ສຳນັກຂ່າວຕ່າງປະເທດ ລາຍງານໃນວັນທີ 21 ກໍລະກົດນີ້ວ່າ ເກີດເຫດລະເບີດຮຸນແຮງສັງຫານກຸ່ມຜູ້ຊຸມນຸມປະທ້ວງ ຕາຍ 31 ຄົນ ແລະ ບາດເຈັບອີກຫລາຍຮ້ອຍຄົນຢູ່ເມືອງຊູຣຸກ ປະເທດຕວກກີ ໃນຕອນທ່ຽງຂອງມື້ວັນຈັນທີ 20 ກໍລະກົດຜ່ານມາ ຫລັງຈາກທີ່ມີການໂຮມຊຸມຊຸມຮຽກຮ້ອງໃຫ້ລັດຖະບານຕວກກີ ຍື່ນມືເຂົ້າບູລະນະເມືອງໂຄບານີ ໃນປະເທດຊີຣີ ທີ່ພັງເສຍຫາຍຈາກການບຸກໂຈມຕີຂອງກຸ່ມໄອເອັສ.
ທັງນີ້ ໃນເບື້ອງຕົ້ນແມ່ນຍັງບໍ່ທັນມີກຸ່ມກໍ່ການຮ້າຍໃດໆ ອອກມາອ້າງຄວາມຮັບຜິດຊອບໃນການກໍ່ເຫດດັ່ງກ່າວ ແຕ່ດ້ານນາຍົກລັດຖະມົນຕີ ອາເໝັດ ດາວູໂຕກລຼ ແຫ່ງປະເທດຕວກກີ ໄດ້ກ່າວວ່າ ກຸ່ມໄອເອັສເປັນຜູ້ຢູ່ເບື້ອງຫລັງເຫດການໂຈມຕີ ພ້ອມທັງຮຽກຮ້ອງໃຫ້ຊາວຕວກກີ ສາມັກຄີເປັນຈິດໜຶ່ງໃຈດຽວ ໂດຍລັດຖະບານຈະດຳເນີນການຕອບໂຕ້ເຫດການຄັ້ງນີ້.
