ສຳນັກຂ່າວຕ່າງປະເທດ ລາຍງານໃນວັນທີ 9 ກໍລະກົດນີ້ວ່າ ຕະຫລາດຮຸ້ນສະຫະລັດອາເມຣິກາ ໄດ້ຢຸດການຊື້ຂາຍໄປເກືອບ 4 ຊົ່ວໂມງ ນັບຕັ້ງແຕ່ເວລາ 11:32 ໂມງ ຕາມເວລາໃນທ້ອງຖິ່ນ ໂດຍເຈົ້າໜ້າທີ່ຕະຫລາດຮຸ້ນລະບຸວ່າ ເກີດຄວາມຂັດຂ້ອງທາງດ້ານເຕັກນິກ ເຊິ່ງເກີດຂຶ້ນບໍ່ດົນຫລັງຈາກສາຍການບິນຢູໄນເຕັດ ແອຣ໌ລາຍ ໄດ້ລະງັບຖ້ຽວບິນທົ່ວໂລກເປັນເວລາ 1 ຊົ່ວໂມງ ເນື່ອງຈາກລະບົບຄອມພິວເຕີ້ມີບັນຫາເຊັ່ນດຽວກັນ ເຮັດໃຫ້ສະຖານະການທີ່ເກີດຂຶ້ນຕໍ່ເນື່ອງກັນຄືແນວນີ້ ໄດ້ກາຍເປັນກະແສຂ່າວລືວ່າ ກຳລັງເກີດການໂຈມຕີທາງຄອມພິວເຕີ້ ຫລື ຄອມພິວເຕີ້ຖືກແຮັກ ໃນສະຫະລັດອາເມຣິກາ.

ແນວໃດກໍຕາມ ໂຄສົກກະຊວງຄວາມໝັ້ນຄົງຂອງສະຫະລັດໄດ້ຖະແຫລງວ່າ ບໍ່ພົບສັນຍານທີ່ບົ່ງບອກເຖິງການກໍ່ການຮ້າຍທັງ 2 ເຫດການ ແລະ ບໍ່ຈຳເປັນທຳການສືບສວນເພີ່ມຕື່ມໃດໆ.

ທັງນີ້ ຕະຫລາດຫລັກຊັບນິວໂອກ ແມ່ນມີບັນຫາບໍ່ສາມາດຊື້ຂາຍໄດ້ຊົ່ວຄາວ ແຕ່ວ່າຕະຫລາດຫລັກຊັບອື່ນໆເຊັ່ນ ແນສເດັກ ແມ່ນຍັງຄົງມີການຊື້ຂາຍກັນໄດ້ປົກກະຕິ ຍົກເວັ້ນຮຸ້ນຂອງສະຫະລັດເອງ.