ສຳນັກຂ່າວຕ່າງປະເທດ ລາຍງານວ່າ ໃນວັນອາທິດທີ 26 ກໍລະກົດຜ່ານມານີ້ ທ່ານ ມາເຣັກ ເບນກາ ປະທານທະນາຄານກາງໂປໂລຍ ໄດ້ອອກມາຢືນຢັນວ່າ ປະເທດຂອງຕົນບໍ່ປາຖະໜາທີ່ຈະເຂົ້າເປັນສ່ວນໜຶ່ງຂອງກຸ່ມປະເທດໃຊ້ເງິນສະກຸນເອີໂຣ ຫລື ເອີໂຣໂຊນ ທີ່ປັດຈຸບັນມີສະມາຊິກ 19 ປະເທດໃນເອີຣົບ ໂດຍບໍ່ວ່າຈະແມ່ນເວລານີ້ ຫລື ໃນອານາຄົດກໍຕາມ ເນື່ອງຈາກບໍ່ຕ້ອງການປະເຊີນກັບຄວາມສ່ຽງໃດໆ ທີ່ຈະນຳມາເຊິ່ງວິກິດການທາງດ້ານເສດຖະກິດ ແລະ ການເງິນ.
ທ່ານ ເບນກາ ໄດ້ເວົ້າວ່າ ກຸ່ມເອີໂຣໂຊນໃນເວລານີ້ ມີສະພາບບໍ່ແຕກຕ່າງຫຍັງຈາກອົງການຄວາມຮ່ວມມື ທີ່ສ່ຽງຈະຖືກເຜົາຈົນມອດໄໝ້, ສິ່ງທີ່ເກີດຂຶ້ນກັບສະມາຊິກເອີໂຣໂຊນຢ່າງປະເທດເກຣັກນັ້ນ ໄດ້ເຮັດໃຫ້ເຮົາໜ່າຍໜ້າ ແລະ ບໍ່ປາຖະໜາທີ່ຈະເຂົ້າໄປເປັນສ່ວນໜຶ່ງຂອງວິກິດການດັ່ງກ່າວນີ້.
ທ່ານຍັງກ່າວອີກວ່າ ມີຄວາມສ່ຽງສູງຫລາຍທີ່ກຸ່ມເອີໂຣໂຊນ ຈະຕິດຢູ່ໃນວັງຄົນແຫ່ງຄວາມຜິດພາດລົ້ມເຫລວ ຕາບໃດທີ່ບັນດາສະມາຊິກຍັງຄົງມີຈຸດຢືນທີ່ແຕກຕ່າງກັນຢ່າງສິ້ນເຊີງ ໂດຍສະເພາະໃນເລື່ອງຂອງການບັງຄັບໃຊ້ມາດຕະການຮັດເຂັມຂັດ ແລະ ປະຕິຮູບໂຄງສ້າງ.