ມຽນມາ ໄດ້ຕັດສິນຈຳຄຸກຕະຫຼອດຊີວິດໃຫ້ແກ່ຊາວ ຈີນ 153 ຄົນທີ່ລັກລອບຕັດໄມ້ຜິດກົດໝາຍໃນລັດ Kachin ຢູ່ທາງພາກເໜືອຂອງປະເທດ
ສານທີ່ນະຄອນຫຼວງ Myitkyina ຂອງລັດ Kachin ໄດ້ອອກຄຳພິພາກສາໃນວັນພຸດວານນີ້. ປະຊາຊົນ ຈີນ ອີກສອງຄົນແມ່ນຖືກຕັດສິນຈຳຄຸກເປັນເວລາ 10 ປີ, ເຊີ່ງທະນາຍຄວາມ Khin Maung ທີ່ຕາງໜ້າໃຫ້ແກ່ຈຳເລີຍ, ກ່າວວ່າ ການຕັດສິນດັ່ງກ່າວ ແມ່ນໄດ້ມີຂຶ້ນໂດຍຜູ້ພິພາກສາ 2 ຄົນ.
ທ່ານ Khin Maung ກ່າວວ່າ “ພວກເຂົາມານຳກັນ 2 ກຸ່ມ, ກຸ່ມທຳອິດມີທັງໝົດ 85 ຄົນ ແລະ ອີກກຸ່ມມີ 70 ຄົນ. ຜູ້ພິພາກສາຂອງ ສານເມືອງ Myitkyina ໄດ້ຕັດສິນຈຳຄຸກຕະຫຼອດຊີວິດໃຫ້ແກ່ 83 ຄົນ ຂອງກຸ່ມທຳອິດ ແລະ ຈຳຄຸກ 10 ປີໃຫ້ກັບ ອີກສອງຄົນທີ່ເປັນພຽງຊາວໜຸ່ມ, ຜູ້ພິພາກສາອີກຄົນໜຶ່ງຂອງສານເມືອງໄດ້ຕັດສິນຈຳຄຸກ 20 ປີໃຫ້ຄົນທັງໝົດໃນກຸ່ມທີ 2, ແລະມັນກໍເປັນແບບດຽວກັນກັບການຕັດສິນຈຳຄຸກຕະຫຼອດຊີວິດ.”
ຈຳເລີຍທັງໝົດຈະມີໂອກາດໃນການອຸທອນຕໍ່ການຕັດສິນ, ໜັງສືພິມລັດ ປັກກີ່ງ ໄທມ໌ ອ້າງອີງຄຳເວົ້າຂອງເຈົ້າໜ້າທີ່ສະຖານທູດຈີນ ວ່າ ປັກກີ່ງ ມີຄວາມເປັນຫ່ວງກ່ຽວກັບຄຳພິພາກສາ ແລະ ກໍ່ກຳລັງປຶກສາຫາລືບັນຫານີ້ກັບກະຊວງຕ່າງປະເທດຂອງມຽນມາ, ໃນການທີ່ປະຊາຊົນຈີນ ຫຼາຍຄົນໄດ້ຖືກຈັບກຸມໃນເດືອນມັງກອນທີ່ຜ່ານມາ ໃນລະຫວ່າງການປາບປາມການຄ້າຂາຍໄມ້ເຖື່ອນໃນລັດ Kachin.
