ສຳນັກຂ່າວຕ່າງປະເທດ ລາຍງານໃນວັນທີ 5 ກໍລະກົດຜ່ານມານີ້ວ່າ ຣັດເຊຍປະສົບຜົນສຳເລັດ ໃນການສົ່ງຍານອາວະກາດ ໂປຣເກຣດ ເອັມ-28 ເອັມ ເຊິ່ງເປັນຍານບັນທຸກສິ່ງຂອງແບບບໍ່ມີຄົນຂັບ ຂຶ້ນໄປເຂົ້າທຽບສະຖານີອະວະກາດສາກົນໄດ້ສຳເລັດ ໃນເວລາ 10:11 ໂມງ ຂອງວັນທີ 5 ກໍລະກົດ ຕາມເວລາຂອງນະຄອນຫລວງມົດສະກູ ໂດຍຍານລຳດັ່ງກ່າວຖືກປ່ອຍຂຶ້ນຈາກຖານຍິງຢູ່ກາຊັກສະຖານ ໃນມື້ວັນທີ 3 ກໍລະກົດຜ່ານມາ ໂດຍໄດ້ວົນອ້ອມໂລກ ຈຳນວນ 34 ຮອບ ກ່ອນທີ່ຈະເຂົ້າທຽບທ່າສະຖານີອາວະກາດສາກົນໄດ້ສຳເລັດ.

ຍານໂປຣເກຣດລຳດັ່ງກ່າວ ແມ່ນໄດ້ບັນທຸກສິ່ງຂອງໜັກ 2,300 ກິໂລກຣາມ ເຊິ່ງປະກອບມີອົກຊີເຢັນ, ເຊື້ອໄຟ, ອາຫານ, ອຸປະກອນທາງວິທະຍາສາດ ຕະຫລອດຮອດເຄື່ອງໃຊ້ສ່ວນຕົວ ສຳລັບມະນຸດອະວະກາດ 3 ຄົນ ໃນສະຖານີອະວະກາດ ເຊິ່ງເປັນຄົນຣັດເຊຍ 2 ຄົນ ແລະ ຄົນອາເມຣິກາ 1 ຄົນ ກຳລັງອາໄສຢູ່ເທິງອະວະກາດໃນປັດຈຸບັນ.