ອີງຕາມຂ່າວຕ່າງປະເທດຫລາຍສຳນັກ ລາຍງານວ່າ ບັນດາປະເທດມະຫາອຳນາດໂລກ ເຊິ່ງປະກອບມີ ຈີນ, ສະຫະລັດອາເມຣິກາ, ຝຣັ່ງ, ສະຫະຣາຊະອານາຈັກ, ຣັດເຊຍ ແລະ ເຢຍລະມັນ ສາມາດບັນລຸຂໍ້ຕົກລົງດ້ານນິວເຄລຍກັບອີຣ່ານແລ້ວ ໃນມື້ວັນທີ 14 ກໍລະກົດ 2015 ຜ່ານມານີ້ ຫລັງຈາກທີ່ມີການເຈລະຈາກັນ ຍາວນານເປັນເວລາ 17 ມື້ ຢູ່ນະຄອນຫລວງວຽນ ປະເທດໂອຕຣິດ ເຊິ່ງເປັນຜົນສຳເລັດຄັ້ງປະຫວັດສາດ ຫລັງຈາກທີ່ມີບັນຫາຂໍ້ຂັດແຍ່ງໃນເລື່ອງດັ່ງກ່າວ ຍາວນານເຖິງ 12 ປີ.

ໂດຍຂໍ້ຕົກລົງດັ່ງກ່າວນີ້ ແມ່ນໄດ້ຮັບປະກັນວ່າ ໂຄງການນິວເຄລຍຂອງອີຣ່ານ ຈະຕ້ອງບໍ່ມີເປົ້າໝາຍທາງການທະຫານ ເພື່ອແລກປ່ຽນກັບການຍົກເລີກມາດຕະການຂວ້ຳບາດທາງເສດຖະກິດ ຈາກບັນດາປະເທດຕາເວັນຕົກທີ່ມີຕໍ່ອີຣ່ານ ເຊິ່ງກຳລັງປະສົບກັບບັນຫາເສດຖະກິດຕົກຕ່ຳ.

ແນວໃດກໍຕາມ ຫລັງຈາກທີ່ມີການຖະແຫລງຜົນສຳເລັດຂອງຂໍ້ຕົກລົງດັ່ງກ່າວນີ້ ທ່ານ ເບັນຈາມິນ ເນທັນຢາຮູ ນາຍົກລັດຖະມົນຕີອິດສະລາແອນ ໄດ້ອອກມາຖະແຫລງປະນາມຂໍ້ຕົກລົງສະບັບນີ້ວ່າ ເປັນຄວາມຜິດພາດຄັ້ງປະຫວັດສາດ.