ສຳນັກຂ່າວຕ່າງປະເທດ ລາຍງານໃນວັນທີ 27 ກໍລະກົດນີ້ວ່າ ປະທານາທິບໍດີ ບາຊາ ອັນ-ອັດຊາດ ແຫ່ງປະເທດຊີຣີ ໄດ້ຖະແຫລງຕໍ່ສາທາລະນະເປັນຄັ້ງທຳອິດໃນຮອບກ່ວາ 1 ປີ ໃນມື້ວັນອາທິດ (26 ກໍລະກົດ) ໂດຍຍອມຮັບວ່າ ກອງທັບຊີຣີ ມີກຳລັງພົນບໍ່ພຽງພໍທີ່ຈະປ້ອງກັນດິນແດນທັງໝົດຂອງປະເທດຈາກກຸ່ມຕິດອາວຸດ ຈົນຖືກບີບໃຫ້ຍອມປະຖິ້ມບາງພື້ນທີ່ ເພື່ອຮັກສາສ່ວນອື່ນເອົາໄວ້.
ທັງນີ້ ສົງຄາມກາງເມືອງຢູ່ຊີຣີ ລະເບີດຂຶ້ນໃນເດືອນມີນາ 2011 ເຊິ່ງໄດ້ລ່ວງເວລາເຂົ້າສູ່ປີທີ 5 ແລ້ວ ເຮັດໃຫ້ມີຜູ້ເສຍຊີວິດຫລາຍກ່ວາ 230,000 ຄົນ ແລະ ປະຊາຊົນຫລາຍລ້ານຄົນ ຕ້ອງກາຍເປັນຄົນພັດຖິ່ນ ໂດຍພື້ນທີ່ຂອງປະເທດຫລາຍສ່ວນ ໄດ້ຖືກກຸ່ມລັດອິດສະລາມ ຫລື ໄອເອັສ ຍຶດຄອງ ບໍ່ໄດ້ຢູ່ພາຍໃຕ້ອຳນາດອະທິປະໄຕຂອງລັດຖະບານຊີຣີອີກຕໍ່ໄປ.