ຖ້າຫາກເຈົ້າເປັນຄົນໜຶ່ງທີ່ເລີ່ມສົນໃຈອິນເຕີລ໌ເນັດຄວາມໄວສູງ ຫລື ບອດແບນດ໌ອິນເຕີລ໌ເນັດທີ່ບ້ານ ຫລືເຈົ້າອາດມີຢູ່ແລ້ວແຕ່ຢາກເຊັກວ່າແພກເກຈບອດແບນດ໌ຂອງເຈົ້ານັ້ນກົງກັບຄວາມ ຕ້ອງການໃນການໃຊ້ງານຈິງໆ ຫລື ບໍ່ ເຈົ້າຈຶ່ງຄວນມີຄວາມຮູ້ແລະຄວາມເຂົ້າໃຈວ່າຕົວເລືອກການໃຊ້ງານຕ່າງໆ ມີຫຍັງແດ່
ວິນເຊນຕ໌ ດູດາ ກຳມະການຜູ້ຈັດການ ເອນລິບສ໌ ໂປເຈກສ໌ ຜູ້ນຳເຂົ້າແລະຈັດຈຳໜ່າຍອຸປະກອນໂມເດັມແລະເລົາເຕີລ໌ສຳລັບລູກຄ້າ ໄດ້ແຊລ໌ຄຳຖາມ 5 ຂໍ້ ພ້ອມແນວຄິດທີ່ຈະຊ່ວຍໃຫ້ເຈົ້າຕັດສິນໃຈເລືອກບອດແບນດ໌ອິນເຕີລ໌ເນັດທີ່ເໝາະສົມ ທີ່ສຸດສຳລັບເຮືອນຂອງເຈົ້າ
1. ເຈົ້າຕ້ອງການບອດແບນດ໌ຄວາມໄວສູງແມ່ນແທ້ບໍ່
ຫາກເຈົ້າມີຄອມພິວເຕີພຽງແຕ່ 1ເຄື່ອງແລະໃຊ້ອິນເຕີລ໌ເນັດພຽງເພື່ອເປີດໜ້າເວັບ ຕ່າງໆ ຫລືຮັບສົ່ງອີເມລ໌ ອິນເຕີລ໌ເນັດຄວາມໄວສູງກໍອາດບໍ່ໄດ້ຈຳເປັນສຳລັບເຈົ້າຫລາຍ ແຕ່ຫາກເຈົ້າມີອຸປະກອນທີ່ສາມາດເຊື່ອມຕໍ່ອິນເຕີລ໌ເນັດໄດ້ຫລາຍກວ່າ 1 ເຄື່ອງ ແລະມັກໃຊ້ງານໂປແກມທີ່ຕ້ອງຮັບສົ່ງຂໍ້ມູນຈຳນວນເຊັ່ນ ເບິ່ງຄລິບວິດີໂອ ເບິ່ງໜັງ ຟັງເພງ ຫລືຫລິ້ນເກມ ບອດແບນດ໌ອິນເຕີລ໌ເນັດກໍເປັນສິ່ງຈຳເປັນສຳລັບເຈົ້າ
2. ເຈົ້າເປັນຜູ້ໃຊ້ງານອິນເຕີລ໌ເນັດປະເພດໃດ
ຈື່ໄວ້ວ່າຖ້າເຈົ້າມີການໃຊ້ງານຂໍ້ມູນຫລາຍຂຶ້ນເທົ່າໃດເຈົ້າກໍຍິ່ງຕ້ອງການຄວາມໄວໃນ ການຮັບສົ່ງຂໍ້ມູນຊຶ່ງວັດຫນ່ວຍເປັນເມກະບິຕ (Mbps) ຫລາຍຂຶ້ນເທົ່ານັ້ນ
ມືໃໝ່ຫັດໃຊ້ ອາດເລີ່ມດ້ວຍແພັກເກັດອິນເຕີລ໌ເນັດຄວາມໄວສູງສຳລັບຜູ້ເລີ່ມຕົ້ນໃຊ້ງານ ເຊຶ່ງໜ້າຈະພຽງພໍແລ້ວສຳລັບການໃຊ້ງານ ແລະລາຄາກໍບໍ່ສູງຫລາຍອີກ ທັງນີ້ ຫາກເຈົ້າຕ້ອງການປ່ຽນແພັກເກັດອິນເຕີລ໌ເນັດໃນພາຍຫຼັງ ກໍສາມາດເຮັດໄດ້ຢ່າງງ່າຍດາຍຄວາມໄວທີ່ແນະນຳຄື 5-10 Mbp s
ຄໍໜັງຫລືສາວົກເກມອອນໄລນ໌ ເຈົ້າຖືກຈັດວ່າເປັນຜູ້ໃຊ້ງານໜັກ ເນື່ອງຈາກອາດຕ້ອງດາວນ໌ໂຫລດໜັງ ຫລື ສະຕີມຊີລີສ໌ທັງເລື່ອງ ເພາະສະນັ້ນຈຶ່ງຈຳເປັນຢ່າງຍິ່ງທີ່ເຈົ້າຄວນເລືອກແພັກເກັດອິນເຕີລ໌ເນັດຄວາມໄວສູງ ທີ່ສາມາດດາວນ໌ໂຫລດຂໍ້ມູນໄດ້ຢ່າງບໍ່ຈຳກັດໂດຍເຈົ້າອາດລອງພິຈາລະນາເທກໂນໂລຍີ ການເຂົ້າເຖິງອິນເຕີລ໌ເນັດແບບເຄເບີນໂມເດັມເພື່ອຄວາມໄວທີ່ສູງຂຶ້ນ ຄວາມໄວທີ່ແນະນຳຄື 10-20 Mbps
ຄອບຄົວ ຫາກສະມາຊິກໃນຄອບຄົວຂອງເຈົ້າຕ່າງແຊລ໌ສັນຍານອິນເຕີລ໌ເນັດຈາກແຫລ່ງດຽວກັນ ຈຶ່ງເປັນການດີກວ່າທີ່ຈະໃຊ້ອິນເຕີລ໌ເນັດຄວາມໄວສູງຫຼາຍ ໂດຍຫາກສ່ວນໃຫຍ່ທີ່ເຮືອນຂອງເຈົ້າມັກໃຊ້ໂທລະສັບມືຖື ແລັບທັອບ ຫລືຄອມພິວເຕີໃນເວລາດຽວກັນ ລອງຄິດພາບວ່າມີໜຶ່ງຄົນກຳລັງຫລິ້ນເກມອອນໄລນ໌ ອີກຄົນກຳລັງເບິ່ງຊີລີສ໌ເທິງຈໍຄອມພິວເຕີລ໌ ແລ້ວຍັງມີອີກຄົນກຳລັງດາວນ໌ໂຫລດເພງ ໃນຂະນະທີ່ເຈົ້າກໍກຳລັງຄົ້ນຫາຂໍ້ມູນໃນເວັບໄຊຕ໌ເພື່ອວາງແຜນທ່ຽວ ໃນກໍລະນີເຊັ່ນນີ້ແພັກເກັດຄວາມໄວສູງສຸດເບິ່ງຈະເໝາະສົມກັບການໃຊ້ງານທີ່ເຮືອນເຈົ້າຫລາຍທີ່ ສຸດ ເນື່ອງຈາກຕ້ອງດາວນ໌ໂຫລດຂໍ້ມູນຂະໜາດໃຫ່ຍໃນເວລາພ້ອມໆກັນ ຄວາມໄວທີ່ແນະນຳຄື 15-50 Mbps
3. ເທກໂນໂລຍີການເຂົ້າເຖິງອິນເຕີລ໌ເນັດຄວາມໄວສູງແບບໃດທີ່ມີປະສິດທິພາບທີ່ສຸດສຳລັບເຈົ້າ
ໃນປະຈຸບັນເທກໂນໂລຍີໃນການເຂົ້າເຖິງບອດແບນດ໌ທີ່ເຮືອນມີຢູ່ 3 ແບບດ້ວຍກັນ ຄື xDSL (copper wire (ADSL, VDSL)) ໄຟເບີລ໌ (Fiber) ແລະດັອກຊິສ (DOCSIS)
ADSL ຈະເຊື່ອມຕໍ່ອິນເຕີລ໌ເນັດຜ່ານສາຍໂທລະສັບ ໂດຍມີຄວາມໄວໃນການຮັບສົ່ງຂໍ້ມູນຢູ່ທີ່ 12-15 Mbps ສ່ວນໄຟເບີລ໌ຫຼື FTTX ຈະໃຫ້ຄວາມໄວທີ່ສູງ ແຕ່ຍັງໃຫ້ບໍລິການໄດ້ຈຳກັດໃນບາງພື້ນທີ່ເທົ່ານັ້ນ ແລະດັອກຊິສ ຫຍໍ້ມາຈາກ Data Over Cable Service Interface Specification ຄືເທກໂນໂລຍີທາງເລືອກສູນກາງລະຫວ່າງ ADSL ແລະໄຟເບີລ໌ ໂດຍຈະເຊື່ອມຕໍ່ອິນເຕີລ໌ເນັດຜ່ານສາຍເຄເບີນທີວີ ແລະໃຫ້ຄວາມໄວສູງສຸດໄດ້ເຖິງເກືອບ 200 Mbps
4. ຜູ້ໃຫ້ບໍລິການອິນເຕີລ໌ເນັດລາຍໃດທີ່ສາມາດໃຫ້ບໍລິການເທກໂນໂລຍີໃນການເຂົ້າເຖິງອິນເຕີລ໌ເນັດທີ່ເຈົ້າຕ້ອງການໄດ້
ໃນປະເທດລາວເຮົາມີຜູ້ໃຫ້ບໍລິການອິນເຕີລ໌ເນັດຫລາຍລາຍນຳກັນໂດຍໃນຈຳນວນນັ້ນກໍມີຜູ້ໃຫ້ບໍລິການຢ່າງຫລວງຫລາຍ ແຕ່ຢ່າງໃດກໍຕາມຫາກເຈົ້າຢູ່ໃນພື້ນທີ່ທີ່ບໍ່ສາມາດເຂົ້າເຖິງບໍລິການບອດແບນດ໌ ອິນເຕີລ໌ເນັດສຳລັບເຮືອນໄດ້ ເຈົ້າກໍສາມາດໃຊ້ໂທລະສັບມືຖືເພື່ອເຊື່ອມຕໍ່ສັນຍານໂດຍເປີດໃຊ້ Hotspot ແຕ່ທັງນີ້ການເຊື່ອມຕໍ່ອາດບໍ່ສະຖຽນເທົ່າທີ່ຄວນ
5. ຜູ້ໃຫ້ບໍລິການອິນເຕີລ໌ເນັດທີ່ເຈົ້າສົນໃຈນຳສະເໜີໂປໂມຊັ່ນອື່ນໆ ເຊັ່ນ ຟຣີຄ່າໂທ ຫລືຄ່າເຄເບີນທີວີໃຫ້ບໍ່
ໂດຍປົກກະຕິແລ້ວ ແພັກເກັດບອດແບນດ໌ອິນເຕີລ໌ເນັດມັກຈະລວມຄ່າເຊົ່າສາຍໂທລະສັບ ຄ່າເຄເບີນທີວີຫລືດາວທຽມ ແລະການໃຫ້ຍືມໃຊ້ໂມເດັມແລະເລົາເຕີລ໌ ນີ້ຈຶ່ງອາດຊ່ວຍເຈົ້າລຸດຄ່າໃຊ້ຈ່າຍທີ່ບໍ່ຈຳເປັນລົງໄດ້
ຂໍ້ມູນ ທີ່ເປັນປະໂຫຍດຈາກ ວິນເຊນຕ໌ ເຫລົ່ານີ້ໜ້າຈະຊ່ວຍໃຫ້ເຈົ້າເລືອກບອດແບນດ໌ອິນເຕີລ໌ເນັດທີ່ດີທີ່ສຸດສຳລັບບ້ານຂອງເຈົ້າໄດ້ ເຮັດໃຫ້ເຈົ້າໃຊ້ງານອິນເຕີລ໌ເນັດໄດ້ຢ່າງວ່ອງໄວແລະບໍ່ສະດຸດ ເຮົາແນະນຳໃຫ້ເຈົ້າຫາຂໍ້ມູນແພັກເກັດຕ່າງໆ ຈາກບັນດາຜູ້ໃຫ້ບໍລິການອິນເຕີລ໌ເນັດກ່ອນຕັດສິນໃຈເລືອກໃຊ້ບໍລິການ ໂດຍຜູ້ໃຫ້ບໍລິການອິນເຕີລ໌ເນັດທີ່ດີຄວນໃຫ້ຄວາມສຳຄັນຕໍ່ການໃຫ້ບໍລິການອິນເຕີລ໌ເນັດຄວາມ ໄວສູງທີ່ມີຄວາມສະຖຽນລະພາບໃຫ້ແກ່ເຮືອນຂອງເຈົ້າ ແລະ ເມື່ອເຈົ້າຕັດສິນໃຈເລືອກໃຊ້ບໍລິການທີ່ເໝາະສົມແລ້ວເຈົ້າກໍຈະເພີດເພີນກັບການເຊື່ອມຕໍ່ອິນເຕີລ໌ເນັດທີ່ໄຮ້ຂີດຈຳກັດໄດ້ຢ່າງບໍ່ຕ້ອງກັງວົນໃຈ