ສຳນັກຂ່າວກຸງເທບທຸລະກິດຂອງໄທ ລາຍງານຜ່ານເວັບໄຊ bangkokbiznews.com ມື້ວັນທີ 8 ກໍລະກົດຜ່ານມານີ້ວ່າ ລັດຖະບານລາວ ໄດ້ສຳເລັດການອອກພັນທະບັດສະກຸນເງິນບາດ (Baht Bond) ຢູ່ປະເທດໄທ ໃນວັນທີ 25 ມິຖຸນາຜ່ານມານີ້ ເພື່ອລະດົມທຶນເປັນວົງເງິນລວມ 12,000,000,000 ບາດ (12 ຕື້ບາດ) ໃນນັ້ນປະກອບມີພັນທະບັນອາຍຸ 3 ປີ ຈຳນວນ 1 ຕື້ບາດ ໃຫ້ຜົນຕອບແທນໃນອັດຕາດອກເບ້ຍ 3.56% ຕໍ່ປີ, ພັນທະບັດອາຍຸ 5 ປີ ຈຳນວນວົງເງິນ 5 ຕື້ບາດ ໃນອັດຕາດອກເບ້ຍ 4.32% ຕໍ່ປີ ແລະ ພັນທະບັນອາຍຸ 10 ປີ ໃນວົງເງິນ 6 ຕື້ບາດ ໃນອັດຕາດອກເບ້ຍ 5% ຕໍ່ປີ.
ແຫລ່ງຂ່າວໄດ້ລະບຸວ່າ ຜົນສຳເລັດຂອງການອອກພັນທະບັດສະກຸນເງິນບາດ ຂອງ ສປປ ລາວ ໃນປະເທດໄທຄັ້ງນີ້ ແມ່ນເປັນຄັ້ງທີ 4 ໃນຮອບ 3 ປີ (2013-2015) ອັນໄດ້ສົ່ງຜົນເຮັດໃຫ້ ສປປ ລາວ ມີຍອດຄ້າງພັນທະບັນສະກຸນເງິນບາດທັງໝົດ 21,590,000,000 ບາດ (21,59 ຕື້ບາດ) ເຊິ່ງກວມອັດຕາສ່ວນ 25% ຂອງຍອດຄ້າງພັນທະບັດສະກຸນເງິນບາດ ໃນຕະຫລາດທຶນຂອງໄທ ໂດຍລັດຖະບານ ສປປ ລາວ ໄດ້ນຳເອົາເງິນທຶນທີ່ລະດົມໄດ້ດັ່ງກ່າວ ເພື່ອໄປພັດທະນາພື້ນຖານໂຄງລ່າງຂອງປະເທດ ແລະ ປະເທດໄທ ກໍເປັນປະເທດທຳອິດ ທີ່ໃຫ້ການສະໜັບສະໜູນ ໃຫ້ ສປປ ລາວ ສາມາດລະດົມທຶນຢູ່ນອກປະເທດໄດ້ສຳເລັດ.
ການລະດົມທຶນດ້ວຍການອອກພັນທະບັດສະກຸນເງິນບາດຄັ້ງນີ້ ແມ່ນໄດ້ຮັບການຕອບສະໜອງສູງຈາກນັກລົງທຶນ ເຮັດໃຫ້ມີການຈອງຊື້ສູງເຖິງ 18 ຕື້ບາດ ຫລື ຫລາຍກ່ວາວົງເງິນທີ່ສະເໜີອອກຂາຍເຖິງ 1.5 ເທົ່າ ໂດຍທ່ານ ທີຣັດ ອັດຕະນະວານິດ ຮອງຜູ້ອຳນວຍການສຳນັກງານບໍລິຫານໜີ້ສາທາລະນະຂອງໄທ ໄດ້ກ່າວວ່າ ການອອກພັນທະບັດສະກຸນເງິນບາດຂອງ ສປປ ລາວ ໃນຄັ້ງນີ້ ຖືເປັນການພັດທະນາຢ່າງກ້າວກະໂດດ ເຊິ່ງໃນອານາຄົດຫາກ ສປປ ລາວ ມີການອອກພັນທະບັດຢ່າງສະໝ່ຳສະເໝີ, ມີຫລາຍລຸ້ນອາຍຸທີ່ກະຈາຍຕົວ ແລະ ມີຖານນັກລົງທຶນທີ່ຫລາກຫລາຍ ກໍຈະເຮັດໃຫ້ພັນທະບັດສະກຸນເງິນບາດ ຂອງ ສປປ ລາວ ກາຍເປັນຈຸດອ້າງອີງຫລັກ ຫລື Benchmark ຂອງປະເທດອື່ນໆໃນພາກພື້ນ ທີ່ຕ້ອງການອອກພັນທະບັດສະກຸນເງິນບາດ ເຊິ່ງໃນປັດຈຸບັນນີ້ ແມ່ນມີສາທາລະນະລັດແຫ່ງສະຫະພາບມຽນມາ ແລະ ຣາຊະອານາຈັກພູຖານ ກໍໄດ້ສະແດງຄວາມສົນໃຈ ແລະ ຢູ່ລະຫວ່າງການສຳຫລວດຄວາມເປັນໄປໄດ້ ເພື່ອອອກພັນທະບັດສະກຸນເງິນບາດຢູ່ປະເທດໄທແລ້ວ.
