ຈາກຜົນສຳຫຼວດການວັດຄວາມໄວອິນເຕີລ໌ເນັດເທິງໂທລະສັບມືຖືໂດຍໃຊ້ແອພິເຄຊັນ Netradar ທີ່ ໃຫ້ບໍລິການຟຣີເພື່ອວິເຄາະຄຸນນະພາບຂອງອິນເຕີລ໌ເນັດເທິງມືຖືແລະອຸປະກອນຕ່າງໆ ອິນເຕີລ໌ເນັດເທິງມືຖືທີ່ໄວທີ່ສຸດໃນໂລກຢູ່ທີ່ເດນມາລ໌ກ (2.3 Mbit/s) ຕາມມາດ້ວຍສິງກະໂປ (16.9 Mbit/s) ສະຫວິດເຊີລ໌ແລນດ໌ (6.6 Mbit/s) ນອລ໌ເວຍ໌ (14.8 Mbit/s) ແລະເກົາຫຼີໃຕ້ (13.0 Mbit/s)
ເມື່ອໃຊ້ແອພິເຄຊັນ Netradar ຜູ້ໃຊ້ຈະຮູ້ເຖິງຂໍ້ມູນຂອງຄຸນນະພາບຂອງການເຊື່ອມຕໍ່ກັບອິນເຕີລ໌ເນັດ ໃນຄະນະດຽວກັນ ຂໍ້ມູນຈະຖືກອັບໂຫຼດໄປທີ່ຖານຂໍ້ມູນຂອງ Netradar ເອງເພື່ອໃຊ້ໃນການສ້າງແຜນທີ່ຄວາມຄອບຄຸມການໃຫ້ບໍລິການອິນເຕີລ໌ເນັດແລະໃນງານ ວິໄຈໃນອະນາຄົດ ໂດຍແອພິເຄຊັນ Netradar ນີ້ຖືກພັດທະນາຂຶ້ນໂດຍມະຫາວິທະຍາໄລອັນໂຕ ປະເທດຟິນແລນດ໌ ແລະໄດ້ຮັບການເຜີຍແຜ່ໄປທົ່ວໂລກ
“ທີ່ຈິງແລ້ວກໍມີຫລາຍ ປັດໄຈທີ່ກ່ຽວຂ້ອງວ່າ ເປັນຫຍັງຜູ້ໃຊ້ມືຖືຈຶ່ງໄດ້ຄວາມໄວຂອງອິນເຕີລ໌ເນັດແຕກຕ່າງກັນອອກໄປໃນແຕ່ລະປະເທດ ຄວາມໄວຂອງອິນເຕີລ໌ເນັດມືຖືບໍ່ໄດ້ຂຶ້ນຢູ່ກັບຜູ້ໃຫ້ບໍລິການເຄືອຂ່າຍມືຖື ແລະຄວາມຄັບຄັ່ງຂອງການໃຊ້ບໍລິການພຽງຢ່າງດຽວ ແຕ່ບາງທີກໍຂຶ້ນຢູ່ກັບອຸປະກອນ ການຈຳກັດຄວາມໄວໃນການເຊື່ອມຕໍ່ ໄລຍະທາງລະຫວ່າງຜູ້ໃຊ້ກັບເສົາສັນຍານຂອງຜູ້ໃຫ້ບໍລິການ ລັກສະນະພູມິປະເທດ ແລະເທກໂນໂລຍີຄື້ນວິທະຍຸທີ່ມີຢູ່ອີກນຳ” ສາສະດາຈານຍ໌ຈຸກກາ ແມນເນີລ໌ ຜູ້ນຳໂຄງການ Netradar ທີ່ມະຫາວິທະຍາໄລອັນໂຕ ຟິນແລນດ໌ເຜີຍ
ແອພິເຄຊັນ ຟຣີ Netradar ນີ້ຈະວັດຄຸນນະພາບຂອງເຄືອຂ່າຍໃນແງ່ຂອງຄວາມໄວການດາວນ໌ໂຫຼດແລະອັບໂຫຼດ ໄລຍະເວລາທີ່ໃຊ້ໃນການສົ່ງຂໍ້ມູນກັບຄວາມແຮງຂອງສັນຍານ ບັນຫາຂອງເຄືອຂ່າຍ ແລະປະສິດທິພາບໃນແຕ່ລະຍີ່ຫໍ້ຂອງສະມາລ໌ໂຟນແລະແທັບເລັດ ແລະແອພິເຄຊັນ Netradar ນີ້ກໍສາມາດດາວນ໌ໂຫຼດໄດ້ທັງເທິງ Android, iOS, Windows Phone, Blackberry, Nokia X, Meego, Symbian ແລະ Jolla/Sailfish
ນອກຈາກນີ້ ເຮົາຍັງສາມາດເຂົ້າຊົມແຜນທີ່ຄວາມໄວຂອງອິນເຕີລ໌ເນັດທົ່ວໂລກໄດ້ທີ່ http://www.netradar.org/ ແລະ http://www.internetsociety.org/netradar
ສະມາຄົມອິນເຕີລ໌ເນັດແລະມະຫາວິທະຍາໄລອັນໂຕ ຟິນແລນດ໌ ໄດ້ຮ່ວມມືກັນວັດຄວາມໄວຂອງອິນເຕີລ໌ເນັດທົ່ວໂລກ ໂດຍຜົນການສຳຫຼວດເລື່ອງ Mobile Internet in the World 2014 ກໍໄດ້ຮັບການເຜີຍແຜ່ອອນໄລນ໌ແລ້ວ ນອກຈາກນີ້ ແອພິເຄຊັນ Netradar ກໍໄດ້ຮັບການຕິດຕັ້ງກວ່າ 200, 000 ເທື່ອ ຈາກອຸປະກອນນ 6, 000 ຊະນິດແລ້ວ ມີຖານຂໍ້ມູນການວັດກວ່າ 5 ລ້ານເທື່ອທົ່ວໂລກ