ຕາມຂ່າວຕ່າງປະເທດ ເວັບໄຊຕ໌ຂ່າວ ‘ເດີກາດຽນ’ລາຍງານວ່າ ຄະນະກຳມະການວິຫານເຈົ້າແມ່ກາທິໄມໃນເນປານໄດ້ປະກາດສັ່ງຍຸດຕິປະເພນີຂ້າໝູ່ສັດນັບແສນຊີວິດຂອງຊາວຮິນດູເພື່ອບູຊາຍັນແກ່ເຈົ້າແມ່ກາທິໄມ ຫລັງຈາກປະຕິບັດກັນມາດົນເຖິງ 400 ປີ
ປະເພນີຂ້າໝູ່ສັດຈະມີຂຶ້ນທຸກໆ 5 ປີ ມັກມີຊາວຮິນດູທັງຈາກເນປານແລະອິນເດຍມາເບີ່ງພິທີ ແລະໄດ້ຮັບສຽງປະນາມຈາກອົງກອນພິທັກສັດທົ່ວໂລກມາດົນຫລາຍປີ ຈົນກະທັ້ງລ່າສຸດ ນາຍ’ໂມຕິລັນ ປາສາດ’ເລຂາທິການຄະນະກຳມະການວິຫານໄດ້ປະກາດຍົກເລີກພິທີການນີ້ຢ່າງເປັນທາງການ
“ເຮົາສຳນຶກໄດ້ແລ້ວວ່າສັດກໍມີຊີວິດເໝືອນກັບເຮົາ ມີເນື້ອໜັງມັງສາເໝືອນກັບເຮົາ ແລະມີຄວາມຮູ້ສຶກເຈັບປວດເຊັ່ນດຽວກັບເຮົາ”
ປະເພນີຂ້າສັດສັງເວີຍເຈົ້າແມ່ນັ້ນ ມີຂຶ້ນເທື່ອລ່າສຸດເມື່ອເດືອນພະຈິກຂອງປີທີ່ແລ້ວ ເຊີ່ງມີຜູ້ໃຫ້ຄວາມສົນໃຈເຂົ້າຊົມພິທີກວ່າ 2.5 ລ້ານຄົນ ແລະມີສັດຖືກສັງຫານໄປຈຳນວນກວ່າ 2 ແສນຊີວິດ
ນາຍໂມຕິລັນກ່າວຕໍ່ວ່າ ບໍ່ແມ່ນເລື່ອງງ່າຍເລີຍທີ່ຈະຍຸດຕິປະເພນີທີ່ມີມາດົນກວ່າ 400 ປີ ແຕ່ຢ່າງນ້ອຍທາງຄະນະກຳມະການວິຫານຍັງມີເວລາອີກ 4 ປີເພື່ອໂນ້ມນ້າວໃຫ້ຊາວຮິນດູເຫັນວ່າເຮົາບໍ່ຈຳເປັນຕ້ອງຂ້າສັດເພື່ອສັງເວີຍເທບພະເຈົ້າອີກຕໍ່ໄປ
ການຕັດສິນໃຈຂອງຄະນະກຳມະການວິຫານໃນເທື່ອນີ້ ຍັງສ້າງຄວາມດີໃຈໃຫ້ແກ່ບັນດາກຸ່ມຜູ້ພິທັກສັດທົ່ວໂລກເຊີ່ງໄດ້ໃຊ້ເວລາຫລາຍປີໃນການຍື່ນຄຳຂໍໃຫ້ລົ້ມເລີກເທດສະການດັ່ງກ່າວ
ທີ່ມາ: theguardian