ຂປລ. ວັນທີ 3 ກໍລະກົດ 2015 ນີ້ ທີ່ສະຖາບັນວິຈິດສິນແຫ່ງຊາດ ໄດ້ມີພິທີ ມອບ-ຮັບ ອາຄານຫລັງໃໝ່ ຂອງສະຖາບັນ ວິຈິດສິນແຫ່ງຊາດ ເປັນກຽດເຂົ້າຮ່ວມມີ ທ່ານ ບົວເງິນ ຊາພູວົງ ລັດຖະມົນຕີຊ່ວຍວ່າການ ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ, ຫົວໜ້າກົມ ຮອງກົມ, ພະນັກງານ, ຄູອາຈານ ແລະ ນັກຮຽນເຂົ້າຮ່ວມ. ເປັນກຽດຮັບໂດຍທ່ານ ດຣ. ໄມ່ສິງ ຈັນບຸດດີ ຜູ້ອຳນວຍການສະຖາບັນວິຈິດສິນ ແຫ່ງຊາດ ແລະ ມອບໂດຍທ່ານນາງ ສຸດສະດີ ລືໄຊ ປະທານບໍລິສັດລືໄຊກໍ່ສ້າງ.
ທ່ານ ດຣ. ໄມ່ສິງ ຈັນບຸດດີ ກ່າວວ່າ: ສະຖາບັນວິຈິດສິນ ໄດ້ເລີ່ມກໍ່ສ້າງແຕ່ເດືອນພຶດສະພາ 2014 ແລະ ສຳເລັດໃນເດືອນມິຖຸນາ 2015 ໂດຍແມ່ນບໍລິສັດລືໄຊ ກໍ່ສ້າງ ເປັນຜູ້ຮັບເໜົາ ມີມູນຄ່າການກໍ່ສ້າງປະມານ 48 ຕື້ ກວ່າກີບ, ເປັນອາຄານຮຽນ 4 ຊັ້ນ, ຮູບໂຕຢູ ໃນໂຄງສ້າງອາຄານ ເປັນເບຕົງເສີມເຫລັກ, ຫລັງຄາມຸງດ້ວຍຊີແຟກ, ປູດ້ວຍກາໂລ້, ຕິດຕັ້ງລະບົບໄຟຟ້າ, ລະບົບລິບ ພ້ອມເຄື່ອງອຳນວຍຄວາມສະດວກທີ່ທັນສະໄໝ ຄົບຊຸດໄດ້ມາດຕະຖານສາກົນ.
ທ່ານ ໄມ່ສິງ ຈັດບຸດດີ ກ່າວຕ່ືມວ່າ: ຈະປົກປັກຮັກສາ ແລະ ນຳໃຊ້ອາຄານຫລັງນີ້ໃຫ້ເປັນປະໂຫຍດສູງສຸດ, ມີປະສິດທິຜົນ ແລະ ມີຄຸນນະພາບໃນການຮຽນການສອນ ໃນລະດັບຊັ້ນກາງ, ຊັ້ນສູງ, ຊັ້ນປະລີນຍາຕີ ທີ່ມີໃນປັດຈຸບັນ. ປະລີນຍາໂທ, ປະລີນຍາເອກ ໃນອະນາຄົດ, ຜະລິດບຸກຄະລາກອນເປັນນັກວິຊາການ, ເປັນນັກວິໄຈ ແລະ ເປັນນັກສິນລະປິນອອກຮັບໃຊ້ສັງຄົມໃຫ້ຫລາຍຂຶ້ນ.
ສະ ຖາບັນວິຈິດສິນ ແຫ່ງຊາດ ເປີດສອນໃນລະດັບຊັ້ນສູງ ແລະ ປະລີນຍາຕີ ປັດຈຸບັນມີ ຢູ່ 5 ວິຊາເຊັ່ນ: ພາກວິຊາຈິດຕະກຳ, ພາກວິຊາພາບພິມ, ພາກວິຊາປະຕິມະກຳ, ພາກວິຊາສິລະປະພື້ນເມືອງ, ປະຕິສັງຂອນ ພ້ອມນີ້ກໍມີພາກວິຊາອອກແບບນິເທດສິນ 4 ຫລັກສູດວິຊາ ຄື: ຄວັດແກະສະລັກ, ປັ້ນ-ຫລໍ່, ປັ້ນດິນເຜົາ ແລະ ສິລະປະໂລຫະ.
ແຫລ່ງຂ່າວ: ສຳນັກຂ່າວສານປະເທດລາວ