ອົງການປົກຄອງເມືອງນາຊາຍທອງ ເລັ່ງແກ້ໄຂຈັດສັນຄວາມເປັນລະບຽບຮຽບຮ້ອຍ ຕາມແຄມທາງຖະໜົນເລກທີ 13 ເໜືອ ໃຫ້ເຂົ້າສູ່ລະບຽບ ໂດຍໄດ້ແຕ່ງຕັ້ງຄະນະຮັບຜິດຊອບສະເພາະກິດ ເພື່ອດຳເນີນການກວດກາ ແລະ ຊຸກຍູ້ການຮັກສາຄວາມສະອາດສວຍງາມ ພາຍໃນເຂດເມືອງນາຊາຍທອງ, ໃນນັ້ນ ແມ່ນໄດ້ເລັ່ງກວດກາຄືນບັນດາຮ້ານຄ້າແຄມທາງ, ຕະຫລາດ ແລະ ຈຸດຮົກເຮື້ອເປື້ອນເປິະຕ່າງໆ ເພື່ອແກ້ໄຂເປັນແຕ່ລະລາຍກໍລະນີ. ຫລ້າສຸດໃນວັນທີ 7 ກໍລະກົດຜ່ານມານີ້ ຄະນະຮັບຜິດຊອບໄດ້ລົງກວດກາ ແລະ ແກ້ໄຂບໍລິເວນຮ້ານຄ້າ ຈຸດສາມແຍກດົງໂດກ ເຂດບ້ານໄຊມຸງຄຸນ ແລະ ຈຸດທາງໂຄ້ງບ້ານອີ່ໄລໃຕ້ ໂດຍໄດ້ກວດພົບການຕໍ່ເທີບອອກໜ້າຮ້ານ ແລະ ການວາງເຄື່ອງຂາຍເກີນຂອບເຂດທີ່ກຳນົດໃຫ້ຫລາຍກໍລະນີ.
ທ່ານ ພູເຂົາຄຳ ພິມມະສອນ ຮອງຫົວໜ້າຫ້ອງການໂຍທາທິການ ແລະ ຂົນສົ່ງເມືອງນາຊາຍທອງ ທັງເປັນຫົວໜ້າຄະນະກຳມະການສະເພາະກິດດັ່ງກ່າວ ໄດ້ກ່າວວ່າ ທາງຄະນະກຳມະການໄດ້ແນະນຳໃຫ້ຜູ້ປະກອບການ ດຳເນີນການແກ້ໄຂ ດ້ວຍການເຮັດບົດບັນທຶກໄວ້ ພ້ອມທັງໃຫ້ກຳນົດເວລາແກ້ໄຂພາຍໃນ 3 ມື້ ຖ້າຫາກກາຍກຳນົດຍັງບໍ່ມີການແກ້ໄຂ ແມ່ນຈະໄດ້ກ່າວເຕືອນ ຈາກນັ້ນຈິ່ງຈະນຳໃຊ້ມາດຕະການປັບໃໝ ຕາມລະບຽບການຢ່າງເຂັ້ມງວດ.