ເວລາເຮົາແລ່ນລົດຜ່ານເສັ້ນທາງເຮັດໃໝ່ໆ ມັກຈະມີເສດຫິນ ເສດຢາງໝາກຕອຍຟົ້ງຫຼືດີດມາໃສ່ລົດຂອງເຮົາ ເຮັດໃຫ້ສີລົດເປັນຄາບເບິ່ງບໍ່ງາມ ຫຼືເປັນຄາບແມງໄມ້ຕ່າງໆ ທີ່ຈະຕິດຢູ່ຕາມແວ່ນໜ້າລົດ ເວລາເຮົາເດິນທາງໄກ ໄປຕ່າງແຂວງ ເຊິ່ງບາງເທື່ອໃຊ້ນຳລ້າງກໍບໍ່ອອກ ດັ່ງນັ້ນ, ມື້ນີ້ເຮົາຈຶ່ງມີເທັກນິກດີໆ ກ່ຽວກັບການລ້າງຄາບຢາງໝາກຕອຍແລະຄາບແມງໄມ້ອອກຈາກລົດມາຝາກ.

ເສດຄາບຢາງໝາກຕອຍທີ່ຕິດມາກັບລົດ

ວິທີທີ່ສາມາດລ້າງຄາບຢາງໝາກຕອຍ ຫຼືຄາບແມງໄມ້ນັ້ນອອກກໍມີຫຼວງຫຼາຍວິທີ ເຊັ່ນ

ນ້ຳມັນກາດ

ນ້ຳມັນກາດເປັນສິ່ງທີ່ຄົນສ່ວນຫຼາຍມັກນຶກເຖິງເປັນອັນດັບທຳອິດ ເພາະສາມາດກຳຈັດຄາບຕ່າງໆໄດ້ເປັນຢ່າງດີ ແລະຍັງໃຊ້ເວລາບໍ່ດົນອີກ ແຕ່ມີມີຄົນບາງກຸ່ມທີ່ບໍ່ຢາກໃຊ້ນ້ຳມັນກາດໃນການກຳຈັດຄາບ ເພາະຢ້ານວ່າຈະໄປທຳລາຍຊັ້ນສີຂອງລົດແລະເຮັດໃຫ້ລົດບໍ່ເຫຼື້ອມມັນອີກ.

ນ້ຳມັນສົນຫຼືທິນເນີ

ນ້ຳມັນສົນຫຼືທິນເນີທີ່ເຮົາມັກເອົາມາປະສົມສີທາໄມ້ນັ້ນ ມີຄວາມສາມາດໃນການກຳຈັດຄາບຕ່າງໆໄດ້ດີພໍໆ ກັບນ້ຳມັນກາດ ແຕ່ຂໍ້ເສຍຂອງມັນຄື ມີກິ່ນຂິວທີ່ຮຸນແຮງ ຈົນອາດຈະເຮັດໃຫ້ຜູ້ໃຊ້ນັ້ນວິນຫົວຈົນຮາກກໍໄດ້.

ຄີມທຳຄວາມສະອາດອະເນກປະສົງ

ຄີມທຳຄວາມສະອາດອະເນກປະສົງນັ້ນ ຖືເປັນວິທີທີ່ຂ້ອນຂ້າງປອດໄພແລະໃຫ້ຜົນດີ ແຕ່ຜູ້ຄົນສ່ວນຫຼາຍມັກຈະບໍ່ຄ່ອຍມີຄົນຮູ້ຈັກປານໃດ ເຊິ່ງສ່ວນຫຼາຍມັກຈະໃຊ້ຕາມຮ້ານເກີບໜັງ ເຮັດໃຫ້ຄົນທົ່ວໄປບໍ່ຮູ້ເຖິງຄວາມສາມາດກຳຈັດຄາບຢາງໝາກຕອຍຫຼືຄາບແມງໄມ້ໄດ້ ໂດຍຄຣີມທຳຄວາມສະອາດອະເນກປະສົງນັ້ນສາມາດຫາຊື້ໄດ້ຕາມຮ້ານຂາຍອຸປະກອນໃຫຍ່ໆ ທົ່ວໄປໄດ້ເລີຍ.

ນ້ຳມັນສຳລັບກຳຈັດຄາບແມງໄມ້ແລະຢາງໝາກຕອຍໂດຍສະເພາະ

ສຳລັບສິ່ງສຸດທ້າຍນີ້ກໍຄົງບໍ່ຕ້ອງອະທິບາຍຫຍັງຫຼາຍແລ້ວ ເພາະຊື່ມັນກໍບອກໃນໂຕຂອງມັນເອງຢູ່ແລ້ວວ່າ ໃຊ້ສຳລັບກຳຈັດຄາບແມງໄມ້ ແລະຢາງໝາກຕອຍ ເຊິ່ງໂດຍປົກກະຕິແລ້ວ ຕາມຂ້າງຂວດຈະຂຽນລະບຸໄວ້ວ່າ Bugs and Tar Remover ຈຶ່ງໜ້າຈະເປັນວິທີທີ່ດີແລະປອດໄພທີ່ສຸດສຳລັບລົດຂອງທ່ານແລ້ວລະ ແຕ່ໃນການຊື້ນັ້ນກໍຕ້ອງເລືອກເບິ່ງຍີ່ຫໍ້ ແລະແບຣນທີ່ໜ້າເຊື່ອຖືແດ່ ເພາະສິນຄ້າບາງຢ່າງນັ້ນກໍອາດຈະມີການປະສົມສານຕ່າງໆ ທີ່ກ່າວໄວ້ຂ້າງເທິງຢູ່ນຳ.

ແລະທັງໝົດນີ້ກໍຄື ວິທີກຳຈັດຄາບແມງໄມ້ແລະຢາງໝາກຕອຍຕ່າງໆ ໃຫ້ອອກຈາກພື້ນຜິວສີຂອງລົດເຮົາ ເຊິ່ງຂໍບອກເຄັດລັບອີກເລັກໜ້ອຍວ່າ ກ່ອນທີ່ຈະທຳການກຳຈັດຄາບສົກກະປົກເຫຼົ່ານັ້ນອອກ ຄວນໃຫ້ນ້ຳສີດລ້າງໃຫ້ສະອາດສາກ່ອນ ເພື່ອໃຫ້ເມັດຊາຍແລະສິ່ງສົກກະປົກທີ່ເກາະຕິດອອກໄປໃຫ້ໝົດກ່ອນ ເຊັດໃຫ້ແຫ້ງແລ້ວຄ່ອຍເອົານ້ຳຢາມາມາເຊັດທຳຄວາມສະອາດຄາບອີກເທື່ອໜຶ່ງ.