ສຳນັກຂ່າວຕ່າງປະເທດ ລາຍງານໃນວັນທີ 2 ສິງຫາຜ່ານມານີ້ວ່າ ເຈົ້າໜ້າທີ່ພາສີຫວຽດນາມ ໄດ້ຍຶດອາຍຸດປືນສັ້ນ 94 ບອກ ພ້ອມລູກປືນອີກ 472 ນັດ ທີ່ສະໜາມບິນເຕິນເຊິ່ນເຍຶ໊ດ ນະຄອນໂຮ່ຈິມິນ ຈາກເຮືອບິນທີ່ເດີນທາງມາແຕ່ປະເທດຕວກກີ ໂດຍປືນດັ່ງກ່າວແມ່ນຜະລິດຢູ່ປະເທດສາທາລະນະລັດເຊັກ ຖືກສົ່ງມາຜ່ານບໍລິການຂົນສົ່ງສິນຄ້າຕາມປົກກະຕິ ແບບດຽວກັນກັບຊະນິດສິນຄ້າອື່ນໆ ໂດຍສື່ທາງການຂອງຫວຽດນາມລາຍງານວ່າ ປືນຈຳນວນດັ່ງກ່າວນີ້ ແມ່ນເປັນອາວຸດສຳລັບທະຫານ ແລະ ຜ່ານການສືບສວນສອບສວນໄດ້ຮູ້ວ່າ ອາດເປັນປືນທີ່ລັດຖະບານສິງກະໂປສັ່ງຊື້ ເພື່ອນຳໄປໃຊ້ໃນໜ່ວຍປະຕິບັດການພິເສດ ປ້ອງກັນຜູ້ນຳລະດັບສູງຂອງປະເທດ ແຕ່ການຈັດສົ່ງສິນຄ້າຈາກຕົ້ນທາງຜິດພາດ ເລີຍຂຶ້ນເຮືອບິນຜິດຖ້ຽວ ມາລົງທີ່ຫວຽດນາມແທນ.

ທັງນີ້ ຫວຽດນາມພ້ອມທີ່ຈະສົ່ງປືນດັ່ງກ່າວຄືນໄປຍັງສິງກະໂປ ຫລື ປາຍທາງອື່ນໆ ທີ່ມີຜູ້ສະແດງຫລັກຖານເຖິງຄວາມເປັນເຈົ້າຂອງຢ່າງແທ້ຈິງ.