ນັກວິໄຈອັງກິດຍືນຍັນ ບໍ່ວ່າຜູ້ໃຊ້ສະມາດໂຟນ ຫລືແທັບເລັດ (Andriod) ຈະລົບຂໍ້ມູນສ່ວນຕົວ ຫລືລ້າງເຄື່ອງດ້ວຍວິທີໃດກໍ່ຕາມ ຊຽນໄອທີກໍຈະສາມາດກູ້ຄືນຂໍ້ມູນສ່ວນຕົວບາງສ່ວນກັບມາໄດ້ຢູ່ດີ ແລະບໍ່ມີທາງເລີຍທີ່ຈະລົບຂໍ້ມູນເທິງອຸປະກອນແອນດຣອຍຖິ້ມແບບກ້ຽງ ຜູ້ໃຊ້ແອນດຣອຍ 500 ລ້ານເຄື່ອງທົ່ວໂລກສ່ຽງຖືກແອບເບິ່ງຂໍ້ມູນ
ນັກວິໄຈມະຫາວິທະຍາໄລແຄມບລິດຈ໌ (Cambridge University) ເປີດເຜີຍຂໍ້ສະຫລຸບນີ້ຫລັງຈາກສາມາດສາທິດວິທີການກູ້ຄືນຂໍ້ມູນສ່ວນຕົວຈາກສະມາດໂຟນແອນດຣອຍດ໌ທີ່ຖືກລ້າງເຄື່ອງດ້ວຍວິທີ “factory reset” ຫລືການຕັ້ງຄ່າລະບົບໃໝ່ທັງໝົດຄືອອກຈາກໂຮງງານ ໂດຍລາຍງານຈາກສຳນັກຂ່າວເດລີເມລ (Daily Mail) ລະບຸວ່າ ນັກວິໄຈສາມາດກູ້ຄືນໄດ້ທັງຂໍ້ຄວາມສົນທະນາ ຮູບພາບ ວິດີໂອ ລວມເຖິງອີເມລ
ຂໍ້ສະຫລຸບນີ້ສະແດງວ່າ ຜູ້ໃຊ້ອຸປະກອນແອນດຣອຍດ໌ທີ່ເຄີຍຂາຍ ເຮັດຫາຍ ຫລືສົ່ງມອບໃຫ້ແກ່ຄົນອື່ນລ້ວນມີຄວາມສ່ຽງຖືກລັກລອບເບິ່ງຂໍ້ມູນສ່ວນຕົວ ທີ່ສຳຄັນນັກວິໄຈຍັງຊີ້ວ່າຊຽນໄອທີສາມາດດຶງຂໍ້ມູນການເງີນທີ່ຖືກເກັບໄວ້ໃນເຄື່ອງຜ່ານການຮຽກໃຊ້ແອບພິເຄຊັນອື່ນໆນຳອີກ
ນອກຈາກນີ້ ນັກວິໄຈພົບວ່າ ການເຂົ້າລະຫັດເຕັມຮູບແບບ (fully encrypted) ກໍບໍ່ມີປະໂຫຍດ ໂດຍຂໍ້ມູນສ່ວນຕົວກໍຍັງຖືກເປີດຊົມໄດ້ຫລັງຈາກຜ່ານກະບວນການ factory reset ແລ້ວ
ນັກວິໄຈລະບຸວ່າ ສາມາດກູ້ຂໍ້ມູນການຢືນຢັນຕົວບຸກຄົນຂອງກູເກິລ ຫຼື Google authentication token ເຊຶ່ງເຮັດໃຫ້ສາມາດສວມຮອຍເຂົ້າໃຊ້ນານາບໍລິການຂອງກູເກີນແທນເຈົ້າຂອງເຄື່ອງແອນດຣອຍດ໌ລາຍນັ້ນໄດ້ນຳອີກ ຈຸດນີ້ຖືເປັນຄວາມສ່ຽງທີ່ຜູ້ໃຊ້ຈະຖືກລັກລອບອ່ານ ຫລືສົ່ງອີເມລໃນບໍລິການຈີເມລ (Gmail) ລວມເຖິງບໍລິການວິດີໂອອອນໄລນ໌ຢ່າງຍູທູບ (YouTube) ແລະການເຂົ້າເຖິງທຸກໄຟລ໌ໃນບໍລິການຄາວດ໌ຂອງກູເກິລ
ລາຍງານລະບຸວ່າ ນັກວິໄຈລົງມືທົດສອບຊ່ອງວ່າງນີ້ເທິງອຸປະກອນແອນດຣອຍດ໌ມືສອງທີ່ຊື້ຈາກເວັບໄຊຕ໌ “ອີເບຍ໌ (eBay) ” ຈຳນວນໜຶ່ງ ເຊຶ່ງຄອບຄຸມລະບົບປະຕິບັດການແອນດຣອຍດ໌ຫລາຍເວີລ໌ຊັນຕັ້ງແຕ່ Android 2.2 ເຖຶງ 4.3 ເປັນທີ່ມາຂອງຕົວເລກການປະເມີນອຸປະກອນກຸ່ມສ່ຽງ 500 ລ້ານເຄື່ອງ ທີ່ຖືກລະບຸໃນລາຍງານ
ການຄົ້ນພົບນີ້ຖືເປັນຂ່າວໃຫຍ່ທີ່ຊາວອອນໄລນ໌ຕ້ອງໃຫ້ຄວາມສຳຄັນ ເນື່ອງຈາກແອນດຣອຍດ໌ຄືລະບົບປະຕິບັດການທີ່ໃຊ້ໃນສະມາດໂຟນສ່ວນໃຫຍ່ຂອງໂລກ ໂດຍຜູ້ຜະລິດລາຍໃຫຍ່ທັງຊຳຊຸງ (Samsung) ແລະເອດທີຊີ (HTC) ລ້ວນລົງມືຜະລິດສະມາດໂຟນ ແລະແທັບເລັດແອນດຣອຍດ໌ອອກວາງຈຳໜ່າຍດົນຫລາຍປີ
ຄະນະດຽວກັນ ການສຳລວດຍັງພົບວ່າ ສະມາດໂຟນຫລາຍກວ່າ 630 ລ້ານເຄື່ອງ ອາດບໍ່ໄດ້ຖືກລ້າງຂໍ້ມູນໃນຫນ່ວຍຄວາມຈຳພາຍໃນເຄື່ອງ ຈຸດນີ້ອາດເປັນທີ່ມາຂອງຄລິບຫລຸດ ພາບໂປ໊ທີ່ເຮົາເຫັນຈົນຊິນຕາ