1G 2G 3G 4G (LTE) ມັນແມ່ນຫຍັງ ?
ຈາກທີ່ເຮົາໄດ້ຮັບຮູ້ຄໍາວ່າ 3G ເມື່ອ 2-3 ປີກ່ອນ ມາຮອດມື້ນີ້ ມັນເລີ່ມຈະປ່ຽນຈາກ 3G ມາເປັນຄໍາວ່າ 4G ຫຼື LTE ໂຕທ່ານເອງ ເຄີຍເຂົ້າໃຈບໍ່ ຄໍາພວກ GPRS, EDGE, HSPA, 1G, 2G, 3G, 4G ຫຼື LTE ມັນແມ່ນຫຍັງກັນແທ້ ເຄີຍໄດ້ຍິນຊື່ຢູ່ແຕ່ກໍ່ບໍ່ ຮູ້ວ່າມັນຈະມີຄວາມສໍາຄັນຫຍັງກັບເຮົາ ດັ່ງນັ້ນໃນບົດຄວາມນີ້ ເຮົາຈະມາອະທິບາຍໃຫ້ທ່ານຜູ້ອ່ານໄດ້ເຂົ້າໃຈ ກັນແບບພາສາບ້ານໆ ເວົ້າງ່າຍໆ ຮູ້ໃຈຄວາມວ່າມັນແມ່ນຫຍັງກັນແທ້ອັນສິ່ງເລົ່ານີ້ ເຮົາວ່າເລີ່ມກັນເລີຍ:
1 G (1 st Generation)ໂລກຂອງ Analog (ໂທລົມກັນໄດ້ຢ່າງດຽວ)
1G ກໍ່ຖືເປັນລຸ້ນແຕ່ກີ້ແຕ່ກ່ອນພຸ້ນລະ ເຮົາຍັງຈື່ກັນບໍ່ວ່າສະໄໝ SIM Card ໂທລະສັບລາຄາແພງໆ ແລະ ໜ່ວຍໂທລະສັບກໍ່ເທົ່າ ຂາໂຕ້ (ຂາໂຕ້ຄົນຈ່ອຍເດີ້ ຫະຫະ) ໃນເມື່ອທີ່ເປັນ 1G ນັ້ນແມ່ນເຮົາສາມາດໃຊ້ໂທລະສັບໃນການ ໂທເຂົ້າ – ໂທອອກ ຫາກັນໄດ້ ເທົ່ານັ້ນ ບໍ່ສາມາດທີ່ຈະສົ່ງ SMS ຫາກັນໄດ້ເທື່ອ ດັ່ງນັ້ນໃນສະໄມນັ້ນຈຶ່ງມີການສົ່ງ SMS ຫາເຄື່ອງ “ເຜດເຈີ” (ບໍ່ຮູ້ວ່າຂຽນເປັນ ອັງກິດແນວໃດ) ເພື່ອເປັນການຝາກຂໍ້ຄວາມຫາກັນແທນ.
2 G ( 2 nd Generation)
ໂລກຂອງ Digital (ດາວໂຫຼດ Ringtone ໄດ້ແລ້ວ)
ຖ້າໃຜຍັງຈື່ຕອນພາກັນຫາດາວໂຫຼດ Ringtone ສຽງຄັກໆມາໃສ່ໂທລະສັບ ພາກັນແຂ່ງຫຼິ້ນເກມງູໃນ Nokia ຢູ່ ນັ້ນກໍ່ຖືວ່າ (ທ່ານມີອາຍຸຫຼັກ 2x ຂຶ້ນໄປແລ້ວໃນຕອນນີ້ ຫະຫະ) ນັ້ນແມ່ນເປັນການເລີ່ມຕົ້ນຂອງ ໂລກ 2G ເຂົ້າມາແລ້ວ ໃນຕອນນັ້ນເອງລາຄາ ໂທລະສັບ ແລະ SIM Card ກໍ່ມີລາຄາຖືກລົງຫຼາຍເຮັດໃຫ້ມີການເພີ່ມການໃຊ້ງານໂທລະສັບຫຼາຍຂຶ້ນຫຼາຍ ຖ້າສົມທຽບໃສ່ຕອນ 1 G ແລະ ຈຸດນີ້ເອງກໍ່ເປັນການເລີ່ມຕົ້ນຂອງໂລກໂທລະສັບຈໍສີ ແລະ ເລີ່ມມີການໃຊ້ງານເລື່ອງຂອງ ຮູບພາບ(wallpaper) ວິດີໂອ ກ້ອງຖ່າຍຮູບແບບພໍເບິ່ງອອກວ່າມັນແມ່ນຮູບຊື່ໆ. ໃນຕອນທີ່ເປັນຍຸກສະໄໝ 2 G ນີ້ແມ່ນໄດ້ເລີ່ມມີຄໍາວ່າ GPRS ແລະ EDGE ເຂົ້າມານໍາ ແຕ່ມັນຍັງເອີ້ນວ່າ 2G ຢູ່ ຍັງບໍ່ແມ່ນ 3G ເທື່ອ.
- GPRS ຫຼື (General Packet Radio Service) ແມ່ນເປັນການພັດທະນາຈາກຈຸດເລີ່ມຕົ້ນຂອງ 2G ໃຫ້ດີຂຶ້ນມາອີກ ລະດັບໜຶ່ງ ແລະ ກໍ່ເປັນຈຸດເລີ່ມຕົ້ນຂອງ GSM (Global System for Mobilization) ໃນບ້ານເຮົາແມ່ນຈະໃຊ້ລະບົບນີ້ ແລະ CDMA (Code Division Multiple Access) ຕ່າງປະເທດບາງປະເທດຈະໃຊ້ລະບົບນີ້ ແລ້ວກໍ່ໄດ້ເກີດຄໍາວ່າ Roaming ຂຶ້ນມາ ” Roaming ” ແມ່ນປະມານວ່າເຮົາສາມາດເອົາໂທລະສັບຂອງເຮົາຕິດໂຕ ໄປຫຼິ້ນຕ່າງປະເທດໃດ ກໍ່ສາມາດ ໂທຫາ ເບີໃນປະເທດລາວໄດ້ ທຸກບ່ອນ ທົ່ວໂລກປະມານນັ້ນ” ແລະ ກໍ່ຍັງໄດ້ເພີ່ມຄວາມໄວຂອງການດາວໂຫຼດອັບໂຫຼດຂຶ້ນໄປອີກ.
- EDGE ຫຼື (Enhanced Data rates for Global Evolution) ໃນຕອນນີ້ເອງບ້ານເຮົາເລີ່ມຈະພາກັນຫຼິ້ນ Internet ຜ່ານໂທລະສັບຫຼາຍຂຶ້ນ (ພາກັນເລີ່ມໃຊ້ Opera mini, ebuddy, Hi5, MSN, Youtube, Google, Yahoo, Hotmail ອື່ນໆ…) ແລະ ກໍ່ເປັນຊ່ວງເວລາສໍາຄັນສໍາລັບບ້ານເຮົາ ເພາະໄດ້ເລີ່ມມີການໃຊ້ບໍລິການ Internet ຫຼາຍຂຶ້ນຫຼາຍ (ເລີ່ມ ຮູ້ຈັກກັບສຽງປະຫຼາດໆຈາກ Dail-Up ແລະ ຮູ້ຈັກການໃຊ້ງານບັດ One4Click ຫຼື ພາກັນໄປຮ້ານ Internet ເພື່ອໄປຫຼິ້ນເກມ Counter Strike ແລະ Red Alert. ໃນຕອນນັ້ນເອງ ເຮົາເລີ່ມຮູ້ສຶກແລ້ວວ່າ ເລື່ອງພວກ Multimedia ໄດ້ເລີ່ມມີບົດບາດທີ່ ສໍາຄັນຫຼາຍຂຶ້ນ ດ້ວຍຂໍ້ຈໍາກັດຂອງ 2G ທີ່ເລີ່ມຈະບໍ່ຕອບສະໜອງທັນ ຄວາມຕ້ອງການຂອງຄົນເຮົາຈຶ່ງໄດ້ມີການພັດທະນາຂຶ້ນໄປ ອີກ ຫຼັງຈາກນັ້ນກໍ່ເລີ່ມເຂົ້າສູ່ 3G.
3 G (3 rd Generation)
ໂລກຂອງ SmartPhone (SEA Games ແລະ iPhone Fever)
ໃນປີ 2009 ປະເທດລາວເຮົາເປັນເຈົ້າພາບໃນການຈັດງານ ມະຫາກໍາກິລາ SEA Games Laos Vientiane ຄັ້ງທີ 25 ຊຶ່ງກ່ອນ ຈະຮອດ ມື້ເປີດງານ SEA Games ນີ້ເອງແມ່ນປະເທດລາວເຮົາເລີ່ມບຸກໜັກ ໝົດທຸກຄ້າຍເຄືອຂ່າຍ ແມ່ນເລັ່ງ Promote ເລື່ອງ ຂອງ 3G + AirCard ເລີຍເຮັດໃຫ້ຫຼາຍໆຄົນຮູ້ຈັກຄໍາວ່າ 3G ແລະ AirCard ດັງຈົນປະເທດເພື່ອນບ້ານເອົາໄປເປັນ ຂ່າວກັນເລີຍ ແລະ ກ່ອນໜ້ານີ້ໃນປີ 2007 ແມ່ນເປັນປີປະຫວັດສາດຂອງໂລກ Smartphone ເພາະເປັນການເປີດໂຕ iPhone ລຸ້ນທໍາອິດ ແລະ ເປັນໂທລະສັບທີ່ນິຍົມຈົນຮອດມື້ນີ້. ຊຶ່ງມັນສະແດງໃຫ້ເຮົາເຫັນໄດ້ວ່າເຮົາສາມາດນໍາໃຊ້ເທັກໂນໂລຊີ 3G ນີ້ເຮັດໄດ້ຫຼາຍກວ່າ 2G ຫຼາຍ ບໍ່ວ່າຈະເປັນການໃຊ້ງານ Video/Call Conference ໂທຫາຄົນອີກມຸມໂລກໜຶ່ງໄດ້ແບບເຫັນໜ້າເຫັນ ຕາກັນທັນ ທີທັນໃຈ , ເລີ່ມມີການດາວໂຫຼດເພງ ຮູບເງົງຕ່າງໆ ຫຼື ຈະເປັນການເບິ່ງໜັງແບບ Live Steaming ແນ່ນອນວ່າ Youtube ກໍ່ຈັດໃນໝວກນີ້ນໍາ. ເຊື່ອວ່າຫຼາຍໆຄົນດຽວນີ້ເວລາເຮົາເຊື່ອມຕໍ່ Internet ໃນໂທລະສັບເຮົາອາດຈະຂຽນເປັນ 3G ຫຼື H ຫຼື H+ ນັ້ນໝາຍຄວາມວ່າເຮົາກໍ່ຍັງຢູ່ໃນລະດັບ 3G ຄືກັນ.
- HSPA ຫຼື (High Speed Packet Access) ແລະ H + ແມ່ນອີກໜຶ່ງກ້າວໃນການພັດທະນາຂອງ 3G ໃຫ້ມີຄວາມໄວ ທີ່ເພີ່ມຂຶ້ນນັ້ນເອງ ຊຶ່ງແນ່ນອນວ່າມັນບໍ່ແມ່ນ 4G ເທື່ອ ຍັງຈັດໃນໝວດຂອງ 3G ຢູ່ ມັນກໍ່ບໍ່ມີຫຍັງໃຫ້ອະທິບາຍຫຼາຍໃນສ່ວນນີ້ ໃຫ້ຮູ້ແຕ່ວ່າມັນເປັນການພັດທະນາຂອງ 3G ເທົ່ານັ້ນ
4 G ( 4 th Generation) ອີກຊື່ໜຶ່ງເອີ້ນວ່າ LTE
ໃຫ້ເຂົ້າໃຈນໍາກັນກ່ອນວ່າ 4G ກັບ LTE (Long Term Evolution) ມັນແມ່ນອັນດຽວກັນ ຄໍາວ່າ 4G ເປັນຄໍາທີ່ມັກໃຊ້ໃນ ການໂຄສະນາ ເພາະມັນຈື່ງ່າຍກວ່າຄໍາວ່າ LTE. ໃນປະເທດເຮົາເອງ ຈາກປີ 2013 ເປັນປີທີ່ເຮົາເລີ່ມໄດ້ຍິນຄໍາວ່າ 4G ໃນໃບ Promote ຕ່າງໆ ຂຶ້ນມາ ແລະ ປີນີ້ ປີ 2014 ເຮົາກໍ່ເລີ່ມທີ່ຈະໄດ້ໃຊ້ເທັກໂນໂລຊີ 4G ກັບໂຕເຮົາເອງແລ້ວ ແຕ່ວ່າ ການທີ່ຈະໄດ້ໃຊ້ 4G ນີ້ມັນບໍ່ງ່າຍຄືສະໄໝເຮົາໃຊ້ 2G ແລ້ວມາປ່ຽນເປັນ 3G ເພາະວ່າການປ່ຽນມາໃຊ້ 4G ນີ້ ແມ່ນທັງຜູ້ໃຫ້ບໍລິການທາງດ້ານເຄືອ ຂ່າຍ ແລະ ອຸປະກອນທີ່ຈະໃຊ້ຕໍ່ 4G ນີ້ ມັນຕ້ອງຮອງຮັບທັງສອງຟ່າຍ ເຊັ່ນວ່າທີ່ມີໂທລະສັບທີ່ຮອງຮັບ 4G ແຕ່ຜູ້ໃຫ້ບໍລິການ ທາງດ້ານ internet ບໍ່ຮອງຮັບ 4G ເທື່ອ ແມ່ນທ່ານຈະບໍ່ສາມາດໃຊ້ງານ 4G ໄດ້ ແລະ ຈະໄດ້ໃຊ້ 3G ແທນ. ທີ່ສໍາຄັນໃນຕອນນີ້ ວັນທີ 16 ເດືອນ 5 ປີ 2014 ແຕ່ລະເຈົ້າຜູ້ໃຫ້ບໍລິການໂທລະຄົມບ້ານເຮົາຍັງບໍ່ໄດ້ມີການເປີດໂຕຢ່າງເປັນທາງການເທື່ອ ເພາະຍັງຢູ່ໃນ ຂັ້ນຕອນການທົດລອງພາຍໃນກ່ອນ.
ໃນເລື່ອງ 4G ຫຼື LTE ນີ້ເຮົາຈະໃຫ້ຄວາມສໍາຄັນມັນເປັນພິເສດແນ່ໜ້ອຍໜຶ່ງ ດັ່ງນັ້ນຈຶ່ງຈະຂໍແຍກອອກມາເປັນຈຸດໆໄປ
4G ຫຼື LTE
ມັນຄັກກວ່າ 3G ແນວໃດ ?
ແນ່ນອນວ່າ ເທັກໂນໂລຊີ 4G ຫຼື LTE ມັນເປັນການພັດທະນາຕໍ່ຈາກ 3G ດັ່ງນັ້ນມັນຈະມີການເພີ່ມຄວາມສາມາດຫຼາຍໆຢ່າງ ແລະ ເປັນມາດຕະຖານທີ່ຈະຮອງຮັບກັນໄດ້ທົ່ວໂລກ ທີ່ສໍາຄັນແມ່ນຈະເປັນເທັກໂນໂລຊີທີ່ໃຊ້ກັນແບບຍາວນານເບິ່ງໄດ້ຈາກຊື່ LTE “Long Term Evolution” ອີກຈຸດໜຶ່ງທີ່ສໍາຄັນທີ່ສຸດແມ່ນມັນໄວກວ່າ 3G ຫຼາຍເທົ່າໂຕເລີຍໃນເລື່ອງຂອງການ ຮັບ- ສົ່ງ ຂໍ້ມູນ ສະຫຼຸບຄືມັນຄັກກວ່າ 3G ແຕ່ກໍ່ມີເງື່ອນໄຂທີ່ໄດ້ກ່າວໄປກ່ອນໜ້ານີ້ເລື່ອງຂອງການຮອງຮັບຂອງອຸປະກອນ.
ບ້ານນ້ອງຢູ່ “ໂສກປ່າຫຼວງ”
ກະຊິຫຼິ້ນ 4G ໄດ້ບໍ່ອ້າຍ
ເນື່ອງຈາກສັນຍາ 4G ຍັງບໍ່ໄດ້ຄວບຄຸມທົ່ວປະເທດ (ໃນຕອນນີ້ 3G ກໍ່ຍັງບໍ່ຄວບຄຸມທົ່ວປະເທດເທື່ອ) ດັ່ງນັ້ນແລ້ວມັນຂຶ້ນກັບ ວ່າບ້ານເຮົາຢູ່ໃສ ແລະ ສັນຍານ 4G ນັ້ນມາຮອດບ້ານເຮົາບໍ່ ແນ່ນອນວ່າອະນາຄົດບໍລິສັດຫຼືຜູ້ໃຫ້ບໍລິການທາງດ້ານ ໂທລະຄົມຍັງຈະ ຕ້ອງມີການຂະຫຍາຍໂຕອອກໄປຢູ່ດັ່ງນັ້ນກໍ່ຖ້າຕໍ່ໄປ ຈົນກວ່າສັນຍານຈະມາຮອດເຂດທີ່ເຮົາຕ້ອງການໃຊ້ງານ 4G.
(ຮູບປະກອບຕົວຢ່າງຂອງຄື້ນສັນຍານໂທລະສັບ)
ຂ້ອຍໃຊ້ 4Gມັນຕ້ອງດາວໂຫຼດໂຄດໄວເລີຍ
ໃນເລື່ອງຂອງຄວາມໄວໃນການຫຼິ້ນ internet ດາວໂຫຼດນັ້ນນີ້ ແນ່ນອນວ່າຕາມຫຼັກການແລ້ວ 4G ມັນຕ້ອງໄວ້ກວ່າ 3G ແນ່ນອນ ແຕ່ມັນກໍ່ບໍ່ສະເໝີໄປ. ທ່ານຍັງຈື່ໄດ້ບໍ່ວ່າຕອນທີ່ເລີ່ມມີການເປີດໃຊ້ງານ 3G ໃໝ່ໆ ຮູ້ໄດ້ເລີຍວ່າມັນໄວຫຼາຍ ໄວຈົນບໍ່ຮູ້ວ່າຈະດາວ ໂຫຼດຫຍັງດີກໍ່ມີ ແຕ່ມາເບິ່ງທຸກມື້ນີ້ມັນບໍ່ໄດ້ມີຄວາມຮູ້ສຶກວ່າໄວຄືເກົ່າແລ້ວ ເນື່ອງຈາກຈໍານວນຄົນໃຊ້ຫຼາຍຂຶ້ນ ເລີຍເຮັດໃຫ້ມີການ ແບ່ງ ຄວາມໄວ້ຂອງ Internet ກະຈາຍອອກໄປຕາມເຂດນັ້ນໆ ເຊັ່ນຕົວຢ່າງ ຂ້ອຍຫຼິ້ນ internet ຢູ່ບ້ານ ໄວກວ່າຕອນຫຼິ້ນຢູ່ ໂຮງຮຽນ ຫຼື ບ່ອນເຮັດວຽກ.
ເຮົາຈະຮູ້ໄດ້ແນວໃດວ່າເຄື່ອງເຮົາສາມາດຮອງຮັບ 4G ຫຼື ບໍ່
ຈຸດນີ້ແມ່ນໃຫ້ສັງເກດ Logo ທີ່ເປັນຮູບ 4G ຫຼື LTE ເພາະມັນຈະເປັນມາດຕະຖານສາກົນຢູ່ແລ້ວວ່າເຄື່ອງນີ້ຮອງຮັບຫຼືບໍ່ ແຕ່ຖ້າທ່ານອາດຈະບໍ່ແນ່ໃຈ ແມ່ນເວລາຊື້ເຄື່ອງພວກ Smartphone ແມ່ນໃຫ້ສັງເກດຂ້າງກ່ອງມັນຈະຂຽນບອກໄວ້ຢູ່ ຫຼື ຖາມພະນັກງານຂາຍເລີຍກໍ່ດີ
ຈະຮູ້ໄດ້ແນວໃດວ່າຄວາມໄວຂອງ
Internet ທີ່ເຮົາໃຊ້ຢູ່ນັ້ນມັນໄວເທົ່າໃດ
ວິທີກວດວ່າຄວາມໄວ internet ທີ່ເຮົາໃຊ້ຢູ່ນັ້ນ ແມ່ນໄວເທົ່າໃດ ແມ່ນເຮົາສາມາດດາວໂຫຼດໂປຼແກຼມທີ່ມີຊື່ວ່າ Speedtest ມາລອງເບິ່ງ ຫຼືອາດຈະກວດຜ່ານ Web Browser ກໍ່ໄດ້ ໂດຍພິມໃສ່ວ່າ www.speedtest.net ແລ້ວກໍ່ BEGIN TEST ໄດ້ເລີຍ.
ສຸດທ້າຍນີ້ກໍ່ຈະຂໍເອົາ info-graphic ຄວາມໄວຂອງ internet ຕັ້ງແຕ່ 1G 2G 3G 4G ມາໃຫ້ເບິ່ງນໍາກັນວ່າຄວາມ ໄວເລົ່ານີ້ ມັນແຕກຕ່າງກັນຫຼາຍບໍ່
ທີ່ມາ: http://mobiletalk.tv/