ຂປລ. ຕາມການໃຫ້ສຳພາດ ຂອງ ທ່ານ ຮສ.ດຣ ລິນຄຳ ດວງສະຫວັນ ຫົວໜ້າພະແນກກະສິກຳ ແລະ ປ່າໄມ້ ນະຄອນຫລວງວຽງຈັນ ໃຫ້ຮູ້ວ່າ: ເຖິງວ່າປີນີ້ ສະພາບອາກາດຈະແຫ້ງແລ້ງກວ່າທຸກປີ ແຕ່ພືດຜັກ ຈະບໍ່ຂາດຕະຫລາດແນ່ນອນ, ຍ້ອນວ່າ ທາງພະແນກກະສິກຳ ແລະ ປ່າໄມ້ ນະຄອນຫລວງວຽງຈັນ ໄດ້ຈັດຕັ້ງກຸ່ມ ຜະລິດກະສິກຳ ໄວ້ຮອງຮັບເຖິງ 84 ກຸ່ມ ເຊິ່ງຈະສາມາດສະໜອງ ພຶດຜັກໄດ້ພຽງພໍ ກັບຄວາມຕ້ອງການ ບໍລິໂພກ ຂອງຊາວນະຄອນ ຫລວງວຽງຈັນ ແຕ່ກໍຍັງມີພືດຜັກ ຈຳນວນໜຶ່ງ ທີ່ຈຳເປັນຕ້ອງນຳເຂົ້າ ຍ້ອນກຳລັງການຜະລິດ ຂອງກະສິກອນ ຍັງບໍ່ພຽງພໍ ເຊັ່ນ: ຫົວຜັກບົວໃຫຍ່, ກະລົດ ແລະ ຫົວຜັກທຽມ.
ທ່ານຫົວໜ້າ ພະແນກກະສິກຳ ແລະ ປ່າໄມ້ ຍັງໃຫ້ຮູ້ຕື່ມວ່າ: ປັດຈຸບັນການປູກພືກຜັກ ຂອງກະສິກອນ ໃນນະຄອນ ຫລວງວຽງຈັນ ປະຕິບັດໄດ້ 1.643 ເຮັກຕາ ເທົ່າກັບ 43% ຂອງເນື້ອທີ່ແຜນການ 3.790 ເຮັກຕາ, ໃນນັ້ນສິ່ງທີ່ພົ້ນເດັ່ນແມ່ນ ການຜະລິດ ພຶດຜັກອິນຊີ ຂອງກຸ່ມກະສິກອນ ເຊິ່ງມີການຈຳໜ່າຍ ອາທິດລະສາມຄັ້ງ ຢູ່ເດີ່ນທາດຫລວງ ແລະ ສ່ວນເຈົ້າຟ້າງຸ່ມ, ສາມາດຈຳໜ່າຍ ໄດ້ຫລາຍກວ່າ 9 ພັນໂຕນ ເຊິ່ງຖືວ່າເປັນທ່າແຮງສຳຄັນ ດ້ານການຜະລິດກະສິກຳ ປອດສານພິດ ເພື່ອສະໜອງໃນຕະຫລາດ AEC. ຄຽງຄູ່ກັບການປູກພຶດຜັກ ສະບຽງອາຫານແລ້ວ ຢູ່ນະຄອນຫລວງວຽງຈັນ ຍັງມີຂະບວນການ ປູກພືດອຸດສາຫະກຳ ແລະ ໄມ້ໃຫ້ໝາກ ເພື່ອຕອບສະໜອງ ໃຫ້ແກ່ການຜະລິດເປັນສິນຄ້າເຊັ່ນ: ປູກສາລີ, ມັນຕົ້ນ, ອ້ອຍ, ກ້ວຍ ແລະ ອື່ນໆ.
ຂອບໃຈຂ່າວຈາກ:
