກເກີດເຫດ ຫ້າງສິນຄ້າແຫ່ງນັ້ນ ຕ້ອງປິດໃຫ້ບໍລິການຈາກເຫດການດັ່ງກ່າວ ເຊີ່ງເທື່ອນີ້ຖືເປັນເຫດການ ຈາກການໃຊ້ຂັ້ນໄດເລື່ອນ ເທື່ອທີ່ 3 ໃນຮອບ 1 ອາທິດ ໜຶ່ງໃນນັ້ນຄືເຫດການເກີດຂຶ້ນຂະນະທີ່ກ້ອງວົງຈອນປິດ ສາມາດຈັບພາບເຫດການທີ່ແມ່ລູກອ່ອນຄົນໜຶ່ງ ເຊີ່ງພະຍາຍາມຊ່ວຍຊີວິດລູກນ້ອຍ ກ່ອນທີ່ຮ່າງຕົນເອງຈະຖືກຂັ້ນໄດເລື່ອນດູດໄປ ແລະພົບເປັນສົບຢູ່ພາຍໃນເຄື່ອງໃນເວລາຕໍ່ມາ
ສ່ວນຈາກຂັ້ນຕອນການກວດສອບ ດ້ານຜູ້ຈັດການຫ້າງສິນຄ້າແຫ່ງນີ້ ສັນນິຖານວ່າ ສາເຫດຂອງເຫດບໍ່ຄາດຝັນໃນເທື່ອນີ້ ເກີດຈາກກົນໄກການເຮັດວຽກທີ່ບໍ່ເໝາະສົມຂອງຂັ້ນໄດເລື່ອນ
