ສຳນັກຂ່າວຕ່າງປະເທດລາຍງານວ່າ ຜູ້ຄົນໃນສັງຄົມອອນໄລນ໌ທົ່ວໂລກກຳລັງວິພາກວິຈານຄລິບວິດີໂອການປະຕິບັດໜ້າທີ່ໃນອາວະກາດຂອງອົງການບໍລິຫານການບິນແລະອາວະກາດສະຫາລັດອາເມລິກາ ຫຼື ອົງການນາຊ່າ ຫຼັງມີຄລິບວິດີໂອໜຶ່ງຖືກຈັບສັງເກດເຫັນວັດຖຸປະຫຼາດຢູ່ໃກ້ກັບສະຖານີ ອາວະກາດນານາຊາດ ຈົນລ່ຳລືກັນວ່າອາດຈະເປັນວັດຖຸເລິກລັບທີ່ພິສູດບໍ່ໄດ້ ຫຼື UFO
ຕາມລາຍງານລະບຸວ່າ ຄລິບວິດີໂອພາບການປະຕິບັດໜ້າທີ່ສ້ອມບຳລຸງຂອງໜ່ວຍງານອາວະກາດຍຸໂລບທີ່ສະຖານີ ອາວະກາດນານາຊາດໄອເອດເອດ ນັກບິນອາວະກາດ 2 ຄົນ ປະກອບດ້ວຍ ລີດສ໌ ໄວຊ໌ແມນ ແລະ ອະເຫຼັກຊານເດີລ໌ ເກີລ໌ ໄດ້ອອກມາປະຕິບັດໜ້ານີ້ສ້ອມແຊມສະຖານີ ອາວະກາດ ລະວ່າງທີ່ທັງສອງກຳລັງປະຕິບັດງານຢູ່ນັ້ນ ທີ່ສາກດ້ານຫຼັງຂອງສະຖານີ ອາວະກາດເລີ່ມປາກົດເຫັນວັດຖຸປະຫຼາດ ຄ້າຍກັບກຳລັງເຄື່ອນທີ່ໃກ້ເຂົ້າມາແລະເຫັນແຈ້ງຂຶ້ນເລື້ອຍໆ ຈົນມີກະແສລືກັນວ່າ ວັດຖຸທີ່ເຫັນນັ້ນເປັນສິ່ງທີ່ພິສູດບໍ່ໄດ້ຈາກມະນຸດຕ່າງດາວ ຫຼື UFO
ຢ່າງໃດກໍຕາມ ຫຼັງຈາກຄລິບວິດີໂອຄວາມຍາວ 5 ນາທີທີ່ໂພດຕ໌ໂດຍອົງການນາຊ່າ ຖືກວິພາກວິຈານໄປຕ່າງໆ ນານາ ທາງອົງການນາຊ່າກໍບໍ່ໄດ້ອອກມາສະແດງຄວາມຄິດເຫັນກ່ຽວກັບປະເດັນດັ່ງກ່າວ ຄະນະທີ່ຊາວເນັດທົ່ວໂລກກໍແຫ່ກັນເຂົ້າໄປຊົມຄລິບວິດີໂອດັ່ງກ່າວ ຈົນມີຍອດຄົນເບິ່ງທະລຸ 100, 000 ເທື່ອຢ່າງວ່ອງໄວ ໂດຍທີ່ບາງຄົນເຊື່ອວ່າອາດຈະເປັນ UFO ແທ້ໆ ແຕ່ບາງຄົນເຊື່ອວ່າເປັນເພາະເລນກ້ອງໃນມຸມຕົກກະທົບຂອງແສງເທົ່ານັ້ນ