ສຳນັກຂ່າວຕ່າງປະເທດ ລາຍງານໃນວັນທີ 15 ກໍລະກົດນີ້ວ່າ ເກີດເຫດຢຽບກັນຕາຍທີ່ແຄມແມ່ນ້ຳໂກທາວາຣີ ເຊິ່ງເປັນໜຶ່ງໃນແມ່ນ້ຳສັກສິດ 12 ແຫ່ງຂອງອິນເດຍ ໃນເຂດລັດອານທະຣະປະເທດ ໃນມື້ວັນທີ 14 ກໍລະກົດຜ່ານມາ ເນື່ອງຈາກຜູ້ສະແຫວງບຸນຊາວຮິນດູຈຳນວນຫລວງຫລາຍ ພາກັນມາເຕົ້າໂຮມບຽດສຽດຢູ່ແຄມນ້ຳ ເພື່ອດື່ມ ຫລື ອາບນ້ຳໃນແມ່ນ້ຳດັ່ງກ່າວ ໃນຊ່ວງງານເທດສະການພຸດຄາຣາມຂອງສາສະໜາຮິນດູ ເປັນເຫດເຮັດໃຫ້ມີຜູ້ເສຍຊີວິດຍ້ອນຢຽບກັນຕາຍເຖິງ 27 ຄົນ.

ແຫລ່ງຂ່າວລະບຸວ່າ ສະຖານະການເກີດຂຶ້ນຢ່າງວຸ້ນວາຍ ໂດຍຜູ້ຍິງ ແລະ ເດັກນ້ອຍພາກັນຮ້ອງໄຫ້ຂໍຄວາມຊ່ວຍເຫລືອ ໃນຂະນະທີ່ເຈົ້າໜ້າທີ່ໃນເຄື່ອງແບບ ບໍ່ສາມາດຊ່ວຍຫຍັງໄດ້ເລີຍ ເນື່ອງຈາກຢູ່ໃນສະຖານະການທີ່ແຕກຕື່ນ ແລະ ຕ້ອງໃຊ້ເວລາຫລາຍກ່ວາ 1 ຊົ່ວໂມງ ສະຖານະການຈິ່ງສະຫງົບລົງ.