ເມື່ອວັນທີ່ 23 ທີ່ຜ່ານມາ ບີບີຊີລາຍງານວ່າ ນັກວິທະຍາສາດສຳນັກງານບໍລິຫານການບິນແລະອາວະກາດແຫ່ງຊາດ ສະຫາລັດອະເມລິກາ ຖະແຫລງການຄົ້ນພົບດາວດວງໃໝ່ລັກສະນະຄ້າຍໂລກຫລາຍທີ່ສຸດ ຜ່ານການສຳລວດດ້ວຍກ້ອງໂທລະທັດເຄບເລີ ຈຶ່ງຕັ້ງຊື່ດາວເຄາະດວງນີ້ວ່າ ເຄບເລີ 452ບີ (Kepler-452b) ສ່ວນສຳນັກຂ່າວແຫ່ງຕ່າງໆ ພາດຫົວຂ່າວເອີ້ນວ່າ Earth 2.0
ເຄບເລີ 452ບີ ຢູ່ຫ່າງຈາກໂລກ 1,400 ປີແສງ ຢູ່ໃນກຸ່ມດາວຊິກນັດ ເຄບເລີ 452ບີໂຄຈອນຫ່າງຈາກດາວເລິກຂອງມັນ ຄ້າຍກັບໂລກໂຄຈອນຮອບດວງອາທິດ ເຖິງວ່າດາວຈະໃຫຍ່ກວ່າໂລກເຖິງ 60% ວັດຕາມເສັ້ນຜ່ານສູນກາງ ແຕ່ມີຂະໜາດນ້ອຍແລະເຢັນພໍທີ່ຈະມີນ້ຳທີ່ພື້ນຜິວໄດ້ ເຊີ່ງຫາກເປັນເຊັ່ນນັ້ນໝາຍຄວາມວ່າເປັນທີ່ຢູ່ຂອງສິ່ງມີຊີວິດໄດ້
ພາບກາບຟິກຂອງນາຊ່າທີ່ວາດຕາມຖານຂໍ້ມູນດາວເຄບເລີ 452ບີ
ຈອນ ກັນສ໌ເຟດ ຫົວໜ້າທີມນາຊ່າ ເອີ້ນວ່າ ດາວດວງນີ້ມີລັກສະນະໃກ້ຄຽງໂລກຫລາຍທີ່ສຸດ ສ່ວນຈອນ ເຈນຄິນສ໌ ຫົວໜ້າທີມວິເຄາະຂໍ້ມູນຂອງສູນວິໄຈແອມເມດຂອງນາຊ່າ ໃນລັດແຄລິຟໍເນຍກ່າວເສີມວ່າ “ເປັນເລື່ອງພິເສດສຸດທີ່ຈະແຈ້ງຂ່າວທ່ານໃນມື້ນີ້ວ່າ ເຮົາໄດ້ພົບນ້ອງໃໝ່ທີ່ຢູ່ຖັດໄປໃກ້ໆ ນີ້ເອງ”
ການຄົ້ນພົບເທື່ອນີ້ ເປັນການພົບດາວເຄາະຄ້າຍໂລກເພິ່ມເຕິມຈາກດາວເຄບເລີ 186 ເອັບ (Kepler-186f) ທີ່ສ້າງຄວາມຮືຮາໃນປີທີ່ແລ້ວ ແຕ່ 186ເອັບ ມີຂະໜາດນ້ອຍກວ່າດາວໃໝ່ນີ້
ນອກຈາກນີ້ດາວເລິກຂອງມັນຍັງມີຂະໜາດໃກ້ຄຽງດວງອາທິດ ໃຫຍ່ກວ່າພຽງ 4% ແລະດາວເຄບເລີ 452ບີ ໃຊ້ເວລາໂຄຈອນຮອບດາວເລິກດົນກວ່າໂລກໂຄຈອນຮອບດວງອາທິດພຽງ 5% ຫລືທຽບແລ້ວ ຄະນະທີ່ໂລກໃຊ້ເວລາ 365 ມື້ໂຄຈອນຮອບດວງອາທິດ ເຄບເລີ 452ບີ ໃຊ້ 385 ມື້ໂຄຈອນຮອບດາວເລິກ
ຫາກຄິດໄລ່ຕາມນີ້ຊື່ວ່າ ດາວເລິກຂອງເຄບເລີ 452ບີ ໜ້າຈະມີອາຍຸແກ່ກວ່າດວງອາທິດ 1,500 ລ້ານປີ (ດວງອາທິດມີອາຍຸ 4, 500 ລ້ານປີ) ຄະນະທີ່ເຄບເລີ 452ບີ ມີອາຍຸໃກ້ໆກັນ ດັ່ງນັ້ນເຄບເລີ 452ບີ ຈະເປັນດາວທີ່ສະແດງໃຫ້ໂລກເຫັນອະນາຄົດຂອງຕົວເອງໃນ 1 ພັນປີຈາກນີ້ໄປ
“ຖ້າເຄບເລີ 452ບີ ເປັນດາວເຄາະຫິນ ສະຖານະການເທິງດາວໜ້າຈະເຂົ້າສູ່ຊ່ວງຄຸມພາວະເຮືອນກະຈົກບໍ່ໄດ້ແລ້ວ ການເພີ່ມຂຶ້ນຂອງພະລັງງານທີ່ມາຈາກດາວເລິກທີ່ມີອາຍຸຫລາຍແລ້ວ ອາດເປັນຕົວເຜົາພື້ນຜິວແລະເຮັດໃຫ້ມະຫາທະເລລະເຫີຍ ໄອນ້ຳອາດຈະຫາຍໄປຈາກດາວແລ້ວກໍໄດ້” ດຮ.ດັກ ຄານເວນລ໌ ຜູ້ຮ່ວມພາລະກິດເຄບເລີກ່າວ
ພາບວາດຈາກຂໍ້ສັນນິດຖານວ່າເຄບເລີ 452ບີ ມີລັກສະນະເປັນຫິນແລະມີສະພາບອາກາດທີ່ເຂົ້າສູ່ຊ່ວງພາວະເຮືອນກະຈົກຄຸມບໍ່ໄດ້ແລ້ວ
