ຂປລ. ​ ປັດຈຸບັນ ຢູ່​ນະຄອນຫລວງ​ວຽງ​ຈັນ ຈຳນວນພາຫະນະ ຕາມທ້ອງຖະໜົນ​ແມ່ນ​ມີ​ຈຳນວນເພີ່ມຂຶ້ນ ຢ່າງ​ຫລວງຫລາຍ ​ແລະ​ ມີ​ທ່າ​ອຽງ​ເພີ່ມ​ຂຶ້ນ​ເລື້ອຍໆ ​ເຊິ່ງ​ເຮັດ​ໃຫ້ການ​ສັນຈອນ​ຢູ່​ພາຍ​ໃນ​ຕົວ​ເມືອງ ​ແອ​ອັດ​ພໍ​ສົມຄວນ, ​ໂດຍ​ສະ​ເພາະ ​​ໃນ​ຊົ່ວ​ໂມງ​ເລັ່ງດ່ວນ. ຕາມ​ຕົວ​ເລກ​ທີ່ກອງ​ຄຸ້ມ​ຄອງ​ ພາຫະນະ ແລະ ການ​ຂັບ​ຂີ່ ພະ​ແນກ​ໂຍທາທິ​ການ ແລະ ຂົນສົ່ງ ນະຄອນຫລວງ​ວຽງ​ຈັນ​ໃຫ້ຮູ້ວ່າ ຢູ່​ນະຄອນຫລວງ​ວຽງ​ຈັນ ມີພາຫະນະ ປະມານ 7 ແສນ​ຄັນ ຖື​ວ່າ​ຫລາຍ​ສົມຄວນ.

ທ່ານ ນວນ​ໄຊ ພະ​ໄຊ​ສົມບັດ ຫົວໜ້າ​ກອງຄຸ້ມຄອງພາຫະນະ ແລະ ການຂັບຂີ່ ໃຫ້ຮູ້​ວ່າ: ສະເພາະ​ໃນ 6 ເດືອນ​ຕົ້ນ​ປີ 2015 ຜ່ານ​ມາ ໄດ້​ມີ​ພາຫະນະ​ ​ໄດ້ມາ​ຂຶ້ນ​ທະບຽນ​ຢູ່​ກອງ​ຄຸ້ມ​ຄອງພາຫະນະ ແລະ ການ​ຂັບ​ຂີ່ ທັງໝົດຈຳນວນ 31 ກວ່າຄັນ, ສະເລ່ຍ​ແຕ່​ລະ​ເດືອນ ມີປະມານ 5.000 ຄັນ ແລະ ຖ້າ​ທຽບໃສ່​ໄລຍະ​ດຽວ​ກັນ​ຂອງ​ປີຜ່ານມາ ​ແມ່ນເພີ່ມ​ຂຶ້ນ. ໃນ ​ຈຳນວນ​ພາຫະນະ​ ທີ່ມາ​ຂຶ້ນ​ທະບຽນ​ມີ​ລົດຈັກ 18.900 ກວ່າຄັນ, ລົດ​ເກງ 3.000 ກວ່າຄັນ, ລົດ​ກະບະ 5.800 ກວ່າຄັນ ລົດ​ຈິບ 1.200 ກວ່າຄັນ, ລົດ​ຕູ້ 570 ກວ່າຄັນ, ລົດບັນທຸກ 1.800 ກວ່າຄັນ ແລະ ລົດໂດຍສານ 90 ກວ່າຄັນ.

ຖ້າ ​ສັງ​ລວມ​ທັງ​ໝົດ​ນັບ​ແຕ່​ປີ 2000 ມາ​ຮອດ​ເດືອນ​ ມິຖຸນາ 2015 ຢູ່​ນະຄອນຫລວງ​ວຽງ​ຈັນ ແມ່ນ​ມີ​ພາຫະນະ​ທີ່​ມາ​ຂຶ້ນ​ທະບຽນ ​ຢູ່​ກອງ​ຄຸ້ມ​ຄອງ​ພາຫະນະ ແລະ ການ​ຂັບ​ຂີ່ ຈຳນວນ 692.000 ກວ່າຄັນ ແລະ ແຕ່​ລະ​ປີ ກໍມີ ​ທ່ຽງ​ອ່ຽງ​ເພີ່ມ​ຂຶ້ນ​ເລື້ອຍໆ, ໃນ​ນັ້ນ ມີ​ລົດຈັກ 481.700 ກວ່າຄັນ, ລົດ​ສາມ​ລໍ້ 3.400 ກວ່າຄັນ, ລົດ​ເກງ 44.500 ກວ່າຄັນ, ລົດ​ກະບະ 90.300 ກວ່າຄັນ, ລົດ​ຈິບ 18.590 ກວ່າຄັນ, ລົດ​ຕູ້ 25.300 ກວ່າຄັນ, ລົດ​ບັນທຸກ 26.300 ກວ່າຄັນ ແລະ ລົດ ​ໂດຍສານ 1.600 ກວ່າຄັນ, ຖ້າ​ສະເລ່ຍ​ໃສ່ພົນລະເມືອງ​ ຢູ່ນະຄອນຫລວງ​ວຽງຈັນ ​ແລ້ວ​ເກືອບ​ວ່າມີ​ລົດ​ຜູ້​ລະ​ຄັນ ໃນ​ນີ້ຍັງ​ບໍ່​ນັບ​ລົດ​ປ້າຍ​ທະຫານ, ຕຳຫລວດ ນອກ​ນີ້ຍັງ​ມີ​ລົດ​ຕ່າງ​ປະເທດ ແລະ ລົດ​ປ້າຍ​ຕ່າງ​ແຂວງ ​ທີ່ມາ​ນຳ​ໃຊ້​ຢູ່​ນະຄອນຫລວງ​ວຽງ​ຈັນ ໂດຍ​ສະເລ່ຍ​ແລ້ວ ມີ​ພາຫະນະ​ທີ່​ນຳ​ໃຊ້​ ຢູ່​ນະຄອນຫລວງ​ວຽງ​ຈັນ ປະມານກວ່າ 7 ແສນ​ຄັນ.

ແຫລ່ງຂ່າວ: ສຳນັກຂ່າວສານປະເທດລາວ