ສຳນັກຂ່າວຕ່າງປະເທດ ລາຍງານໃນວັນທີ 2 ສິງຫາຜ່ານມານີ້ວ່າ ໄດ້ມີການກວດພົບຊາກຊິ້ນສ່ວນທີ່ອາດຈະເປັນປະຕູເຮືອບິນ ຖືກຄື້ນທະເລຊັດເຂົ້າມາຕິດຢູ່ຊາຍຫາດເກາະຣີອູນຶຍົງ ທາງພາກຕາເວັນຕົກຂອງມະຫາສະໝຸດອິນເດຍເພີ່ມອີກ ຫລັງຈາກທີ່ມີການຄົ້ນພົບຊາກຊິ້ນສ່ວນປີກຂອງເຮືອບິນທີ່ຊາຍຫາດເກາະດັ່ງກ່າວນີ້ 4 ມື້ຜ່ານມາ ໂດຍເຊື່ອວ່າອາດແມ່ນຊາກຊິ້ນສ່ວນຂອງເຮືອບິນໂບອິ້ງ 777 ຂອງສາຍການບິນມາເລເຊຍ ແອຣ໌ລາຍ ຖ້ຽວບິນ MH 370 ທີ່ຫາຍສາບສູນ ຫລັງຈາກທີ່ຂຶ້ນບິນອອກຈາກນະຄອນຫລວງກົວລາລຳເປີ ພ້ອມດ້ວຍຜູ້ໂດຍສານ ແລະ ລູກເຮືອລວມ 239 ຄົນ ຕັ້ງແຕ່ວັນທີ 8 ມີນາ 2014 ທີ່ຜ່ານມາ.
ທັງນີ້ ຊາກຊິ້ນສ່ວນທີ່ຄົ້ນພົບໃໝ່ນີ້ ແມ່ນຢູ່ລະຫວ່າງການກວດສອບໂດຍທີມງານເຈົ້າໜ້າທີ່ພາກສະໜາມທີ່ຢູ່ເທິງເກາະ ໂດຍຈາກນັ້ນຍັງຈະນຳສົ່ງໄປກວດສອບເພີ່ມຕື່ມທີ່ປະເທດຝຣັ່ງ ເຊັ່ນດຽວກັບຊາກຊິ້ນສ່ວນປີກຂອງເຮືອບິນ ທີ່ຖືກນຳສົ່ງໄປກວດສອບຢູ່ຝຣັ່ງກ່ອນແລ້ວ ໂດຍຜົນຂອງການກວດສອບ ແມ່ນຈະສາມາດຢັ້ງຢືນໄດ້ວ່າ ຊິ້ນສ່ວນດັ່ງກ່າວແມ່ນຊິ້ນສ່ວນຂອງເຮືອບິນທີ່ຫາຍສາບສູນ ຫລື ບໍ່.
